1 Baing Urana harua na Yekop ba, “Umesa uhaing mala mana longga Betel saing urung la ba. Utongtongia kabukabu hananiangam la ba nanga Urana ba owa masok maung bungina igiti mala sangua sabangama Iso.”✡Unggutinga (Stat) 28:11-17

2 Binabu Yekop harua na sibindi xaung adi duwa rangua ba, “Aunia urana long telamdi babudingdi, saing alibuang asok sigixinga Urana maxania xaung asau imang haundi. 3 Sup, baing bagula tamesa tahaing mala mana longga Betel. La ba bagula ngatongtongia kabukabu hananiangam na Urana, Urana ba lungu nga mana xaidapka mauxanganoa xap nga xaung wa rangua nga long baruamta ngala mana.” 4 Binabu disina urana long telamdi babuding longgalo na Yekop xaung disina raxuadi duwa tangadingliania na, saing Yekop yaxangdi hawa mana xaiya ok haxek mana longga Sekem. 5 Baing ina naga, dahaxa mala, baing Urana libu maxuwanga sabanga xap lipuadi duwa mana longgadi duwa singia (manadi) bu duxu Yekop bakbagindi te.

6 Baing Yekop gabu lipuadi duwa rangua disok mana longga Lus mana titia Kenan. (Lus Betel yang mugangua.) 7 La ba tongtongia kabukabu hananiangam, saing uxu longga ba yanoa ba El-Betel,*El-Betel namuxinoa Urana mana Betel. namua na la ba Urana hatangaina masok na bungina giti mala sangua sabanganoa.

8 Duwa mana longga baguba, baing Debora, hainga wasa mana Rebeka bungina wa gara kambagina ba, mati saing dikimang hawa mana xaiya ok wa hawa mana longga Betel. Binabu duxu xaiya ba Alon-Bakut.†Alon-Bakut namuxinoa xaiya ok tinanggam. Xaiya ok xai sabanga, yonggaxinoa xai sibuna.

9 Kimuya mana Yekop yunga titia Padan-Aram goxoya ma titia Kenan, Urana owa masok mana muli saing sina guxama na. 10 Urana harua na ba, “Hatata yama Yekop,‡Yekop namuxinoa tuxu king tambonga. Mana Hibru xuana haruanga ba harua saha mana haruanga langua. ne bagula duxu yama ba Yekop muli te. Tegu. Bagula yama Isrel.§Isrel namuxinoa haunggana Urana.” Binabu sina yaya Isrel na.✡Unggutinga (Stat) 32:28

11 Baing Urana harua na ba, “Nga El-Sadai.*El-Sadai namuxinoa Urana Haringing Sibuna. Oxopsaxi usok xumana. Bagula usok numanuma xaung numanuma xumang teladi xauna, saing bagula bakbagim teladi disok xaitamoxidi.✡Unggutinga (Stat) 17:4-8 12 Titia waleu ngasina na Ebraham xaung Aisak ba, hatata ngasina naung xauna. Baing bagula ngasina na bakbagimdi dima kimu maung.” 13 Urana harua laing sup, baing yunga la ba saing haing mala.

14 Yekop rang siang maxaxaya tela ba mogu longga Urana harua rangua ba, saing matu wain xaung olip guxenganoa etua mana bila hananiangua (ila rangua Urana).✡Unggutinga (Stat) 28:18-19 15 Binabu Yekop uxu longga ba Urana harua rangua ba (yanoa ba) Betel.†Betel namuxinoa Urana numanoa.

16 Tauna, diyunga longga Betel dahaxahaxa mala mana longga Eprat. Duwa hasoya monga, baing Retsel xunumia gara ruha saing makasa sibuna ba hayau. 17 Makasanganoa sapsambagiak, baing haing hayauxingama harua na ba, “Umaxuwau tai, namua na uhayau lup tela muli!” 18 Retsel yaganganoa bo ba supkuba, namua na (bo ba) matiuba, baing sina yaya Ben-Oni‡Ben-Oni namuxinoa gara lup mauxangaguam. na garanoa. Ne tibuna sina yaya Benyamin§Benyamin namuxinoa gara lup rung rimagu rimamo rubinia. na.

19 Retsel mati ba, saing ding dikimang daxangua ila mana Eprat rubinia. (Eprat Betlehem yang muganga.) 20 Yekop rang siang maxaxaya tela etua mana gobagobanoa. Retsel gobagobang siang mogunganama, saing wauyu laing hatata (li).

21 Isrel haxa mala muli, dali Migdal-Eder saing tongtongia tabalaxayanganoa hataina mana. 22 Isrel wa mana titia baguba, baing Ruben ila kinu rangua Bilha, tibuna haining oxatama (yau ba), saing Yekop lungu naxuyanga baguba.✡Unggutinga (Stat) 49:4

Adi li Yekop garang lupdi. Wa mana titia Padan-Aram bungina baudingdi dahayaudi na.

27 Yekop goxoya ma rangua tibuna Aisak mana longga Mamre, haxek mana longga Kiriat-Arba. (Kiriat-Arba Hebron yang muganga.) Longga baguba longga Ebraham xaung Aisak tang duwa lobu mana ba.✡Unggutinga (Stat) 13:18 28 Aisak wa laing nianindi 180. 29 Baing yaganganoa sup saing mati bungina duanga. Niandi dibaxagi saing kinu rangua mugangandi. Baing garandi Iso Yekop tang dikimang.