1 Udu bolo len tiri Isra-el bwena, Kabin badeh atondrok kon tiri. Eme bwidiy nyamon winiya iri bwe. Eme ndramak ari badu Betlehem, udu loboho Juda, lokowaniy iy, udun ma nadun uru ma la-uh, iy andrei oro au ala loboho kon tiri Mowap. 2 Nyara ndramak doh badeh Elimelek, nyara udun Nawomi; nyara nadun ma la-uh badeh Malon uru Kiliyon. Oro badu boho kamen ta Eparata.

3 Oro ado, ano badeh, Elimelek imek, nyau tan hawe nadun uru ma la-uh ado ai. 4 Nadun uru ma la-uh badeh atasou, uru andrei butuhu Mowap ma la-uh. Nyara uru badeh Opa uru Rut. Oro manyah ado Mowap badeh, winiya jaha ma ronoh. 5 Ano badeh Malon uru Kiliyon amak. Eme tine uru Nawomi le ari udu ai, udun ma nadun uru ma la-uh ndramak.

6 Nawomi udu Mowap badeh iy anuhun Laban atehei nyosowan i tiri lau tan i ta nyamon tiri. Eme Nawomi alokou iy ma nyanan uru ma la-uh ala hawen ta ala kon tan Juda. 7 Oro tuwiy lokou toro ma oro adek au ala hamon ala Juda.

8 Oro ala ado ndrukulu san ranah badeh, Nawomi asehek i ta nyanan uru, anya, “Ah kala hamon ka kon ta ah. Ma ah kala kado hawe tine ah. Laban badeh kameh amekes mwasin ewek ta ah buku ah amekes mwasin ndrame tek, ma toro ma taloh ndramak. 9 Ma i dah kameh Laban katehei ah ka asiu ja.”

Nawomi eme tawi uru ma uru taku a ta ndrelen. 10 Uru ame tiye i ta Nawomi, “Bwai, aru kameh an hamon tam ala hawe iri lau tam.”

11 Nawomi anya, “Bwai, ah nadu nyanak ma la-uh, ah ka hamon ai. Buku sah ah anya kame hawek nane? Naduk ndraheh ja kameh ah katasou ka turu? 12 Ah kala hamon ai. Jo winiya bala tasou ja bwai, buku jo ki tasou ja na ben kameh, jo katuwiy la-uh nah mwan ja? 13 Ah kameh atondrok uru a tinan, ano, ah barala turu? I dah kameh bwidiy ah winiya batasou bala ta ari mwan ja bwai! Ah naduk badih ma la-uh, ah tana ah. Laban ndratehei konan ndrame tek, eme ma jo tikisiy ah ma la-uh en!”

14 Eme badeh uru ma la-uh atehei boho uru i ta ndrelen ja. Ano Opa tawi nyanan Nawomi ma iy eden. Ano ma iy iu i hamon. Arile Rut badeh bwalen ta ili hamon.

15 Nawomi eme tiye tan, “Rut, kayom ndra-au ndrala hamon ndra hawe lowan oro ai, ma hawe kindrei tan. Ou ala hawen ale!”

16 Eme Rut anya, “Ou sasabolon jo, jo badeh anya kewek hawem; buku saba kon ou ala aliy, jo kameh ewek ale. Saba kon ou ado aliy, jo kameh udu aliy ale. Buku lowam oro, badeh kameh lowak ale; buku Kindrei tam badeh, kameh Kindrei tek ale. 17 Buku ou amak ado heh, jo kameh imek udu hawem ale, ma ahiy jo udu kon nane jo imek udu aliy. Jo bwalek ari lakou kabwidiy ndrokowa talu kudu aliy. Imek le badeh kameh bwidiy ndrokowa talu ai. Jo tandrakan en, buku jo ba-en hamon ta sahou tek nane jo asehek bwe eh, i dah kameh Kindrei amekes se lakou maha-an eme tek.”

18 Nawomi anyolom Rut badeh winiya baruwaniy iy bwe, eme iy basehek sahou ja bwai. 19 Eme uru ma la-uh adek ala asos Betlehem.

Uru asos le badeh, mani iri lau atur, eme iri badih anya, “Kede-eh Nawomi handru deh?” 20 Nawomi tiye ili toro anya, “Ado saloh jo Nawomi.*Nawomi moson tan i buku doh, Jo badeh, mwasin. Ado kaloh nyarak badeh Mara! Mara moson tan i buku doh, Jo badeh ndra-in. Tasah Kindrei, boto-on marakon udu tan badeh, bwidiy tikisiy tinan labai eme tek. 21 Jo mene iu badeh, lakou tek solo-an labai. Ano Laban anya kandrei jo keme hamon ja badeh, tek ari lakou ja bwe. Ado saloh jo Nawomi ai, tasah Laban boto-on labai badeh, atehei maha-an solo-an eme la-uk.”

22 Nawomi uru nyanan Rut, i badih badu Mowap, ame hamon kon ta Nawomi ja. Uru asahan Betlehem badeh, udu bada len tiri ta akohok nyamon iri aloh bali, badu bilin tiri.