1 Bowas badeh iy nadu batun, iy badeh badu hawe udu Nawomi bwena Elimelek. 2 Len ari badeh Rut tiye i ta Nawomi i buku doh: “Jo anya kili bolo bilin anya kanyidiu na talu bali, iri lau mwan nane mwetehei, erah in andri, buku ari ndramak aso-ok jo kanyidiu bali ki-in hamon tan.”

Nawomi anya, “Mwasin, ou ala.”

3 Eme Rut edek iu ili bolo bilin. Iy edek in hamon tiri lau ta amondroh ma iri lau ta atukum bali. Iy anyidiu nan iri bali erah in andri. Iy anyidiu ili, ili, eme ma iy i tanan bilin dah ta ndramak ari nyaran Bowas. Bowas badeh, badu boho kamen ta Elimelek.

4 Bowas udu Betlehem eme anya katou oro lau tan. Iy eme isos, iy anyolom oro le badeh, iy anya, “Laban udu hawe ado.” Eme oro lau tan tiye sahou sekesek i tan anya, “Laban atehei nyosowan tan ewek tam.”

5 Bowas eme ndremenya ndramak ta atondrok oro lau tan, “Are badih bihin kodo-oh?” 6 Eme ndramak ta atondrok oro lau tan anya, “Iy badih bihin kodo-oh, iy badu kon Mowap. Iy in hamon ta Nawomi, uru ame dah. 7 Iy eme ndremenya jo anya, iy aso-ok ta edek in hamon tiri lau anya kanyidiu nan bali. Iy anyidiu na mandraben eme isos nane dah, eme i dah iy baramunyau adeh, in bolo mandron kodo-oh.”

8 Eme Bowas tiye ta Rut i buku doh, “Naduk badih, ou anuhun, jo anya kabatanau ou. Jo bwalek ou ala anyidiu bare bali badu bilin ta ndramak ari ja. Jo aso-ok ou anyidiu bare bali badu dah le kabwai. Ou ado, ma ou abo gok hawe oro badih tek kede-eh. 9 Ou anyolom bilin, ma ou an hamon toro. Buku oro anya katukum bare bali badeh, ou ado hawe oro. Jo ndrabatanau oro lau tek ale ta oro sanyolom ndra-in sawek tam. Buku balem anya kamar ta gwa, ou ala a-un gwa udu bolo sabok oro lau tek ndrasuniy.”

10 Ano Rut atubwa bwilindru-un ma bwilin ili andri ta munyak, ma iy anya, “Jo badih leheleh labai, buku sah ou anyolom jo, ma ou amekes mwasin eme tek?”

11 Bowas tiye i ta Rut i buku doh, “Iri lau tiye tek badeh ta lakou marakon ou amekes an hamon ta nyanam Nawomi udu ndrabada len udum imek. Jo tanak ou ruwaniy tamam uru tinem, ma kon tam amwenen; i buku sah handru ou ame dah manyah ado bolo kon rakon ja, lau rayah ja, ou bala tanam iri bwena bwe. 12 Laban Kindrei tiri Isra-el kasihinei ou, ta iri lahou ou ndramwesekei. Ou ado bahandran ma iy kameh turukiy ou udu mwasin, i buku nadu kakaro udu bahandra bani tinen.”

13 Rut anya, “Ou badeh amekes kandriyen mwasin labai eme tek. Ndramak tinan, ou ale batanau jo tiri sahou mwasin. Jo badih mwasin bwe, bala buku oro badih tam kede-eh. Arile ou badeh asehek sahou ta batanau eme tek ma bwidiy ndrinek udu mwasin ja.”

14 Oro anya kaimon nyamon ai. Bowas eme aloh Rut anya, “Ou ame dah. Ou aimon raon jabi ramen, ou atehei jabi ramen kili bolo wain, ou aimon.” Rut eme manyah udu andri hawe oro badih ta lahou ta Bowas. Bowas eme atehei na Rut bali raon iri ndraturuhiy le. Rut andrei ma iy aimon ili ma ndrinen irek, arile nyamon tan raon erah. 15 Rut suriy iy, iy edek ili bolo bilin le badeh, Bowas eme tiye toro lau tan anya, “Iy kudu gwek kanyidiu kabede iri rabos, rabos nane in andri kodo-on! Ado sabolosen sala tan. 16 Ado kasoh raon bare bali badu bolo iri nane ndrabawei ndrarabos, kili tan. Ma jo bwalek ado sasehek iy.”

17 Rut badeh anyidiu bare iri bali mari ili le se isos an amai. Iy tukumwiy marakon ili le se ano, iy ubwiy bare iri bali dah, eme maha-a salin asahan kilo ma ronoh.

18 Iy eme bwese-ei ndrom bali tan, ma iy edek iu ili bolo kon tinan ma iy leheya ili ta nyanan, ta bare bali sabe iy tukumwiy, ma iy leheya bakatikibwah tan ili ta nyanan ale.

19 Nawomi ndremenya iy, “Ou nane atukum bare bali badu loboho heh le? Bilin tare lau handru ou nane abo gok an bolon? Kindrei atehei nyosowan kili ta ndramak nane atou ou ma sebenei ou!”

Rut asehek ili ta Nawomi anya, “Jo nane ibo gok in bolo bilin ta ndramak ari nyaran Bowas.”

20 Nawomi tiye tan, “Laban kanyosowaniy iy! Laban winiya bamaniy tandrakan tan i tiri lau ndramak ma iri lau bamak bwe le.” Eme Nawomi asehek ja, “Iy ndramak badeh badu hawe to handru en! To badeh boho kamen ari le. Iy kameh atondrok talu.”

21 Ano Rut anya, “Bowas tiye tek i buku doh, jo badeh kibo gok hawe oro badih tan winiya le gok ta atukum bare iri bali marakon ano.”

22 Nawomi tiye Rut, “Nadu nyanak, i dah kameh kandriyen ndra-in buku ou ala abo gok ala bolo bilin ta ndramak ari ja. Kora-on lakou kasahan tam ja. Mwasin ta ou abo gok le hawe oro badih ta Bowas ai.”

23 Eme Rut ibo gok udu le mirihik hawe oro badih ta Bowas. Oro atukum bare bali ili, ili winiya le bare iri bali ma wit marakon ano. Eme ma iy in hawe nyanan udu gwek.