1 Jo amwenen ibo gok ta atudun nyarak kahis. Handru, kandriyen doh winiya baseben iri mwan ma badih atanan jo aposel bwe, arile jo ari madasan ja ta leheya aha ta lakou dah bwai. Arile, nadah jo anya kasehek nyala ameh ma sahou rayah Laban asehek eme tek. 2 Jo tanan ndramak ta Krais ari.*Anyolom ta aliy i buku ndramak ta Krais doh badeh, Pol le amwenen. Ou anyolom ili ta kalan 12:7. Udu bolo jaha ronoh hahuw (14) ndra-au, Kindrei badeh, andrei iy ma mwasin iu ili bolo kandrah loken, loken labai handru on. Sebwe, iy ma mwasin o malawin le, jo bala tanan bwai. Kindrei le ari badeh, tanan ai. 3-4 Jo anya kasehek ja. Jo tanan, Kindrei andrei iy ndramak doh, iu ili bolo kandrah loken, loken labai mara-ei on. Sebwe, iy ma mwasin o malawin le, jo bala tanan bwai. Kindrei le ari badeh, tanan ai. Ya, udu bolo kandrah loken labai nane doh, iy anuhun sahou rayah doh, lau winiyan basehek na boho iri bwe. Ma sahou rayah doh ndrabun labai ta asehek ale. 5 Eme ma, jo anya katudun nyara ndramak doh. Arile, jo winiya batudun nyarak ja bwai. Jo winiyan asehek le ta jo nyamuk bwe, ma jo winiyan atudun nyarak ta lakou doh le.

6 Aha mara-ei kanuhun se! Buku jo anya katudun nyarak amwenen, jo kameh winiyan basahan ndramak ta wasai ja bwai. Iri lakou mara-ei doh, jo winiyan asehek ta aliy, handru, ma mene ndrasahan tek. Arile, jo batudun nyarak amwenen bwe. Tasah, jo bwalek ari ndramak mwan o badih ja anuhun sahou dah, ma abudon anya jo ndramak mwasin. Jo aso-ok aha lau mwan ma badih kanyolom kandriyen jo amekes, ma sahou jo asehek. Ta idoh le, aha winiyan anyolom jo, ma atanan jo.

7 Ya, lakou nane Kindrei leheya eme tek doh badeh, laba tinan labai. Eme ma, iy bwalen jo atudun nyarak ili loken labai mara-ei. Eme ma, iy atehei sik ari eme badak. Sik doh bokoro-ei jo i buku bodo lakou madan, madan tatahi ndramak. Sik doh, i buku ndramak ta balik ari, iy eme ta a-um jo ma tolomwa jo, ta jo satudun nyarak. 8 San tulusin badeh, jo asalom ili ta Laban ta iy kanyumuri sik udu bwele-ek dah ki-iu. 9 Arile, Laban anya, “Jo winiya banyumor ou bwai, arile, jo kameh udu hawem. Idoh le. Tasah, boto-on tek le badeh, ibo gok handru, tiri lau nyamu iri bwe.” Eme ma, jo winiya babudon ta sik dah, ma jo nyamuk ja bwai. Jo sekesek labai ja ta udu buku dah, ma boto-on ta Krais ere hawek. 10 Eme ma, gok jo amekes dah badeh, ta Krais. Buku jo nyamuk bwe, maha-an solo-an akohok jo, iri lau anya kadi jo, mwasin jo kasekesek le ai. Ya, buku jo nyamuk bwe, na len le doh, boto-on ta Kindrei udu bwele-ek.

11 Sahou nane jo amekes ta atudun nyarak, idoh i buku sahou ta ndramak lolo-ou. Jo bwalek ta asehek, arile aha badeh, bwidi ndrinek ta amekes. Tasah, aha amwenen batudun nyarak bwe. Idoh mwasin, aha amekes i buku doh. Arile, bwe. Jo ndramak laleyah, arile jo sakalau iri lau ta wasai mara-ei nane aha aloh iri, “aposel mwasin handru.” 12 Na len mene jo udu hawe aha, jo amekes lakou solo-an labai ta leheya aha, buku jo aposel handru, ma Kindrei amwenen tiye jo ta ewek. Ehe, jo amwenen atehei jo iu ili andri mara-ei, ma amekes iri gok solo-an buku doh: Jo amekes kalem solo-an ndrawek taha, ma lahou tinan rayah bwidi mani iri mwan ma badih atur, ta anyolom boto-on ili ta Kindrei. 13 Jo mene amekes kandriyen le dah ewek taha, jo amekes ili tiri lau ta Kindrei rayah ale are laleyah. Arile, sebwe kandriyen tek ndra-in nadeh! Tasah, jo badeu ari maha-an bawek taha bwe, ma jo amwenen ale bandrek aha ta luk ta amekes gok dah bwe le. Arile, mwasin, aha kamani iri “lakou ndra-in” nane doh jo mesekei ndrawek taha!

14 Ya, na len dah jo alokou jo ta ewek hawe aha, i buku san tulusin ai. Buku jo ewek, jo kameh winiya bandrek luk o saba lakou taha ja bwai. Aha kanuhun! Jo bwalek akohok lakou taha. Tasah, jo baso-ok luk taha bwe. Jo badeh, anya kakohok aha ndramak le amwenen. Aha tanan, iri nah badeh, winiya bamekes gok ta asilah, ma atukum lakou i ta tama ma tine iri bwe. Tama ma tine iri le badeh, winiya asilah ma atukum lakou ta aseben nadu iri le kabwe. 15 Eme ma, jo kameh sekesek ta edeu iri lakou tek mara-ei, ma hawe kohak ewek taha ta aseben aha asahan iri lau boto-on ta Kindrei. Handru, jo badeh, aso-ok aha labai. Arile, sebwe aha tanan lakou doh nadeh? Eme ma, tasah handru aha batehei ndrine aha mara-ei bame tek bwe?

16 Arile, iri taha rayah badeh, asehek ta kandriyen tek i buku doh: “Handru, taha banyolom iy akohok lakou tataha bwai. Arile, tanan tan badeh, mwasin labai ta andrek taha, ma kandriyen ta balagwah ta orou no-o taha ta akohok lokowa taha laleyah.” 17 Ya, i buku sah handru? Badu mine iri lau mene jo tiye iri awek hawe aha nadeh? 18 Jo mene edeu budon mwasin i ta Taitus, ano jo tiye iy ma nadu tine taha ari ja, ta awek hawe aha. Sebwe, uru ndrakohok rayah luk taha ndrado mine uru ndrame nadeh? Sebwe, ndrine aso badeh, bala le ari, ta amekes gok dah bwe nadeh? Sebwe, ahi bamekes kandriyen bala le ari, ma ba-en hamon ta boto-on ta Malawin Ndrabun ari le doh, bwe nadeh? Aha kabudon kamwenen!

19 Sebwe aha kameh anyolom iri sahou mara-ei doh, ma aha kameh abudon ahi torowenei ta amekes sahou tahi kamwenen ta mada aha. Arile, bwe. Ahi ado mada Kindrei i buku nadu tine aha i san ta Krais, ma ahi aseken aha labai. Eme ma, ahi amekes iri sahou dah, ta atadau budon taha kabadok. 20 Tasah, jo inoh sese, ma jo abudon i buku doh, kora-on jo kewek ma katawei aha bala buku ndramak nane jo anya kanyolom ja bwe. Ma kora-on aha ale anya kanyolom jo bala buku ndramak nane aha anya kanyolom. Kora-on jo katou iri kandriyen solo-an doh udu ndrokowa aha. Idoh kandriyen ta tebelese sahou, ma kandriyen ta ndrinem irih i tiri lau rayah ja, ma kandriyen ta amekes lakou laleyah, buku aluhe, sondrokonya, batun boto-on, ma kandriyen ta bolowa lakou laleyah. 21 Ma kora-on jo kewek, ma Kindrei tek kameh kabolei jo kudu mada aha. Kora-on bwilik kama ma jo keden ndranye iri lau rayah are bolo aha mene amekes kandriyen ndra-in. Iri batubuni ndrine iri bwe, ma badeu kona iri bala ta kandriyen ndra-in ta karei bwe, ma kandriyen ta amadin hawe udu ndramak ari ja. Jo inoh labai tiri lakou mari doh.