Pol atorou la-ukei tan ramen ja ili tiri lau badu kon
TESALONAIKA
Sahou Tanan
Sebwe iri mwan ma badih ta Kindrei are kon tinan Tesalonaika badeh, abudon solo-an labai ta saba lakou handru kameh asahan na bolo len ta Krais eme hamon ja. Iri rayah badeh, asehek i buku len ta Laban badeh, ndrasahan. Eme ma, Pol uru Sailas ma hawe Timoti atorou la-ukei dah ta amekes budon tiri kamwenen.
Pol asehek buku len doh basahan bwe le. Ma mwena handru, iri mwan ma badih kameh amekes lakou laleyah hawe iri kandriyen ndra-in kameh asahan i tinan le ai. Ma ndramak ari ta tebelese sahou batanau kameh asahan, ma iy kameh amekes bahun i ta Krais.
Pol tiye tiri mwan ma badih kabadok ta budon ta bwese iri maha-an. Iy aso-ok, buku iri badeh, kabo gok boto-on ta aseben iri le amwenen, i buku, iy amwenen ma hawe oro lau badu hawen amekes. Iri sawoyah ta amekes gok, ma iri sawoyah ta aseben iri mwan ma badih rayah, ja.
Iri Sahou Tinan
Sahou sekesek ta Pol (1:1-2)
Laban eme hamon ta edeu taha a ta mada sahou (1:3-12)
Sahou tanan ta Laban eme hamon ja (2:1-12)
Ou atehei ndrinem kili ta Laban (2:13-17)
Ou amekes lahou ma salom (3:1-15)
Salom ma hawe batanau tan ta ano (3:16-18)
Len ta Laban kameh asahan hamon
1
(Kalan 1–2)
1 Jo Pol, jo atorou la-ukei dah. Sailas uru Timoti badeh, are hawek ale. Eme ma, aso ma taloh atehei la-ukei ramen dah ewek taha lau mwan ma badih ta Kindrei are bolo kon tinan Tesalonaika. 2 Aha lau mwan ma badih ta tama taha Kindrei, ma hawe Laban tataha Jises Krais. Aso aso-ok Kindrei hawe Laban Jises Krais, uru katikisi aha, ma ndrine aha kudu mwasin.
Iri Tesalonaika badeh, ales boto-on labai na len ta maha-an
3 Aha nadu tine, len marakon badeh, aso adeu wurah ili ta Kindrei ta aha. Handru, kandriyen ta tiye wurah i ta Kindrei doh amwenen. Tasah, budon taha badeh, asahan boto-on labai. Ma ale, aha marakon badeh, aso-ok nadu tine aha mwan ma badih rayah labai ja. Ma kandriyen mwasin asahan a sola le ai, ere ndrokowa aha. 4 Ta idoh le, aso badeh, atudun nyara aha udu ndrokowa iri mwan ma badih ta Kindrei. Ma aso asehek sahou i buku doh: “Na len iri lau amekes kandriyen ndra-in ili tiri lau badu Tesalonaika, ma len ta maha-an asahan tiri, iri badeh, ales boto-on, ma tawiy ihis budon tiri, ma bwese iri maha-an ma isi.”
Kindrei seleyani taha na le kandriyen mwasin
5 Ya, ta kandriyen mwasin, ale aha amekes udu bolo iri lau ndra-in ta amekes kandriyen ndra-in laleyah ewek taha, Kindrei badeh, leheya taha i buku doh: Iy badeh, seleya taha mwan ma badih badu kon munyak na le kandriyen mwasin. Aha bwese sisi-in doh, ta aseben iri lau mwan ma badih, ta Kindrei winiyan atondrok iri, ma Kindrei ale kameh winiyan atehei aha ta ala ado bolo iri lau mwan ma badih nane, iy amwenen atondrok iri. 6 Handru, Kindrei kameh amekes kandriyen mwasin buku doh: Hamon, iy edeu maha-an ili tiri mwan ma badih, iri nane adeu maha-an ewek taha. Kindrei abudon, idoh amwenen. 7 Ma iy ale anya kakohok maha-an, aha bwese doh ki-iu, ma iy anya kedeu amunyau kewek taha, ma aso ale. Lakou doh kameh asahan, na len Laban Jises hawe iri angelo tan boto-on, iri are kandrah ame andri, ma asahan ame lewan. Iy kameh eme hawe jih laba tinan, ma nyarahan labai. 8 Udu bolo len doh kameh iy edeu ndramas ndra-in ili tiri mwan ma badih baso-ok Kindrei bwe, ma iri bwale iri ta a-en hamon ta sahou mwasin ta Laban tataha Jises Krais. 9 Ya, iri mwan ma badih doh kameh, akohok ndramas ndra-in labai i buku doh: Laban kameh atehei iri are len labai ta madan, ma ta sun badeh, asahan na boto-on tan, ma iri kameh andrakak are ndra bolo jih ta udu le buku doh. 10 Iri mwan ma badih doh kameh, ano mara-ei udu bolo len ta Krais eme hamon eme munyak ja, ma iri lau marakon ta Kindrei kameh atudun nyaran ta lakou marakon iy amekes ili tiri. Ya, iri lau marakon mene atehei budon tiri handru ndrala tan, iri kameh sekesek. Aha kameh i buku aliy ale. Tasah, aso mene tiye sahou ta Kindrei udu ndrokowa aha amwenen, ma aha atehei budon taha handru in ta sahou doh.
11 Aso abudon ta lakou dah kameh asahan na len ta Krais eme munyak ja, eme ma len marakon aso amekes salom ili ta Kindrei tataha, ta iy kameh kaseben aha. Aso abudon aha ta len mene aha a-en hamon ta Kindrei, ma iy ariu aha ta sahou mwasin ta Krais. Eme ma, aso asalom ta iy amwenen kabwidi aha winiyan ta ala bolo kandriyen mene iy ndratandrakan aha ta amekes. Ma aso ale asolom i ta Kindrei, iy kedeu boto-on kewek taha, ma aha winiyan amekes iri kandriyen mwasin marakon aha anya kamekes. Handru, aha winiyan amekes iri gok marakon aha atehei budon handru in ta Krais, aha anya kamekes. 12 Buku aha amekes kandriyen buku doh, aha winiyan atudun nyara Laban tataha Jises, ma iy winiyan atudun nyara aha ale. Tikisiy ma mwasin ta Kindrei tataha hawe Laban Jises Krais le, winiyan amekes iri lakou marakon doh asahan handru.