La-ukei
JEMIS
torowenei
Sahou Tanan
La-ukei ta Jemis dah badeh, sahou solo-an ndra mwasin le udu aliy. Jemis atorou la-ukei dah ta aseben taha mwan ma badih ta Kindrei aseker areu kon munyak dah, ta taha ka-en hamon ta kandriyen mwasin. Iy asehek sahou sokek ta aseben taha mwan ma badih ta akohok budon mwasin, ya taha katunuhun sahou tan kamwenen.
Jemis asehek sahou boto-on i buku doh: Are lau atehei budon tan boto-on in ta Jises, iy winiyan ba-en laleyah bwe. Iy kameh amekes kandriyen mwasin i ta ndramak ari ja. Idoh kameh leheya buku none iy ndramak doh, budon tan boto-on handru i ta Kindrei.
Iri Sahou Tinan
Sahou sekesek (1:1)
Budon ma tanan (1:2-18)
Taha kanuhun ma ka-en hamon ta sahou ta Kindrei (1:19-27)
Taha kamekes kandriyen mwasin randra le kili tiri lau marakon (2:1-13)
Ou atehei budon ki-in tan ma ou amekes lahou tan (2:14-26)
Tanan tataha ma sohowa taha (3:1-18)
Ndramak atehei budon tan boto-on labai in tiri lakou badu munyak (4:1–5:6)
Taha kasolom ma taha kabe-en le (5:7-20)
Taha badeh, kales boto-on tiri none, ma taha kameh ado mwasin labai hawe Kindrei
1
(Kalan 1:1-18)
Jo Jemis, jo ndramak ta lahou ta Kindrei hawe Laban Jises Krais. Jo atorou la-ukei dah ma edeu sekesek tek ewek taha mwan ma badih mari badu boho kamen ma ronoh la-uh badu Isra-el aseker areu bolo kon munyak mara-ei nane dah.
Iri none badeh, ta amekes taha abadok
Ya, ado nadu tine, buku iri none ndra-in solo-an asahan tado, mwasin ta ado kasekesek le. Ado ndratana ado, buku iri none ndra-in solo-an doh asahan tado, badeh, kandriyen ta none ndrine ado, ta atadau aha ta ales boto-on ta budon, ma a-en hamon ta sahou handru ta Kindrei. Buku none ado atehei budon handru in ta Kindrei, ma ado a-en hamon ta sahou handru, idoh kameh winiyan sebenei ado ta ales boto-on, ta iri lakou anya kasahan tado. Eme ma, ado kameh asahan lau handru ta Kindrei, ma winiyan barah ta lakou mwasin tan bwe.
Ndramak, iy aso ta budon iy kasolom
Buku none rayah lau areu rewa ado, aso ta budon mwasin, oro badeh, kasolom ki ta Kindrei, ya Kindrei winiyan sebenei oro. Tasah, Kindrei ale edeu lakou solo-an eme tataha lau, hawe iy winiyan edeu budon mwasin ewek taha, ya iy winiyan babolosen bala tare lau nane ndremenya iy ta budon mwasin bwe. Arile, ndramak ale ndremenya Kindrei doh, iy katehei budon tan handru, ma iy sabudon solo-an, ya iy kasolom ki ta Kindrei. Iy samaniy, ya iy satehei budon buku doh, “Kindrei kameh atehei lakou doh eme tek deh bwe?” Tasah, ndramak iy edek na budon la-uh, iy badeh, buku none mada bayau ale jor oloh, ma atohou ili eme. Ndramak buku doh satehei budon anya Kindrei kameh atehei ari lakou i tan, winiyan bwe. Budon ta ndramak doh bameles ba-en rasi bwe, ya iy badek ta budon ari le bwe.
Jemis edeu sahou i tiri lau ndra-in hawe iri lau nadu batun
Iri lau mwan ma badih ta Kindrei, buku iri, tiri lakou bwe, iri badeh, kasekesek, tasah udu budon ta Kindrei badeh, nyara iri tinan labai. 10 Arile, iri lau nadu batun, iri badeh, sasekesek le ta aliy. Iri kasekesek ale, buku Kindrei karuwani iri lakou mari nane, iri tawiy udu mine iri ki-iu mara-ei. Tasah, iri kameh amak buku kanyeu awa-is na beyeh; luk nane doh winiyan basebenei oro na bolo len doh bwe. 11 Ya, taha tanan, an anya eme loken badeh, nyarahan labai, ma sulumwi bwidiu asara mara-ei. Buwa bwidiu mari badeh, iroh ili andri, ma kone iri iu mara-ei. Idoh i buku le, iri mwan ma badih tiri lakou solo-an labai, iri kameh amak, udu ndra bada gok solo-an solo-an nane iri amekes.
Kindrei amekes mwasin eme tataha ya iy baliu taha ta amekes kandriyen ma lomondra ndra-in bwe
12 Kindrei kameh winiyan nyosowani ou are lau, buku ou ales boto-on handru ta bwese iri maha-an. Ma iy kameh edeu kohan handru i ndramas i tiri ta udu le buku doh. Kindrei badeh, ndratandrakan ndrala tare lau nane atehei budon tiri mara-ei in tan ma aseken iy labai.
13 Ya, aha kanuhun! Buku lakou kanone kasore ndrine ari mwan o badih ta ariu iri ala ta amekes kandriyen ndra-in, iri sasehek anya, “Kindrei badeh, anya kanone jo ta amekes kandriyen ndra-in doh.” Arile bwe, idoh badeh, sahou wendreya. Kandriyen ndra-in badeh, winiyan baruwi Kindrei bwe, ma Kindrei badeh, winiya banone ta ariu ari mwan o badih ta amekes kandriyen ndra-in bwe. 14 Arile, ndrine taha mari ari ari badeh, atadau ma ariu taha. So-ok tataha ndra-in amwenen nane doh badeh, indrek taha ma wendreya taha ta amekes kandriyen ma lomondra ndra-in. 15 Ya nadah, jo anya kasehek sahou sokek ari i buku doh: Kandriyen ta ndrine taha towodau badeh, i buku badih atehei nah udu ndrinen eme len. Nyara badih doh badeh, “Kandriyen ta ndrine ndramak towodau.” Ya, nyara nah doh badeh, “Kandriyen ndra-in.” Na len kandriyen ndra-in asahan i tinan, iy badeh, leheya kandriyen ndra-in asahan, iri aloh imek. 16 Ado mwan ma badih ta Kindrei badu hawek handru, kora-on ado katawi iri kandriyen ta wasai badeh, kawendreyani ado. 17 Iri lakou hawe ndramas mwasin labai mari badeh, marakon badu kandrah eme andri. Ya, tama taha Kindrei badeh, mesekei lomadan marakon badu kandrah, iy le amwenen badeh, suni iri lakou marakon mwasin doh eme andri tataha. Iy badeh, mwasin labai ma iy batobolowe kandriyen tan bala bame bwe, buku ari lakou, an bwidi malawi iri asahan, an anya ya tobolowe malawi iri lakou a lawe ano a mo-on ja. Arile Kindrei badeh, batobolowe iy bala bame bwe, iy ta udu le buku doh. 18 Na budon tan le amwenen, iy bwidi taha asahan nadun na sahou tan handru, ma iy asahan tama taha. Handru, iy atehei sahou tan eme tataha, eme ma taha atehei budon tataha mara-ei in le tan. Iy amekes i buku doh, ta taha kare bwele-e lakou marakon iy ndramesekei.
Buku taha atehei budon tataha handru in ta Kindrei, idah kameh taha amekes iri kandriyen mwasin ale
(Kalan 1:19–5:6)
Taha badeh, kanuhun sahou ma ka-en hamon ta aliy ale.
19 Ya aha badeh, kabudon kamwenen! Aha nadu tine mwan ma badih tek handru, aha katehei ndranye aha suwi ta anuhun sahou. Arile, aha sabobo-ap ta amekes sahou. Ma ndrine aha ale satowodau ta losen suwi. 20 Tasah, kandriyen ta losen udu bolo ndrine taha mwan ma badih badeh, bamesekei kandriyen mwasin Kindrei aso-ok bwe. 21 Eme ma, aha badeh, karuwani iri kandriyen ndra-in ta karei ma lomondra ndra-in nadah asahan solo-an labai udu bolo ndrine iri mwan ma badih. Ma aha katehei aha ka-au ka andri mara-ei ta akohok sahou nane Kindrei ndratahiy udu bolo ndrine aha. Sahou le doh badeh, winiyan andrei malawi aha mara-ei eme hamon ja.
22 Jo asehek sahou boto-on ewek taha badeh, i buku doh: Kora-on aha anuhun sahou doh laleyah. Aha badeh, ka-en hamon ta aliy ale. Buku bwe eh, badeh, aha ndrawendreyani aha le ai. 23 Tasah, are mwan o badih iy anuhun sahou ta Kindrei doh, ya iy ba-en hamon ta aliy bwe, iy badeh, i buku ndramak anyolom madan amwenen udu bolo torowe. 24 Iy anyolom madan amwenen mara-ei, arile iy ili hamon ja amekes lakou i le buku iy amekes bwena ndra-au, ya se luwen bwe, iy badeh, ndramani kone madan nane udu bolo torowe ja ai. 25 Arile, sahou ta Kindrei udu bolo tarou malen ma hawe sahou mwasin badeh, amekes gok ta atokos kandriyen ndra-in iu, ma bwidi taha ado mwasin. Batanau doh badeh, amwenen mara-ei. Buku taha mwan o badih anyolom batanau doh amwenen ma a-en hamon ta sahou tan handru, ma Kindrei kameh winiyan amekes iri gok mara-ei tiri mwan o badih nane asahan mwasin labai. Ma iri mwan ma badih buku doh badeh, iri winiyan banuhun sahou laleyah doh bwe, ma maniy suwi labai. 26 Buku none ari mwan o badih iy anya, iy lau ta Kindrei ma iy atudun iy handru, arile iri batondrok boho iri bamwenen bwe, iri ndrawendreyani iri amwenen, ya eme ma budon hawe salom tiri doh badeh, ari moson ta aliy bwe. 27 Tasah, kandriyen ta lau ta Kindrei badeh, amwenen mara-ei, ma ari lomondra ndra-in bado budon ta tama taha Kindrei bwe, i buku doh: Taha badeh, kabudon ma katondrok iri nah, tama iri ma tine iri ndramak, ma hawe iri badih, udu iri ndramak, ma kaseben iri ta bwese maha-an tiri. Ya, lakou ari ale i buku doh, taha badeh, kantondrok tekedek tataha kamwenen, idah kameh kandriyen badu kon munyak winiyan baruwi taha bala bolo ndraka-an bwe.