Xailongga li naxuya mana Urana tongtongia axamandi xaung mogu Ebraham bakbagindi ba disok lipuxindi. Tauxu xailongga li ba,
Unggutinga
Namua Dibung Xailongga Li
Lipu buningama bung xailonginoa bu naxuya mana Urana tongtongia axamandi xaung waxata rangua bakbak tela baru xaung axamandi sok manadi. Naxuyangua ungguti mana lipua Adam ila ila laing Ebraham ila laing Yekop, saing sup mana Yekop garanoa Yosep matianoa mana Isip.
Xailongga li hatanga Urana bo ba rung rangua lipudi baru. Hatanga ba daxangadi lipudi ditongtongiadi ba duwa maringina Urana maxania ding longgalo didoa. Nabu lipudi disu mana ding murungadinga, dahanggalangia axamandi. Daxanga taininau ing ganina—daxangua Urana tongtongia, Yesu Kristo baing. Bungina tawaxata rangua Urana, baing ina naga, tarung xai rangua Urana.
Lipu Buningama
Lipu buningama bung yanoa mana xailongga li te, ne lipu xabiangam xumana dahatum ba Moses bung, bila dahatum ba bung xailong 5 dungguti Urana Xuang Mugamugangama (Unggutinga, Xapdi Muli, Lipu Hananiangam Oxatanoa, Titinga xaung Hanaunaunga). Axadi li disok niani xumana muga mana Moses sok, binabu naxuyangadi li ing sibunadi te, lungudi saing bungdi mari. Niania bung mosi mana xabia te, bila liwe mana 1500 BC xaung 1230 BC.
Haruanga Tuandi
• Mugamugau sibuna (1:1–11:26)
• Unggutinga (1:1–2:3)
• Adam Ip tang duwa Iden (2:4-25)
• Adam Ip tang diyamu Urana (Hataina 3)
• Kubolu diana tubu (4:1-16)
• Ken bakbagindi (4:17-26)
• Adam bakbagindi (Hataina 5)
• Urana ayangana mana tongtongia lipudi (6:1-8)
• Silinga sabanga (6:9–9:29)
• Numanumadi disok (10:1–11:26)
• Isrel mugangading mugamugangamdi (11:27–50:26)
• Ebraham walinganoa (11:27–25:11)
• Ismael bakbagindi (25:12-18)
• Yekop walinganoa (25:19–35:29)
• Iso bakbagindi (36:1–37:1)
• Yosep walinganoa (37:2–50:26)
1
Unggutinga
1 Mugamugau sibuna, Urana tongtongia sabaluna xaung titi. 2 Titia babung te, xola mana axamang tela. Labiana kaukau miawa ubuna, saing Urana Aningonoa tangaxa etuaʼm tek ubuna.
3 Baing Urana harua ba, “Lulianoa sok,” baing luliana sok.✡2 Korin 4:6 4 Urana bagu ba luliana xai. Baing hata luliana xaung labiana. 5 Urana uxu luliana ba, “Xaidap,” saing uxu labiana ba, “Yambong.”
Tauna, yambonga ila sup, buraragina sok—xaidap taininauba.
6 Baing Urana harua ba, “Ganangana sok lia mana langa bu hata langdi.”✡2 Pita 3:5 7 Baing Urana tongtongia ganangana saing hata lang hawama xaung lang etuama. Sok bila ba. 8 Urana uxu ganangana ba, “Sabaluna.”
Tauna, yambonga ila sup, buraragina sok—xaidap luwauba.
9 Baing Urana harua ba, “Langa wa hawa sabalunia gugunia mana long taininau bu long mamasana sok.” Baing sok bila ba. 10 Urana uxu long mamasana ba, “Titi,” saing uxu lang guguniangama ba, “Tek.” Baing Urana bagu saing yaha mana. 11 Baing Urana harua ba, “Titia libu axamang xangxana disok: angingadi xaung xuyadingdi, xaung xaidi xaung maradingdi, taining tainina disu mana xadingdi.” Baing sok bila ba. 12 Titia libu axamang xangxana disok: anginga xaung xuyadingdi, xaung xaidi maradingdi, taining tainina disu mana xadingdi. Baing Urana bagu ba xai.
13 Tauna, yambonga ila sup, buraragina sok—xaidap tuwauba.
14 Baing Urana harua ba, “Luliandi disok sabalunia bu dahata xaidap xaung yambong. Namuxidingdi bing dahatanga nianigesakdi xaung xaidapdi xaung nianidi. 15 Lulianadi disina sabalunia bu disaxaxanga titia.” Baing sok bila ba. 16 Baing Urana tongtongia luliang sabanga luwa, luliang sapsambagiak wasa mana xaidaba xaung luliang kaxukana wasa mana yambonga. Tongtongia hatungdi xauna. 17 Baing Urana tadi sabalunia bu disaxaxanga titia, 18 duwasa mana xaidaba xaung yambonga, xaung bu dahata luliana xaung labiana. Baing Urana bagu ba xai.
19 Tauna, yambonga ila sup, buraragina sok—xaidap luwadi luwadiuba.
20 Baing Urana harua ba, “Tega baxagi mana asaxa walingam xangxana. Mangdi disok doti makisi sabalunia etuaʼm titia.” 21 Binabu Urana xap masok asaxa tekkam sabangadi xaung asaxa tekkam xangxang teladi dibaxagi mana tega, disu mana xadingdi, xaung mang xangxana, disu mana xadingdi. Baing Urana bagu ba xai. 22 Baing Urana sina guxama nadi. Harua ba, “Axapsaxi asok xumana saing abaxagi mana tega. Mangdi xauna disok xumana titia.”
23 Tauna, yambonga ila sup, buraragina sok—xaidap luwadi luwadi hiliadingauba.
24 Baing Urana harua ba, “Asaxa xangxana disok titia, disu mana xadingdi: morudi, asaxadi dahaxa mua titia, xaung abungindi, disu mana xadingdi.” Baing sok bila ba. 25 Urana tongtongia asaxa abunginadi disu mana xadingdi, xaung asaxa longgalo dahaxa mua titia, disu mana xadingdi. Baing Urana bagu ba xai.
26 Baing Urana harua ba, “Tatongtongia lipudi disok bila kira sibura li. Bing duwa etua mana song tekkamdi xaung mang sabalunamdi, etua mana morudi xaung titi longgalo xaung axamang longgalo dahaxa mua titia.”
27 Binabu Urana tongtongia lipudi disok bila ing sibuna,
maxuna, tongtongiadi disok bila ina,
tongtongiadi lup haing.✡Unggutinga (Stat) 5:1-2; Matyu 19:4; Mak 10:6
28 Baing Urana sina guxama nadi. Harua ba, “Axapsaxi asok xumana. Abaxagi mana titia saing awa etua mana. Awa etua mana song tekkamdi xaung mang sabalunamdi xaung asaxa longgalo dahaxa mua titia.”
29 Baing Urana harua ba, “Bagu ngasina anginga xuyanam longgalo duwa titia nang xaung xai maranam longgalo nang. Bagula duwa angiaimdi. 30 Baing asaxa titiam longgalo, mang sabalunam longgalo xaung asaxa longgalo dahaxa mua titia—ngasina tatubang xaung xailong gamatang longgalo nadi. Bagula duwa angiadingdi.” Baing sok bila ba.
31 Urana bagu axamang longgalo tongtongiadi, saing xai sibuna.
Tauna, yambonga ila sup, buraragina sok—xaidap tuwa tuwauba.