Xailongga li naxuya mana Urana hauli lipuxindi Isreldi ba digiti sangua Isip xaung sina hanaunaunga teladi nadi. Tauxu xailongga li ba,
Xapdi Muli
Namua Dibung Xailongga Li
Lipu buningama bung xailongga li bu hatanga ba Urana xap lipuxindi muli sangua Isip baru, xaung hau haruangua xaung rung ranguadi baru. Bungina Isreldi duwa salak yabania Isip, Urana ma ranguadi saing hatanga haringinganoa nadi mana Moses rimanoa bu xapdi muli. Mana Bimbia Sainai, Urana hatanga hanaunaungandi masok na Moses, axadi bila Hanaunaunga 10 xaung teladi, saing haringia haruangua hau ba rangua Isreldi. Isreldi ditongtongia Urana Xahinoa bu Urana sanga ba wa ranguadi. Baing ina naga, bila balau dahaxahaxa makisi mala long xoliania laing disok mana Kenan.
Lipu Buningama
Lipu buningama bung yanoa mana xailongga li te, ne lipu xabiangam xumana dahatum ba Moses bung. Haruanga teladi hatanga ba bung (17:14; 24:4; 34:27). Xauna Yosua 8:31 harua ba Xapdi Muli 20:25 dibung mana hanaunaungua Urana sina na Moses. Mak 7:10 xaung 12:26 xaung Luk 2:22-23 dahatanga Moses bung xailongga li xauna.
Haruanga Tuandi
• Unggutinga: Lipuadi daxap salaga (1:1-22)
Toxoratamona xapdi muli (2:1–15:21)
Toxoratamona Moses tang (2:1–7:7)
• Lipua Moses (2:1-25)
Toxoratamona wagi Moses (3:1–4:17)
• Moses goxoya mala mana Isip (4:18-31)
• Moses ungguti haruangua rangua Pero (5:1–6:1)
Toxoratamona haringia haruanganoa (6:2–7:7)
• Moses Pero tang (7:8–15:21)
• Moses sina haruangua na Pero (7:8–11:10)
• Isreldi disauya Isip (12:1–13:16)
Toxoratamona xapdi muli Tek Sabuxania (13:17–15:21)
• Lipudi duwa hawa mana Urana baru (15:22–39:43)
• Moses xaung lipudi: Dahaxa mala mana Sainai (15:22–18:27)
• Gesaga xaung langa ung (15:22–17:7)
• Dahaunggana Amalekdi (17:8-16)
• Xabiangua mana yanama oxatanoa (18:1-27)
Toxoratamona xaung lipuxindi: Dahau haruangua (19:1–39:43)
• Hanaunaungua xaung haruangua dahau (19:1–24:18)
• Urana Xahinoa xaung lipudi disabu mana baru (25:1–39:43)
• Subingua: Toxoratamona rung rangua lipudi (40:1-38)
1
Isreldi Daxap Salaga (Mana) Isip
Yekop, yan tela Isrel, gabu garang lupdi xaung bakbagidingdi diri mala (mana) Isip. Garandi yadingdi bing: Unggutinga (Stat) 46:8-27 Ruben, Simion, Libai xaung Yuda, Isakar, Sebulan xaung Benyamin, Dan, Naptali, Gat xaung Aser. Yekop bakbaginadi dila rangua titidinga sok 70. Ne Yosep wa Isip masup.
Bunging teladi disup, baing Yosep xaung sabangandi xaung adi duwa mana bungina baguba dimati masup. Ne Isreldi daxapsaxi disok xumana, titingadinga tubu sabanga, bakbagiding daharing saing dibaxagi mana titia baguba. Aposel 7:17
Ila ila baing xaitamoxi hauna, ina xabia Yosep te, sok Isipdi yanamidinga. Aposel 7:18 Binabu harua na lipuxindi ba, “Abagu, Isreldi disok xumang sibuna. Haringingadinga sanga makira te. 10 Baing ina naga, tasai daxanga xaiya bu tasoxautidi, nam ditibu buk saing nabu haungingua mesa, disigi bixuaradi bu dahaunggana kira, saing digiti mala sangua titia li.” Aposel 7:19
11 Binabu dita lipu haringindi etua manadi bu dituxu oxata olangama manadi, ditatuadi makasangia bila ba. Baing ditongtongia long sabanga luwa, Pitom xaung Rameses, bu ditagia anginga xaung xalaxala na Pero. 12 Ne heku ditatuatatuadi mala, Isreldi dixibuaxibua mala, dibaxagi mana titia. Binabu Isipdi dimaxua sibuna manadi. 13 Binabu dusingadi te, dilibudi dimakasa buk. 14 Dilibu rungingadinga doa mana makasangadinga, dahaxi mana diruxuya titia xaung ditongtongia birikdi, dilibudi dimakasa mana umanga oxatang xangxana. Isipdi dusingadi monga te, dilibudi dimaksa buk.
15 Haing luwa duwa, oxatadinga hauli Hibrudi dahayau garadi, tang yadingdi Sipra xaung Pua. Isip(di) xaitamoxidinga tabina tang ba, 16 “Bungina ahauli Hibru haingdi dahayau etua mana kabukabu hayauxingama, nabu abagu gara ba lup, bing aung mati. Ne haing, bing ayunga wa.” 17 Ning haing hayauxinga haulingam tang dimaxuwa mana Urana, binabu dilibu bila Isip xaitamodinga tabinadi ba te. Diyunga gara lupdi duwa. 18 Baing Isip xaitamoxidinga wagi haing hayauxinga haulingam luwa dima saing xusunga dingtang ba, “Alibu bila li baru? Baruta ayunga gara lupdi duwa?”
19 Haing hayauxinga haulingam tang dahaxuya Pero ba, “Hibru haingdi bila Isip haingdi te. Haing haringindi saing dahayau sap, muga mana haing hayauxinga haulingamdi disok manadi.”
20 Binabu Urana libu xai na haing hayauxinga haulingamdi, saing Isreldi titingadinga tubu tubu mala, saing disok haringing sibuna. 21 Baing mana namua haing hayauxinga haulingamdi dimaxuwa mana Urana, haulidi daxapsaxi ding bakbagidingdi.
22 Baing Pero tabina lipuxing longgalo ba: “Hibru gara lup longgalo dahayau ba, bing ating mari maluxu’m Langga Nail, ne gara haingdi ayungadi duwa.” Aposel 7:19

1:1 Unggutinga (Stat) 46:8-27

1:7 Aposel 7:17

1:8 Aposel 7:18

1:10 Aposel 7:19

1:22 Aposel 7:19