1 Bungina Ebram nianinoa 99, Toxoratamona owa masok rangua saing harua ba, “Nga Urana nga sanga haringinga longgalo, uhatum haringina manga saing ulibu kubolu maringindi ung gutongtongia kubolu dian tela te. 2 bing bagula ngahau haruangua liwe makira saing bagula ngalibu bakbagimdi disok xumana.”

3 Bing Ebram gung king tuxundi, saing turu mari baing Urana bala ba, 4 “Ulungu to, hatata nga ngahau haruangua raunguaung ba bagula sok numanuma xumana tibuding. 5 Hatata saing ila bagula sanga duxu yama Ebram*Ebram namuxinoa taiti tibura yanoa. muli te; Ne bagula duxung ba Ebraham†Ebraham namuxinoa lipu xumana tibudinga., namua na bagula ngalibung usok numanuma xumana tibuding.✡Rom 4:17 6 Bagula ngalibu bakbagimdi disok xumang sibuna mana titi longgalo saing xaitamoxidi bagula disok mana ung bakbagima. 7 Bagula ngata masok haruangua ngahau liwe makira xaung bakbagimdi kimu.✡Luk 1:55 8 Titia Kenan, hatata uwa bila lobudi mana bagula ngasina naung bila ungia xaung bakbagimdi kimuya. Bing bagula ngawa Urana dingia.”✡Aposel 7:5

9 Baing Urana harua na Ebraham ba, “Ne mana ung ba, ung gusu mana haruangagua ngahau ranguaung ba, mana ung xaung bakbagimdi kimu bagula disu mana. 10 Haruangua ngahau ranguaung xaung bakbagimdi kimu, haruangua asu mana bing bila li: Lup longga liwe maung bagula duxuxu sangga.✡Aposel 7:8; Rom 4:11 11 Uxuxu sanggadingidi bu mogu haruangua ngahau liwe makira. 12 Mana hatata saing ila, bakbagimdi kimu gara lup longgalo liwe maung bagula duxuxu sangga adi xaidabidingdi 8, adi dahayaudi numaimia xaung adi ugimdi rangua lipu teladi—ung bakbagimdi te. 13 Bila balau adi dahayaudi numaimia kimbo ugimdi, ding longgalo bing duxuxu sanggadingdi. Alali haruangagua ngahau ranguaung. 14 Lup gaxarea duxuxu sangga te, bing bagula diyunga yabadinga xaung lipuxidingdi mala; Namua na didali haruangagua ngahau ranguaung.”

15 Urana harua na Ebraham xauna ba, “Mana hainima Sarai labu uxu muli ba Sarai tai; yanoa bagula uxu ba Sara. 16 Bagula ngaguxam saing bagula hayau gara lup tela naung. Bing bagula ngaguxam saing bagula wa titi xumana bauding; Xaitamoxidi bagula disok mana ing bakbagindi.”

17 Ebraham hagung king tuxundi saing turu mari. Masisi saing harua ba, “Bagula xai mana gara lup tela sok mana lipua nianinoa bila 100? Bagula xai mana Sara hayau bungina ninanoa bila 90?” 18 Saing Ebraham harua na Urana ba, “Nabu Ismael ing ganina wa hawa mana guxamingama!”

19 Baing Urana harua ba, “Wane, ne xai mana hainima Sara hayau gara lup tela bing bagula uxu ba Aisak.‡Aisak namuxinoa masisi. Bagula ngahatanga haruangua ngahau rangua xaung bakbagindi kimu mana. 20 Baing mana Ismael, nga bagula ngalungung to: Bagula ngaguxam. Bagula ngalibu bakbagindi disok xumana saing titingadinga bagula tubu. Bagula sok hanaunaunga yanamiding 12 tibuding saing bagula ngata mana titi xai sibuna. 21 Ne haruangagua ngahau bing bagula rangua Aisak, gaxarea Sara bagula hayau maung niani etuama.” 22 Bungina sahi haruanga rangua Ebraham, baing yunga mala.

23 Mana xaidapka baguba Ebraham xap garanoa Ismael xaung adi dahayaudi yabania, adi gimdi siangia mala saing xuxu sanggadingdi, bila Urana bala ba. 24 Ebraham xauna xuxu sangga bungina nianinoa 99. 25 Bing garanoa Ismael nianinoa bila 13. 26 Ebraham xaung garanoa Ismael duxuxu sangga xauna mana xaidap taininau. 27 Saing lup longga Ebraham yabania xauna adi dahayaudi numania kimbo adi gimdi siangia rangua lipu teladi, ding longga duxuxu sangga xaung lipuxing oxata olanggamdi.