2 TESALONAIKA
KUIMP TEPA IK KɄⱠ
Ya Buk Ei Nga Puⱡ Ei:
Pol ndi, mon ei ropa kʉn, mondpa pili wamp mat, mbun mindil tʉtʉng mbʉ, nimba ronduⱡ mondpa, wote enimp mundi namʉndʉk kongun iteing nimba, man ngurum. Nuim yant omba ei nga ik mat, ⱡawa purum mbʉ, nimba tʉpa kun mundrum.
Ya Buk Ei, Nam Ndi Rurum:
Ya buk ei, Pol ndi, mon rurum.
Mon Ropa Nam Ngurum:
Pol ndi, mon ei ropa, Got nga rapa tenda ila wamp met Tesalonaika kona ila aldpa ngurum.
Ui Nant Ila Rurum:
Pol ndi, Korin kona ila moⱡpa, mon akil tepa ropa, Tesalonaika wamp ngurum. Ei Kraist metʉng ei kʉn, mbuldung orunga pana 51 mana 52 ila mon kʉⱡ rurum.
Ik Ronduⱡ: 2 Tesalonaika 3:5
Nuim ei ndi, enim nga numan orunga, tʉpa kun mundangga, Got nga wamp kaimp kul uⱡ mbʉ kʉn, wote Jisas mbun titim mel ku, enim mbun tʉnmin ei pilik, mbi nduk kʉn, ronduⱡ mundʉk muⱡʉi!
IK PENG KɄⱠ
Rump
1:1-1:2 - Pol nga mon akil tepa ropa, Tesalonaika wamp kʉⱡ ngurum
1:3-1:12 - Jisas yant omba wamp kʉmp tʉmba
2:1-2:12 - Uⱡ kit etʉm wu
2:13-2:17 - Enim ronduⱡ puk, Got kʉn muⱡʉi
3:1-3:5 - Tʉn nga nʉk, Got kʉn atinga rundʉi
3:6-3:15 - Wamp pora kongun itʉi
3:16-3:18 - Na nga memp ik ei
1
Pol Nga Mon Akil Tepa Ropa, Tesalonaika Wamp Kʉⱡ Ngurum
1-2 Tʉn, Pol Sailas kʉn Timoti kunda moⱡpʉn, mon ropʉn, enim Got Tipam ei kʉn, Nuim Jisas Kraist raⱡ nga wamp met Tesalonaika Got nga rapa tenda ila mormin wamp mbʉ kʉn, mon rop ngunmʉn. Tʉn nga Tipam Got ei kʉn, Nuim Jisas Kraist raⱡ nga wamp poⱡ ti uⱡ na, moⱡpa kundi uⱡ kai mbʉ, enim kʉn piyangga!
Jisas Yant Omba Wamp Kʉmp Tʉmba
Angmʉn, ui mbila rʉk rʉk, enim nga nimbun Got kʉn angge nimin mint i itmin ei, tʉn kapⱡa itmin mint. Nambuⱡ emel, enim nga mondpa pili orunga kanmin ei, ronduⱡ puⱡnga, wote wamp numan ngui uⱡ ei, enim wamp tenda tenda nimba ei kʉn tepa oⱡa omba ou ndunʉm. Ei nga nimbun, tʉn ndi, Got nga rapa tenda ila wamp mbila enim nga kaip nʉndʉtmin. Ei, enim akup ui mbila rʉk rʉk, uⱡ kit onum mbʉ, wangga nʉk pilik kelik, mindil tʉk mondpa pili uⱡ ei, ronduⱡ mundʉk amʉnmʉn. Ei nga, tʉn ndi, enim nga kaip nʉndʉnmʉn.
Enim nga enmin uⱡ kʉⱡ, Got ndi, tʉn orunga mel ndupa, elim ndi, tʉn apʉrpa tʉpa, uⱡ kun mbila mint tʉpa mundrum. Enim mindil tʉk, wote Got nga mbi paka rondʉnmin uⱡ ei ndi, enim elim nga wamp tʉpa mumuk rui uⱡ mbʉ enim ngomba ei nga, enim etpa mura mondnʉm. 6-8 Got ndi, uⱡ kun kai ti etmba ei, enim mindil ngung wamp mbʉ, Got ndi, wamp mbʉ, punt ropa mindil ku ngumba. Wote, enim nga kep, tʉn nga kep, mbun tʉtmʉn uⱡ mbʉ tʉpa mundpa, numan kai mbʉ ngumba. I etmba uⱡ ei, tʉnggʉt Nuim Jisas, elim nga anggelo ronduⱡ pi mbʉ kʉn, muⱡ kona molk, ekit wangina, ndip anmbil mam ti ndi omba, Got mondʉk pili napʉtmʉn wamp mbʉ kʉn, omba Nuim Jisas nga Rʉnang Ik Kai ei, teng ndui nandʉrmin wamp mbʉ, ndip ndi nangga, mindil mint nok muⱡing. Mindil ting ei, uⱡ nga kʉnt nga pepa mint mba. Nuim ei nga rʉngaⱡ ronduⱡ pi tem ila nondpa, muⱡi nʉmbʉⱡing. 10 Nuim Jisas yant omba, Got nga wamp mbʉ kʉn, mbi ou tʉmba om ei kʉn, elim nga mbi paka runding, mondpa pili wamp mbʉ, numan kai pilik ambulk palk muⱡing. Enim kunda ila muⱡing ku, nambuⱡ emel, tʉn ndi, Rʉnang Ik Kai nimbun ngurmʉn kʉⱡ, mondʉk pilik pep rorung ei nga.
11 Ei nga, nimbun enim nga rʉk rʉk atinga mint rondʉrmin. Got ndi, enim wi ropa titim ei, elim ndi, enim pek molk, kai mundeing nimba pitim ei mel pek muⱡʉi! Elim nga ronduⱡ ila, enim uⱡ kai mbʉ, itmin nʉk pilik, numan ngurmin uⱡ mbʉ, elim ndi, etpa ronduⱡ mundangga. Wote, enim Nuim Jisas kʉn mondʉk pilik, uⱡ mat itmin nʉk pilʉng mbʉ, elim ndi, etpa kapⱡa indangga iteing. 12 I etʉk eng uⱡ ei ndi, enim Jisas nga mbi paka rundangina, wote elim ndi, enim i ku etmba. Tʉn nga Got kʉn Nuim Jisas Kraist raⱡ nga wamp poⱡ ti uⱡ mbʉ, enim kʉn kan piyangga!