12
Urana Wagi Ebram
1 Tauna, Toxoratamona harua na Ebram, “Usauya titima, bakbagimdi xaung tibum sibindi, saing ula mana titi tela bagula ngahatanga naung.✡Aposel 7:2-3; Hibru 11:8
2 “Bagula ngalibu garamdi disok sabanga sibuna,
bagula ngalibu yama sok sabanga sibuna,
saing bagula uwa guxam na lipudi.
3 Nga bagula ngaguxam gaxareadi dilibu kubolu xaiyua maung,
xaung gaxareadi dilibu kubolu diandi maung
nga bagula ngasina mauxanganoa nadi.”✡Galesia 3:8
4 Binabu Ebram ila, bila Toxoratamona bala ba, xaung Lot ila rangua. Ebram nianinoa bila 75 bungina yunga Haran. 5 Xap haininoa Sarai, sabanganoa garanoa Lot, xalingidingdi xaung lipuxiding oxatamdi daxapdi Haran, saing dila mana titia Kenan, saing disok la ba. 6 Ebram haxa maluxu mana titia ba laing disok mana xai sabangga tela wa More, haxek mana longga Sekem. Mana bungina baguba Kenandi duwa, mana titia baguba.
7 Toxoratamona sok rangua Ebram saing harua ba, “Mana ung bakbagimdi*kimbo xuyanoa nga bagula ngasina titia baguli.”✡Aposel 7:5; Galesia 3:16 Baing ina tongtongia kabukabu hananiangam la ba na Toxoratamona, gaxarea sok mana. 8 La ba ila mana xaxagang tela sangga karagia haxek mana taun Betel saing tongtongia xahinoa. Betel wa yuwaxa ne Ai wa karagia. La ba tongtongia kabukabu hananiangama saing uxu ba Toxoratamona. 9 Saking Ebram haxa mala laing sok Negep.
Ebram Wa Isip
10 Tauna, gesaga sok mana titia baguba. Ebram ri mala Isip wa la ba mana bunging teladi namuana gesaga wa maxaxaya. 11 Haxek monga ba sok Isip, harua na haininoa Sarai ba, “Ngaxabia ba ung haing gumanging sibuna. 12 Bungina Isipdi dibagung, bagula daharua ba, ‘Ali haininoa.’ Baing bagula dung nga ne bagula diyungaung uwa. 13 Uharua ba ung ba hamungagua, bu bagula dilibu xai manga xaung walingagua bagula sok xai.”✡Unggutinga (Stat) 20:2, 26:7
14 Bungina Ebram ma Isip, Isipdi dibagu ba Sarai haing gumanging sibuna. 15 Baing bungina Pero†Pero yaya Isipdi duxu xaitamoxidinga. lipuxing oxatamdi dibagu, baing dibaxanga na Pero, saing daxap maluxu xaitamoxi numania. 16 Pero libu xai mana Ebram namua na hatum ba Sarai moxongonoa, saing Ebram xap sipsipdi, bulmakaudi, donki monindi xaung hagaxandi, haing lup oxata olanggamdi, xaung kameldi.
17 Ne Toxoratamona libu businga haringina na Pero xaung numanamdi, namua na xap Ebram haininoa Sarai. 18 Binabu Pero ta Ebram haruangia. “Baruta ulibu manga?” harua ba. “Baruta ubala nga hamungama? 19 Baruta ubala nga ba hamungama, binabu ngaxap bila hainigua? Hatata, hainima baguli. Oxop hainima saing ula yabamia!” 20 Baing Pero tabina lipuxindi, binabu disuka Ebram xaung haininoa goxoya xaung xalinging longgalo.
✡12:1 Aposel 7:2-3; Hibru 11:8
*12:7 kimbo xuyanoa
✡12:7 Aposel 7:5; Galesia 3:16
✡12:13 Unggutinga (Stat) 20:2, 26:7
†12:15 Pero yaya Isipdi duxu xaitamoxidinga.