2
Taha badeh, kamekes kandriyen mwasin ki ta lau marakon
1 Aha nadu tine mwan ma badih tek amwenen, aha ndratehei budon taha ndra-en ta tinan tataha Laban Jises Krais. Iy Laban ta lakou mwasin mara-ei badu kandrah. Eme ma, kora-on aha kabo gok ta amekes kandriyen mwasin ili le tiri lau nyara iri tinan, ma aha atehei kona aha ili tiri mwan ma badih nyara iri bwe. Aha badeh, kamekes kandriyen mwasin randra le kili tiri mari. 2 Buku none ari ndramak asini awin moroyan, ya iy anyuhi kandro minen ari i bolo bek nyikilikin iri amekes na bek, ewek bolo asiu ta ndrahu tukum taha, ma hawe ndramak ari, awin tan ndraka-an, ewek bolon ale. 3 Ya, aha kameh amekes mwasin i ta ndramak nane awin tan moroyan ma bek nyikilikin udu kandro minen kameh anya, “Ou ame manyah ado bada bwabwai mwasin dah.” Arile, aha kameh tiye i ta ndramak nane awin tan ndraka-an, anya, “Ou ala ales an kabwek kodo-on op, bwe ou ame manyah an bada kamus mirihik ta katik kada-ah.” 4 Buku aha amekes kandriyen i buku doh ta bokoro-ei i ndramak nane tan ari lakou bwe, badeh, aha ndrabwidi kandriyen ndra-in kabwe. Idoh i buku aha ndralebelei iri lau ta Kindrei rayah na budon ndra-in taha. Aha badeh, babudon anya iri ale buku aha, ma aha amekes kandriyen mwasin i buku doh i tiri, bwe. Aha le amwenen badeh, aleben aha ta anuhun sahou tiri, ma idoh badeh, bamwenen bwe.
5 Aha nadu tine mwan ma badih, aha kanuhun. Kindrei badeh, ndralebelei iri lau, tiri lakou bwe badu kon munyak badeh, ta iri kameh are mwasin labai ta budon handru in ta Kindrei. I buku le Kindrei bwena mene ndratandrakan i buku doh, iri mwan ma badih doh atehei budon tiri in tan handru ma aseken iy labai, iy kameh bwidi iri asahan lau tan, ma iy atondrok iri. 6 Arile, aha badeh, atehei bwilima ili tiri lau nane, tiri lakou bwe. Aha kabudon doh kamwenen. Are lau handru bokoro-ei aha ma atehei maha-an ewek la-u aha ma aluwi aha ala ta mada sahou? Iri le nadu batun badeh, amekes iri lakou doh. 7 Ya, Kindrei ale badeh, ndratehei nyara Krais mwasin labai ndra-en la-u aha. Arile, are lau handru bobose nyara Krais? Iri nadu batun, iri ateu luk solo-an udu mine iri.
8 Buku aha a-en hamon ta batanau ari le mwasin nane Kindrei atehei eme tataha anya,
“Ou aseken iri lau ari ari badu hawem, i le buku ou aso-ok ou le,” Lebitikus 19:18
idoh mwasin. Jo ari sahou ta aliy bwai. 9 Arile, buku aha apwai iri lau ta Kindrei a rabuk doh, rabuk doh, eme ma aha atondrok iri mwan ma badih nane tiri luk solo-an ai, ya aha atehei kona aha ja ili tiri lau nane tiri lakou bwe, badeh, aha ndrabwidi kandriyen ndra-in kabwe, ma aha ale badeh, ndrabokoro-ei batanau ta Kindrei. 10 Ya, sahou dah handru. Tasah, buku ari ndramak anya, iy in hamon ta sahou batanau mara-ei, arile iy bokoro-ei sahou batanau ari le udu bolo oro sahou batanau ta Kindrei mara-ei, Kindrei anya iy badeh, ndrabokoro-ei batanau mari ndrandra-i kabwe. 11 Taha ndratanan, Kindrei badeh, asehek anya,
“Aha tasou badeh, samekes kandriyen ta karei.” Eksodus 20:14; Dutoronomi 5:18
Ma iy ale asehek anya,
“Ou sadai ndramak samak.” Eksodus 20:13; Dutoronomi 5:17
Ya, i buku ou bamekes kandriyen ndra-in ta karei bwe, arile ou adai ndramak ari imek, ou amwenen badeh, asahan ndramak ari ndra-in labai ta bokoro-ei batanau ta Kindrei. 12 Ya, aha kasehek sahou mwasin, ma ka-en hamon ta kandriyen mwasin, tasah Kindrei kameh edeu lau mari ala ta mada sahou, buku le iy mene ndrabatanau taha bwena i buku doh, “Aha badeh, kaso-ok iri mwan ma badih rayah ja, i buku ou aso-ok ou le amwenen.” 13 Tasah, i buku ari mwan o badih, iy batikisi iri lau rayah ja bwe, udu bada len Kindrei atehei iy ere ta mada sahou, idah kameh Kindrei winiyan batikisi iy bwe le. Arile, are mwan o badih, iy abudon iri mwan ma badih rayah ja, ma amekes kandriyen mwasin ili tiri, iy amwenen kameh winiyan eme len ta mada sahou. Tasah, kandriyen ta tikisiy badeh, udu bwele-en labai ja, ta kandriyen ta adeu maha-an i la-u ndramak.
Buku none kandriyen ta budon bamekes lahou mwasin bwe, iy badeh lakou laleyah
14 Aha nadu tine mwan ma badih ta Kindrei, buku ari taha anya, “Jo atehei budon tek mara-ei badeh, in le ta Jises Krais,” arile iy badeh, bamekes kandriyen mwasin ma ba-en hamon ta budon handru bwe, eme budon handru ta i ndramak doh badeh, ari moson bwe. Sebwe iri budon handru buku doh badeh, winiyan basebenei ndramak ales udu mada sahou ta Kindrei hamon kameh eme bwe. 15 Buku ari lau ta Kindrei, iy badu hawe ado, iy tan ari kalawin ma nan nyamon bwe, 16 ya ari badu bolo ado badeh, tiye i tan i buku doh, “Kindrei kanyosowani ou ma iy kudu hawem! Ou satikisiy labai, ndrinem kudu le kudu, Kindrei winiyan sebenei ou, iy winiyan silahei tam kolau mwasin ma nam nyamon mwasin.” Ya, sahou laleyah doh kameh baraseben oro barala buku sah handru bah? 17 Kandriyen ta budon handru tataha badeh, buku le aliy ale. Buku budon taha handru baluwi budon taha ta amekes kandriyen mwasin ma aseben iri mwan ma badih rayah ja bwe, ya budon taha handru badeh, kameh ari moson bwe, i lakou laleyah. Ya, buku taha bamekes gok mwasin ta aseben ndramak ari ja bwe, budon tataha badeh, ari katin bwe.
18 I buku ari ndramak anya, “Lau rayah badeh, tawi ihis budon handru, arile lau rayah ja badeh, amekes kandriyen mwasin. Sebwe budon ma la-uh doh i le randra.” Jo kasehek ki buku doh, “Buku none ou atehei budon tam boto-on i ta Kindrei, arile ou tanam ta amekes kandriyen mwasin bwe, ki buku sah handru jo ki tanan kandriyen ta budon tam in ta Kindrei nane? Arile, jo anya kamekes kandriyen mwasin ale, ya kandriyen mwasin doh kameh leheyani budon tek boto-on in ta Kindrei nane.” 19 Buku none ou badeh, atehei budon tam anya, Kindrei badeh, ari le. Mwasin. Arile, badeh, lakou laleyah. Tasah, iri malawin ndra-in abudon buku aliy ale, ya iri anoh ma totoreh, tasah Kindrei kameh atehei iri ala ta mada sahou, ma iri kameh ala bolo jih. Ya budon tiri le nane winiyan bamesekei iri asahan mwasin ta mada Kindrei bwe. 20 Ou lolo-ou ndramak, buku ou atehei budon tam le in ta Kindrei, ya ou bamekes kandriyen mwasin Kindrei aso-ok ja bwe, budon tam badeh, ari moson bwe. Sebwe ou anya atanam le ta kati sahou dah nadeh? Mwasin ta ou anuhun sahou badu bolo buk ndrabun asehek i buku doh: 21 Bwena mene tubu taha Abraham atehei nadun Aisik i bwele-e mada koto-ok anya ki nyara salom ki ta Kindrei. Eme ma, udu kabatana doh badeh, Kindrei anyolom lahou tan, ma iy aloh Abraham ndramak mwasin labai ta madan. 22 Aha kanyolom kamwenen. Budon hawe kandriyen ta Abraham badeh, asahan ari le. Budon tan mara-ei badeh, asahan eme lewan, in hamon le tiri kandriyen mwasin iy amekes. 23 Buk ndrabun badeh, asehek i buku doh,
“Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.” Jenesis 15:6
Ya Kindrei ale aloh Abraham badeh, i buku, “Kawas tan handru.” Ya, kati sahou “atehei budon tan mara-ei in ta Kindrei” doh badeh, asahan eme lewan ta kandriyen nane Abraham amekes i ta nadun Aisik. 24 Ya idah aha ndratana aha, Kindrei basehek anya ndramak kameh asahan mwasin na budon tan le bwe, iy badeh, aso-ok budon tam hawe kandriyen ta gok tam ale kudu mwasin ta madan.
25 Buku Rahap badeh, badih ta madasarah, iy tone uru lau ma la-uh mene Josuwa suni uru ala ta anyolom bolo kon Jeriko, ya Rahap leheyani uru a hamon a san ari ja. Ya idoh le, iy asahan mwasin na kandriyen tan ta tone uru lau ma la-uh nane doh. Ya Kindrei bwetenei kandriyen ta Rahap nane, ma iy aloh iy badih mwasin ta madan.
26 Taha ndratanan, buku malawi taha ruwani bada taha mwan o badih, badeh basa taha le kameh erah udu api. Buku le, are mwan o badih atehei budon laleyah, ya budon tan doh bamekes ari kandriyen mwasin bwe, budon ta iy mwan o badih doh badeh, ndrasahan i buku bada kei, kohan aliy bwe.