1-2 Nuim Jisas Kraist yant wangga, tʉn mondʉp pili wamp mbʉ pora, elim kʉn mbun mou tenda ila muⱡmin uⱡ ei, angmʉn, na ndi, enim ronduⱡ mundʉp waldʉp nʉnt. Ei, enim wamp na ti ndi, ik pai nomba muna, wote tʉn ndi, ya mon rop ngurmʉn nimbila nga tila ik ti pepa mel, Jisas nga omba ui ni kor, ekit om nʉk pilik, enim nga numan orunga mepa ʉndi nʉndangga, mon! 3 Wamp ti, kandʉk kont tangina, enim tʉpa, tiki pindi nʉpʉndangga, mon! Jisas omba ant ei, unt ekit ui nʉwangga, wamp minal Got kʉn tʉk mbuⱡ ngangina, wote uⱡ kit mbʉ nga puⱡ wu, ndip kona tʉmba wu ei omba, ui ei kʉn, ku mot nimba. 4 Ei kʉn ku, wamp nga uⱡ kai mat etʉk, Got nga mbi paka rondʉk eng uⱡ mbʉ, mon nimba, kumba pendʉmba. Elim nga mbi paka ropa mepa oⱡa mba, wote Got nga manga wingti ou ila mukʉr mba, elim Got mor nimba ila moⱡmba ku.

5 Enim pilik mbi ndonmin muna mon? Ya uⱡ mbʉ, na enim kʉn rʉp rop murmʉn ei kʉn, enim kundʉp nʉmp pora ndur. 6 Uⱡ kʉⱡ, akup ui ila ekit oⱡnga ei, wote mel ti ndi imp monum ei, enim pilik mormin. Wu kit ei, Got ndi, ui ngum tila mint mot nimba. 7-8 Uⱡ kit mo ropa tetʉm mbʉ, kongun elinga mel enim. Wote, nʉnt uⱡ mbʉ, unt ekit ui nawʉmba, imp monum wamp ei ndi, ambuⱡpa mint muⱡangga mba, wu kit ei, tʉnggʉt tʉk mundung ei kʉn, wu kit ei, kuimp tepa mot nangga kʉn, wote Nuim Jisas yant omba. Wu kit ei, Nuim Jisas elim nga keta muⱡnga ei ndi, ropa kondpa, wote elim nga uⱡ rʉⱡang pi mepa om ei ndi, wu kit ei, ama uⱡ nga kʉnt nga ropa etpa, kit mondʉmba. 9-10 Wu kit ei, Seitan nga ronduⱡ ei, tʉpa mepa omba, uⱡ rʉpndi elpa elpa mat etpa, wote wamp kit muⱡing mbʉ, uⱡ rʉpʉndi kol ropa mbʉ, ou ndupa ora ndumba, wamp kit muⱡing. Ei nambuⱡ emel, Got nga uⱡ kupa, en enim etpa tʉmba uⱡ kun mbʉ, numan nguk rukʉr ti natʉtʉng. 11 Uⱡ puⱡ ila nga, Got ndi, uⱡ kol mbila pep rormʉn wamp mbʉ, pilik kelik pep reing nimba, ronduⱡ ti, wak rondʉmba. 12 Itangga kʉn, punt ropa ngumba uⱡ ei, uⱡ kit mbʉ, numan nguk pilik kelik eng wamp mbʉ, kit muⱡing.

13 Angmʉn, Nuim ei ndi, enim numan ngorum ei nga, tʉn Got kʉn rʉk rʉk angge nʉtmin. Ei nambuⱡ emel, Got ndi, etpa ti uⱡ ila, enim kuimp tepa rukʉr titim. Wote, enim nga mondpa pili orunga mek puk, uⱡ kupa mbila tetʉng ei, Muⱡnga Wingti nga ronduⱡ ila, enim etpa, Got nga wamp wingti kʉⱡ, mondʉmba pilpa itim. 14 Tʉn, Got nga Rʉnang Ik Kai ei, enim nimbun ngurmin nila, Got ndi, enim wi ropa titim. Wote, Nuim Jisas Kraist nga uⱡ eng nui kai tetʉm mbʉ, enim elpa elpa mok rok, tʉk ʉmbʉⱡeing nimba itim. 15 Ei kʉn, angmʉn! Ya tʉn mon rop ngunmʉn ila kep, wote unt ik mbo inditmin nimbila kep, en enim nga mondpa pili orunga, ronduⱡ puk molk, uⱡ kupa mbʉ, ambulk gi ndʉi!

16-17 Tʉn nga Nuim Jisas Kraist elim kʉn, Wuta Got tʉn numan ngumba. Wote, elim nga wamp poⱡ ti uⱡ ila, tʉn uⱡ nga kʉnt nga kont mul uⱡ ei, tʉmin nimba ronduⱡ ngurum wu ei ndi tangga, enim keⱡ rundi rundi molk, enim nga numan orunga, etpa ronduⱡ mundangga, ik kai mbʉ nʉk, uⱡ kai mbʉ, etʉk mek pʉi!