1 Taha samani kandriyen ta aso-ok nadu tine taha iri rayah ja i san ta nyara Jises. 2 Aha samaniy ta asumon iri lau badu kon leheleh ame bolo kon tam. Aha ndratanan, bwena mene iri lau rayah amekes i buku aliy, ma iri andrei iri angelo rayah ala asiu hawe iri, ma tondrokei iri. Arile, iri bala tanan ta angelo eme bwe, iri anya ndra ndramak awas le ai. 3 Aha kabudon iri lau ta Kindrei rayah ado bolo asiu lulik. Aha kabudon iri, i buku aha ado bolo asiu lulik hawe iri ale. Aha kabudon iri lau ado ta maha-an solo-an, aha katehei aha i buku aha bwese maha-an hawe iri ale.

4 Tasou badeh, lakou ari mwasin handru. Eme ma kandriyen aha amekes ta tasou, badeh, kudu mwasin labai ta mada Kindrei. Kora-on aha amekes ndra-in ili ta budon ta Kindrei. Tasah, aha ndratanan, hamon kameh Kindrei edeu ndramas ndra-in ili tiri lau mwan ma badih amekes kandriyen ta karei, ma iri lau amekes laleyah ta bolo tasou tiri.

5 Mada taha salikis ta luk. Iri saba lakou nane taha ndrakohok ma tataha udu aliy badeh, ndra winiyan ai. Kindrei ndratandrakan,

6 Eme ma, taha winiyan amekes budon tataha abadok, ma amekes i buku le ta sahou udu bolo buk ndrabun asehek,

7 Aha samani iri lau ta Kindrei nane a-en mwena taha, iri mene leheya aha ta sahou ta Kindrei. Aha kabudon saba kandriyen asahan ta manyah ma tekedek tiri, ma aha katehei budon taha ki buku le iri.

8 Kandriyen ta Jises Krais badeh, bala randrah bwe, iy i buku le bwena mene, iy i buku le na dah, ma iy ta udu le buku doh. 9 Eme ma aha satehei aha sala bolo iri sahou solo-an, eme ta ariu budon taha, ma aha mani san mwasin ta Kindrei. Kindrei amekes kandriyen mwasin labai eme tataha, ma idoh amekes taha abadok ta a-en hamon tan. Buku taha a-en hamon ta iri batanau ta beleben nyamon solo-an labai, idoh baseben taha ta a-en hamon ta Kindrei bwe. Tasah kandriyen doh, baseben iri lau bwena mene ba-en hamon ta aliy bwe le. 10 Jises Krais badeh, salom tataha. Eme ma iri pris a-en hamon ta batanau ta Moses ma iri amekes salom tiri kahis le, iri winiyan bakohok seben mwasin ta salom tataha nane doh bwe.

11 Tinan tiri pris amekes gok udu bolo asiu balei ta Kindrei, iy andrei ndraye sipsip ma bulumakau, eme iy tiyani ndra nane doh ili bolo asiu ndrok ndrabun ndrabun labai ta amekes salom ta talou kandriyen ndra-in tiri iu. Arile, sali iri sipsip ma bulumakau nane doh badeh, iri sulumwiy andrakak iu udu ndra manan, bado bolo kon bwe. 12 Jises ale akohok sisi-in tinan labai udu manan loboho madasan ta kon tinan, bado bolo kon amwenen bwe. Iy amekes i buku doh, ta amekes iri lau marakon asahan ndrabun, ma ndrayen amou ta akunoh taha ame hamon ja. 13 Eme ma taha karuwani iri lau rayah nane anya ka-en hamon ta kandriyen ta salom tiri Juwis. Taha kamani iri, ma kame hawe Jises Krais. Idoh i buku taha ala are manan ale, ma taha kabwese bwilima i buku le iy bwese. 14 Udu bwele-e kon munyak dah, taha ari kon tinan ta udu le buku doh bwe, arile taha atondrok kon tinan ari doh kameh asahan hamon.

15 Eme ma taha kasekesek ta Kindrei ta nyara Jises, ma taha kadeu sekesek doh kili tan kudu le buku doh, i nyara salom tataha. Salom nane tataha amekes dah, i buku sahou ta atudun nyaran, ma ta leheya kandriyen tan mwasin kili tiri lau mari. 16 Aha samaniy ta amekes iri kandriyen mwasin ili tiri lau mwan hawe iri badih. Buku iri rayah, tiri lakou bwe, aha kaseben iri. Kindrei aso-ok iri kandriyen doh, tasah kandriyen doh ale asahan salom mwasin labai ta madan.

17 Aha kanuhun boho iri lau ta Kindrei nane a-en bwena taha, aha ka-en hamon ta saba lakou iri aso-ok aha kamekes. Tasah, iri atondrok aha, ano iri kameh asehek ili ta Kindrei ta tondrok tiri i buku sah. Eme ma aha kanuhun sahou tiri. Buku aha amekes i buku doh, iri kameh winiyan sekesek ta ateu gok tiri, ma iri winiyan batona maha-an ta aliy bwe. Ya, buku iri basekesek ta atondrok aha bwe, idoh kameh winiyan basebenei aha bamwenen bwe. 18 Aha kasolom kili ta Kindrei ma kandremenya iy ta aseben ahi. Ahi ndratona ndrine ahi ere mwasin labai ta madan. Eme ahi anya kadek kamwenen bolo len marakon. 19 Jo aso-ok aha kasolom kili ta Kindrei, ta iy kaseben jo, eme ma, jo kameh winiyan ewek hamon suwi ta anyolom aha ja.

20-21 Kindrei mene mete-ei Laban tataha Jises. Eme ma iy asahan ndramak mwasin labai ta atondrok taha mwan ma badih buku sipsip. Tasah, ta ndrayen mene amou, eme iy tutuniy ma bwidi sahou randra le doh abadok ta ere le buku doh. Kindrei badeh, kati manyah mwasin tataha. Eme ma, jo aso-ok iy katehei iri kandriyen mwasin mari doh kewek taha, ta aha ka-en hamon ta tanan tan. Ma jo aso-ok, iy kaleheya kandriyen mari kasahan bolo taha, buku iy amwenen aso-ok. Kandriyen doh asahan ta Jises Krais, iy amwenen aseben taha ta amekes. Taha katudun ma kamasiye nyaran kudu le buku doh. Handru!

22 Aha nadu kawas tek. Jo aso-ok aha kanuhun kamwenen ta iri sahou jo ndratorowenei ndrawek taha ta amekes budon taha kabadok. Tasah la-ukei nane jo atorou ndrawek taha se lawe-en bwe.

23 Jo anya kasehek tado i buku doh: Iri ndrandrei nadu tine taha Timoti ndrame manan ta asiu lulik. Buku iy asahan hawek suwi, idah kameh aru ma la-uh kameh awek ta anyolom aha.

24 Aha katiye sekesek taru ma la-uh kili tiri lau ta Kindrei a-en mwena taha, ma hawe iri lau mwan ma badih marakon ta Kindrei. Iri lau badu kon munyak tinan Itali tiye sekesek tiri ewek taha ale.

25 Tikisiy ma iri kandriyen mwasin mari kudu hawe aha lau marakon ta Kindrei.