2 Tesaronia
1
Vuꞌa Anejijihina
Poru ho Siruvenasi ho ꞌee Timoti ijipo sosia kaꞌene Tesaronia Godi núni Oma ꞌee Natohwa Jesu Keriso puni vaji hijujihi punaꞌe pasikaho veju. Godi kaꞌene Omijine ꞌee Natohwa Jesu Kerisoꞌo maiji vwihaniiꞌina ꞌee matauviꞌiniji vajihama.
Kerisora Roꞌamaji Eha Kaꞌene Mihunijina
Vwehu núne nú naꞌia mapokaꞌe jonijihunaꞌe Godi teimani ꞌwavura. Ijihuni maijaho joni nimaa roijaho nihoꞌo emarena paranu. ꞌEne jara oja ꞌekaravujaho ꞌuꞌo nihoꞌo emarena paranu. Ijihuni maijaho jara nimaa rone ꞌee ea ꞌahopo ja siseꞌi ꞌahiuꞌe haha hinavuri veijino kirasahe namiju jihunaꞌe nú Godoni sosia vajakaho ja rone taꞌarorahe ꞌwaravura. Jara iki sisei hijujara najuhujaho ja Godoni ari vahuna arerina ꞌee Godoni ꞌotua aririji najuhu. Ijihuni mai jihunaꞌe ja sisei hiju. Godiho ariri jihunaꞌe ea irahipo ja siseꞌi ꞌahiujija Hu ꞌuꞌo pu siseꞌi ꞌahihuna. ꞌEnaꞌomo túnaꞌi Jesu kaꞌene Natohwijara Godoni ꞌona ojiꞌina mamaꞌina puꞌúmo akúpi ꞌahi rene roꞌavari veijino núni ahisinijaho piꞌonave nú ja puꞌúmo ꞌojuta hwene hihuna. Pu vena harura vaji ea kaꞌene Godi pahena pakame ꞌee núni Natohwa Jesuni vuꞌa maiuꞌina pahene vejajihi eha mihuna. ꞌEne pu eha sisea kaꞌene apeꞌavajaho nihoꞌo aneja púsa paꞌanaꞌe apene ꞌee Natohwi jihuni unaꞌa ꞌee Huni hanajiꞌini jihuni harura rora mahoꞌo ranave paꞌarehuna. 10 Vea kaꞌene Hu kúꞌo ꞌunama roꞌamajaho ea mahoꞌo kaꞌene Hu nimaa rojiꞌinijija ꞌee Huni ea arimai jihipuꞌúmo Hu taꞌarohe ꞌee tataꞌora pihuna. Ijihuni maijaho nú raka kaꞌene ꞌwaravajaho ja nimaa rojara. 11 Ijihunihahi nú ꞌuꞌo naꞌia mapokaꞌe joni siporua ꞌojura. ꞌEjakame núni Godijara ja ꞌumenajaho arerina ꞌiahuna. ꞌEne uneunecha mapoka kaꞌene mamaa reꞌavarono ja ura renaujija rehuna ꞌee raka kaꞌene nimaa rojujija harurijiꞌi rehuna. 12 Ijihunaꞌe núni Natohwa Jesuni ihijaho joni vaji taꞌarohe ꞌee Hu ja taꞌarorahuna. Ijihuni maijaho núni Godi ꞌee Natohwa Jesu Keriso maiji vwihanúara.