1 Xaidap 15 mana sobak luwa kimuya mana diyunga Isip, Isrel hainglup longgalo dimesa diyunga longga Elim saing dima mana Long Xoliana Sen, wa liwe mana Elim xaung bimbia Sainai. 2 Long xoliania ba, hainglup longgalo dahati Moses Aron tang. 3 Isreldi daharua na dingtang ba, “Nabu am gamati Toxoratamona rimania mana titia Isip, bing xai buk! La ba am garung taxiya boridi dibaxagi mana mututungana saing am gaxang salanga sanga ba, ne tang gaxapkam ma long xoliania li ba am hainglup longgalo am gamati gesagia.”

4 Baing Toxoratamona harua na Moses ba, “(Bagu) Bagula ngasina salanga ri ma long xaiya mang bila kuya. Lipuadi bing disok mala xaidap taining tainina saing ditagia sanga mana xaidapka ba. Bila balau bagula ngatubadi bu ngabagu ba disu mana hanaunaungagudi kimbo tegu.✡ Yon 6:31 5 Mana xaidap 6 bungina daxauxau anginga ditagia, bing sanga ba dixibua axa ditagia xaidap taining tainina ba.”

6 Binabu Moses Aron tang daharua na Isrel longgalo ba, “Bungbung to bagula axabia sibuna ba Toxoratamona naga xapkang ma sangua Isip. 7 Buragin to bagula abagu Toxoratamona ralanoa, namua na lungu ahati. Amtam gaxarea ba ahatiam ba?” 8 Moses harua muli ba, “Bagula axabia ba Toxoratamona naga bungina sina mututungana ba axang bungbung xaung salanga sanga mana murungaima buraragina, namua na lungu ahati. Amtam gaxarea? Ahatiam te. Tegu. Ahati Toxoratamona.”

9 Baing Moses bala Aron ba, “Uharua na Isrel hainglup longgalo ba, ‘Ama haxek Toxoratamona maxania, namua na lungu hatingaimdi.’ ”

10 Bunging taininau Aron harua na Isrel hainglup longgalo ba, dibagu mala mana long xoliana, saing la ba dibagu Toxoratamona ralanoa owa masok mana mugaba.

11 Baing Toxoratamona harua na Moses ba, 12 “Ngalungu Isreldi hatingadingdi. Ubaladi ba, ‘Bungbung sibuna bagula axang mututungana, saing buraragina bagula axang salanga sanga mang. Baing ina naga bagula axabia ba nga ba Toxoratamona Urana angia.’ ”

13 Bungbung baguba quaildi doti ma dibaxagi mana tabalaxaya, saing buraragina hinaxaga wa tabalaxaya. 14 Bungina hinaxaga sup, axamang laulaungandi maxaniagiding sibuna ditabu long xoliang ubunia. 15 Bungina Isreldi dibagu, daharua nading ba, “Baraxinta?” Namua na daxabia (ba) baraxinta te.✡ 1 Korin 10:3

Moses harua nadi ba, “Alali salanga Toxoratamona sina nang bu axang ba. 16  Toxoratamona tabina bila li: ‘Ang taining tainina bing tagia sanga mana xang. Axap lita luwa mana lipu taining tainina wa numam mokiamia.’ ”

17 Baing Isreldi dilibu bila ba. Teladi ditagia xumana, teladi kaxukana. 18 Baing bungina disuxuya, lipu longgalo daxap sanga mana daxang. Adi ditagia xumana, dingia sanga mading, saing adi ditagia kaxukana, dingia sanga mading. Bakbak taining tainina daxap sanga mana daxang.✡ 2 Korin 8:15

19 Baing Moses harua nadi ba, “Labu asaxangia tela laing buraragin(a) te.”

20 Ning teladi dilungu Moses haruanganoa te. Disaxangia teladi laing buraragina. Ne baxagi mana lang moxamoxandi saing buya. Binabu Moses atin disala manadi.

21 Buraraging taining tainina lipuadi ditagia sanga mana daxang, saing bungina xaidaba xani, mauta. 22 Mana xaidap 6, dixibua tagiangadinga sanga mana xaidap luwa, lita luwadi luwadi mana lipu taining tainina. Baing hainglupdi yanamidingdi dima dibaxanga na Moses. 23 Harua nadi ba, “Toxoratamona tabina bila li: ‘Buragina bing Toxoratamona xaidabing yaguangam bu aiti yanoa. Binabu hatata atau kimbo abori anginga sanga mang. Baraxing baraxinta wauyu bing asaxangia laing buraragin to.’ ”✡ Xapdi Muli (Kisim Bek) 20:8-11

24 Binabu disaxangia laing buraragina bila Moses tabinadi ba, saing buya te xaung lang moxamoxandi disok mana te. 25 Moses harua ba, “Axang hatata, namua na hatata xaidap yaguangam bu aiti Toxoratamona yanoa. Hatata bagula abagu teladi ditabu titia te. 26 Laing xaidap 6 bing atagia, ne mana xaidap 7, Xaidap Yaguangam, bagula teladi ditabu te.”

27 Baing tegu. Lipu teladi disok mala mana xaidap 7 bu ditagia, ne dibagu tela te. 28 Baing Toxoratamona harua na Moses ba, “Laing bugina baru bagula hauxaim mana asu mana tabinangagudi xaung hanaunaungagudi? 29 Ahatum to! Toxoratamona sina Xaidap Yaguangam(a) nang. Namua naga mana xaidap 6 sina salanga nang sanga mana xaidap luwa. Lipu longgalo bing duwa (mua) numia mana xaidap 7. Labu lipu tela sok malau tai.” 30 Binabu lipuadi diyagua mana xaidap 7.

31 Isreldi duxu salanga ba manna.* Mana Hibru xuana, haruanga ‘manna’ bibinganoa bila ‘baraxinta’. Bagunganoa bila korianda† Xaiya korianda Inglis xuana. Mana Hibru xuana duxu ba gat. Marandi kaxukading xaung manrungading. marana, saing dauyanganoa bila bisketdi ditongtongia xaung dungungu langina.✡ Titinga (Namba) 11:7,8 32 Moses harua ba, “Toxoratamona tabina bila li: ‘Axap lita luwa mana manna saing asaxangia mana bakbakdi dimayu, bu sanga ba dibagu salanga ngahaxang mana ba long xoliania bungina ngaxapkang ma sangua Isip.’ ”

33 Binabu Moses harua na Aron ba, “Oxop nanggola tela saing ugam manna lita luwa mana. Baing uta Toxoratamona maxania bu usaxangia mana bakbakdi dimayu.”✡ Hibru 9:4

34 Bila Toxoratamona tabina Moses ba, Aron ta manna ba Bokis Hanaunaungama maxania, bu sanga ba saxangia. 35 Isreldi daxang manna laing niani 40, laing dima mana titia axamang rangingamdi duwa mana ba. Daxang manna laing disok mana titia Kenan ragunia.✡ Yosua (Josua) 5:12

36 (Disuxuya manna lita luwa mana nanggola duxu ba omer, saing omer hataing 10 mana epa.)