1 Baing Toxoratamona harua na Moses Aron tang la ba Isip ba,✡ Lipu Hananiangam Oxatanoa (Wok Pris) 23:5; Titinga (Namba) 9:1-5, 28:16; Hanaunaunga (Lo) 16:1,2 2 “Hatata (saing) ila, sobaga li bagula (wa) niani sobaging mugamugangama mang. 3 Tang gabala Isrel hainglup longgalo ba mana xaidap 10 mana sobaga baguli, bakbak toxong taining tainina bing mogu sipsip tutubing tela sanga mana lipuxing numanamdi. 4 Nabu numa tela bakbaginoa kaxukana buk mana daxang sipsip urungina (masup), bing digugu numa rubinam tela dituxu sinak ranguadi, sanga mana lipudi titingadinga. Asuxuya sipsiba sanga mana lipu taining tainina daxang baru. 5 Asaxadi amogudi bing monindi nianiding taininau doxola mana hataing tela doa, saing sanga ba axapdi mana sipsipdi kimbo memedi. 6 Awasa xai manadi laing sobak xaidabing 14, bungina Isrel hainglup longgalo bagula dungdi mati bungbung sibuna. 7 Saking daxap sip tela saing dita rubina xaung etua mana numa xaluxing baruamta daxang sipsipkadi ba mana. 8 Yambong baguba bing daxang mututunganoa dirama yabia, xaung xauyangadi dimap xaung salanga salalangang teguam(a). 9 Labu axang mututungang gamatanau tai kimbo ubori langiau tai, ning arama urungina yabia xaung toxonoa, kindi xaung axamang lunamdi. 10 Labu ayunga hataina laing buraraginau tai. Hataing baruamta wauyu buraragina, bing atau yabia masup to. 11 Bing axang bila li: Asau imangimdi axauxau masup mana haxangua, asau xaim sanggandi kimia saing atuxu tukima rimaimia. Bing axang sap. Toxoratamona Taungang Dalingam.

12 “Yambonga naga bagula ngakisi maluxuʼm Isip saing bagula ngaung matuau longgalo duwa (mana) titia Isip, lupdi xaung asaxadi, saing bagula ngaxap suxuyangua mari mana Isipdi urana dingia longgalo. Nga ba Toxoratamona. 13 Sipka bagula wa mogungua mang mana numadi awa manadi. Baing bungina ngabagu siba ba, bagula ngadaliang. Axamang salakkam tela bagula xapkang te bungina ngataha Isip.

14 “Xaidapka li bing amogu xaidap hatuminga muliama. Niani taining tainina dimayu bing atongtongia taungua bu bakbak taining tainina dimayu dahatumia muli Toxoratamona ria baru. Hanaunaunga baguli wa bungingbunginalo.✡ Xapdi Muli (Kisim Bek) 23:15, 34:18; Lipu Hananiangam Oxatanoa (Wok Pris) 23:6-8; Titinga (Namba) 28:17-25; Hanaunaunga (Lo) 16:3-8 15 (Laing) Xaidap 7 bing axang salanga salalangang teguama. Xaidap mugamugangama bing aunia yis* yis—Yis axamana libu salanga salalanga. sangua numaimdi, namua na lipu gaxarea daxang axamang tela yis wa maluxu mana ba, ungguti mana xaidap mugamugangama laing xaidap 7, bing ataxitidi sangua Isrel. 16 Xaidap mugamugangama bing atuxu guguniangua bu aiti yagua. Tela muli bing atuxu mana xaidap 7. Labu atuxu oxatua mana xaidapka luwadi liu tai. Ning sanga ba axauxau angingua bu axang. Oxata ba ing ganina sangau.

17 “Atuxu Taunga Mana Salanga Salalangang Teguama, namua na mana xaidapka naga ngaxap bakbagimdi ma sangua Isip. Atuxu taungua xaidapka li bu wa hanaunaungua bungingbunginaloama mana bakbak longgalo dimayu. 18 Sobak mugamugangama bing axang salanga xola mana yis. Alibu bila ba mana bungbung xaidap 14 laing bungbung xaidap 21. 19 (Laing) Xaidap 7 labu yis wa numaim telau tai. Baing lipu gaxarea, heku lipu titi telama kimbo yabanama, lipu gaxarea daxang anginga tela yis wa mana ba bing ataxiti sangua Isrel bakbaginoa. 20 Labu axang anginga tela yis wa manau tai. (Mana) Numa baruamta awa mana ba bing axang salanga salalangang teguama.”

21 Baing Moses wagi Isrel yanaming longgalo dima saing harua nadi ba, “Ala amogu sipsip tutubindi mana bakbagimdi saing aungdi mana Taunga Dalingam. 22 Atanggania siba minia. Saking abibi xaiya hisop rimandi atai sibia, saing asami numa xaluxing etuama xaung rubindi mana. Labu angia tela sok mala numang xaluxinia laing buraragina. 23 Bungina Toxoratamona ila kisi mala titia bu taha Isipdi mari, bagula bagu siba wa mana xalu etuama xaung rubindi saing bagula dali xalua (gananganoa) ba, saing bagula bili lipu hanggalangiangama mana luxu numaimia bu tahang(gu tai).✡ Hibru 11:28

24 “Asu mana hanaunaunga li niani taining tainina. Wa (hanaunaunga) bungingbunginaloama mang xaung mana bakbagimdi dimayu. 25 Bungina aluxu mana titia Toxoratamona bagula sina nang bila hau haruangua mana ba, atuxu oxata li. 26 Baing bungina garaimdi duxusungang ba, ‘Oxata li baru namuxinta?’ 27 bing abaladi ba, ‘Taunga Dalingam hananianganoa bu am gaiti Toxoratamona yanoa, namua na dali Isreldi numadingdi (mana) Isip, saing hanggalangia kira te bungina taha Isipdi mari.’ ” Baing lipuadi dituru mari saing disabu mana Toxoratamona. 28 Baing Isreldi dilibu taxa bila Toxoratamona tabina Moses Aron tang.

29 Yambong lia Toxoratamona taha mari matuau longgalo mana Isip, ungguti mana Pero lipua rung mana kabukabu xaitamoxiama ba matuauna, ila ila laing lipu salak yabanama rung salak yabania ba matuauna, xaung morudi matuaudingdi xauna.✡ Xapdi Muli (Kisim Bek) 4:22,23 30 Pero gabu yanaming longgalo xaung Isip longgalo dimesa yambong, saing dahatangitangi haringina mana Isip, namua na numa tela xola mana matiang tela te.

31 Yambong baguba Pero wagi Moses Aron tang dima, saing harua ba, “Amesa! Asauyua lipuxigudi, tang gagabu Isreldi (mala)! Ala asabu mana Toxoratamona bila axusunga ba. 32 Axap moruimdi mala, bila aharua ba, saing ala. Xauna, asina guxama nanga.”

33 Isipdi dahaxi mana lipuadi ba dahatuatu disauya titidinga. Daharua ba, “Nam am longgalo am gamati!” 34 Binabu Isreldi daxap witiding gagabindi doxola mana yis, saing doxoxi mana mina xaningxaningangamdi disaku imangidingia mala. 35 Isreldi dilibu bila Moses baxanga nadi ba, saing duxusunga Isipdi mana yauyaunga gol(am)di xaung silba(m)di xaung imangdi xauna.✡ Xapdi Muli (Kisim Bek) 3:21,22 36  Toxoratamona libu lipuadi duwa xai Isipdi maxadingia, bu disina nadi baruamtadi duxusungadi manadi. Bila balau daxap Isipdi xalingidingdi mala olang.

37 Isreldi dahaxa long sabangga Rameses mala longga Sukot. Bila lipu 600,000 lupdi dahaxa mala, ne dititi haing garadi te. 38 Daxap moru bakbak sabangadi mala ranguadi: sipsipdi, memedi xaung bulmakaudi. Xauna, lipu xumang teladi dahaing mala ranguadi. 39 Baing ditau salanga salalangang teguamdi mana wit gagabang xola mana yis ba daxap ma sangua Isip. Xola mana yis namua na Isipdi disukadi mala sangua titidinga saing ganangan te ba daxauxau anginga mading.

40 Isreldi duwa mana Isip sanga mana niani 430.✡ Unggutinga (Stat) 15:13; Galesia 3:17 41 Niani 430 disup, baing mana xaidapka naga Toxoratamona bakbagindi disauya Isip. 42 Yambongga baguba Toxoratamona wasa manadi, bu xapdi ma sangua titia Isip. Binabu mana yambongga baguli niani taining tainina Isreldi bing duwasa bu diti Toxoratamona yanoa bungingbunginalo.

43 Baing Toxoratamona harua na Moses Aron tang ba, “Taunga Dalingam angiang hanaunaungandi bing:

“Lipu titi telam tela labu xanggu tai. 44 Ne lipu oxatam olanggam baruamta agim (siangia) sanga ba xang kimuya mana axuxu sangganoa. 45 Ning lipu titi telam tela kimbo lipu oxatam tela ugim oxatania ba labu daxanggu tai.

46 “Bing axang numa lunia. Labu axap mututungan tela sabasabiau tai. Labu arambaxuti tuan telau tai.✡ Titinga (Namba) 9:12; Yon 19:36 47 Isrel hainglup longgalo bing dituxu taunga li.

48 “Lipu titi telam gaxarea rung ranguang bo ba xang Toxoratamona Taungang Dalingam bing muga duxuxu lup(ka) longgalo duwa numania (ba) sanggadingdi to. Tauna, sanga ba xang bila yabanam tela. (Ne) Labu lup sanggang xuxungang teguam tela xanggu tai. 49 Hanaunaunga li wa etua mang yabanamdi xaung lipu titi telam gaxarea dirung ranguang.”

50 Isrel longgalo dilibu taxa bila Toxoratamona tabina Moses Aron tang. 51 Baing mana xaidapka naga Toxoratamona xap Isreldi ma sangua Isip bakbagiding bakbagiding.