1 Ya, aha nadu tine aso, na dah, aso anya katiye taha ta Laban tataha Jises Krais kameh eme hamon eme munyak ja, ma taha kameh atukum ala hawen. Aso asehek taha i buku doh: 2 Mani aha satur laleyah ta sahou rayah, aha anuhun ta Laban Jises, anya iy mene ndrame hamon. Arile, bwe! Kahis. Sebwe malawin ari ta wendreya le atehei sahou doh ndrala ta ari ndramak. O, sebwe ari ndramak asehek na le budon tan amwenen, nadeh. O, sebwe iri rayah anya, aso badeh, atorou la-ukei i buku doh ili tiri. Bwe labai. Buku aha ndranuhun sahou solo-an doh, aha sabudon solo-an ta aliy. Tasah, sahou doh wendreya. 3 Aha sanuhun lau rayah wendreya aha na sahou tiri, o, ta kandriyen rayah. Tasah, len ta Laban ta anya keme hamon doh badeh, winiyan basahan laleyah bwe. Ma bwena, lau solo-an kameh tebelese, ma adeu kona iri ili ta Kindrei, ma ndramak ari doh ta balik, iy ta amekes kandriyen ndra-in, ma iy banuhun sahou batanau bwe, iy kameh asahan eme lewan, ma iri lau kameh atanan iy amwenen. Hamon kameh ndramak doh andrakak udu bolo jih. 4 Iy kameh amekes bahun ili tiri budon solo-an ta lau badu kon munyak a-en hamon ta aliy, ma iy aseken iri katudun iy buku Kindrei. Ma iy ale kameh atudun nyaran amwenen, ma tubuloh budon tiri lau rayah. Eme ma, iy kameh ili manyah udu bolo asiu ndrabun ta Kindrei, ma iy kameh asehek sahou i buku doh: “Jo amwenen, jo Kindrei.”

5 Bwena mene jo udu hawe aha, ma jo asehek nyala aha ta iri lakou marakon doh. Sebwe aha ndramani budon doh nadeh? 6 Aha tanan ale ta lakou ari udu aliy na dah, iy aturuk san ta ndramak ndra-in nane doh, ta iy winiyan asahan eme kon lewan ta mada iri lau na bolo len dah. 7 Ya, aha ndratanan kandriyen dah, ta tebelese sahou batanau badeh, udu aliy, ma asahan amunum, amunum le eme loken. Arile, basahan bala tinan bwe le, ma iy kameh udu le buku doh, winiya le len ta lakou doh nane turuki san ta ndramak ndra-in, Kindrei le ari kameh winiyan aruwi ma andrei lakou doh iu ili len. 8 Na len doh, iy ndramak ta balik kameh asahan eme lewan. Ma iri lau marakon kameh atanan iy. Arile, hamon kameh, Laban Jises eme ja, ma hawe lomada sun tan tinan labai, ma iy kameh idi ndramak ta balik nane na jor ta bohon le amwenen. Ma iy kameh amekes iy ndramak doh asahan lakou laleyah. 9 Tasah, ndramak ta amekes kandriyen ndra-in ma ta tebelese sahou batanau kameh eme hawe boto-on ta balik le. Ma, na boto-on ta balik le, iy kameh amekes iri gok marakon boto-on ma kalem solo-an ta wendreya. 10 Ta kandriyen solo-an doh, iy kameh wendreya iri lau ta ala bolo jih ta andrakak au. Buku iri lau doh mene aso-ok ma anya kanuhun sahou handru, badeh kameh Kindrei winiyan akohok iri ame hamon. Arile, iri baso-ok bwe. 11 Eme ma, Kindrei kameh atehei boto-on ta wendreya ili tiri, ma iri kameh atehei budon tiri in ta sahou wasai. 12 Kindrei amekes lakou doh, tasah iri lau marakon mene batehei budon tiri ba-en ta sahou handru bwe, iri mene sekesek ta kandriyen ndra-in le. Iri kameh akohok ndramas ndra-in labai ta mada sahou ta Kindrei.

13 Arile, aha nadu tine aso mwan ma badih, Laban aso-ok aha labai, ma na len marakon, aso badeh, adeu wurah ili ta Kindrei ta aha. Tasah, ma bwena handru, Kindrei ndratanan aha kameh ta ame hamon. Malawin Ndrabun badeh, ndraleheyani aha ndrala ta Kindrei, ma aha atehei budon taha in ta sahou handru. Ma ta kandriyen doh le, Kindrei andrei aha ame hamon. 14 Iy andrei sahou mwasin handru ta Krais, aso mene tiyaniy ndrawek taha, ma iy aruwi ndrine aha ili le tan. Eme ma, iy anya kedeu sun, ma iri lakou mwasin ta Laban tataha Jises Krais badu kandrah kewek taha. 15 Eme ma, aha nadu tine aso, aha kales boto-on. Ma iri sahou marakon ta Kindrei aso mene leheya aha ta aliy, na boho aso, o, na la-ukei aso atorou ewek taha, sahou doh aha ka-en hamon ta aliy.

16 Laban tataha Jises Krais hawe tama taha Kindrei mene tikisi taha. Eme ma Laban bwidi kandriyen mwasin eme tataha, ma bwidi budon tataha amwenen udu le buku doh. Ma iy aseben taha ta budon, ma taha atondrok Kindrei kamekes manyah tataha kudu mwasin. 17 Eme ma, aso asolom, ta iy katadau ndrine aha hawe koha aha kabadok, ma kaseben aha ta amekes iri kandriyen mwasin, ma asehek sahou mwasin.