1 Iehova Sabaota na e tomu, A itaia, egu gwaukau tauna na siaiamu, vairagu dalana baine lailaia totona; bona Iehova, o tahuamu Diravana, ese ena dubu helaḡana baine mai henia taku. 2 A itaia, gwauhamata gwaukauna tauna, o moalelaiamu tauna, na e maimu. Iehova Sabaota na e herevamu. A ena mai dinana ai, daika baine haheauka diba? Bona baine hedinarai negana ai, daika baine gini diba?

Badina be ia na gold ihaḡoevana tauna ena lahi bona dabua-huri tauna ena sopu na heto. 3 Ia na baine helai, silver ihamanada-manadana bona ihaḡoevaḡoevana tauna na heto; ia ese Levi vevena baine hagoevadia, bona baine hamanadadia, gold bona silver na heheto, ela bona idia ese boubou ḡaudia maorodia na Iehova bae henia. 4 Bena Iuda bona Ierusalem edia boubou ḡauna na Iehova ese baine moalelaia, dina gunadia ai bona laḡani gunadia ai heḡereḡeredia.

5 Iehova Sabaota na e tomu, Una negana ai lau na hahemaoro totona baina vasi. Lau ese babalau taudia, heuda-hanai taudia, gwauhamata koikoi taudia, ḡaukara taudia davadia ihenidia ai e koidiamu bona vabu bona ihareha e hahisidiamu taudia, bona noho-hedoa tauna e doria ohomu bona lau garigu asie garimu taudia na baina habadelaidia haraḡa.

6 Badina be lau Iehova na asina idaumu. Una dainai, Iakob garana e, umui na asio mase ore. 7 Senemui edia nega amo umui na egu taravatu vada o rakatanidia bona asio badinadia. Iehova Sabaota na e tomu, A lou henigu, bena lau ese baina lou henimui. A umui na o tomamu, Ede baia lou toma? 8 Be, taunimanima ese Dirava bae dadihaia a? Mato, umui ese o dadihaigumu. A umui o tomamu, Ede a dadihaimu tomamu? Iniheto: emui ḡau ikaroadia ai bona emui herahia ḡaudia ihenidia ai. 9 Heuduguirai na latamui ai vada e kau, badina be umui na mai besemui idoinai ida ese o dadihaigumu. 10 Iehova Sabaota na e tomu, Ḡau ikaroadia korikoridia ba mailaidia, roge ai bavatodia, aniani na rumagu ai baine mia helaoreana. Unu amo ba tohogu, guba gaba-maurudia baina kehodia emui, bona hahenamo na latamui ai baina seia dobi ela bona baine hepurai dobi, eiava. 11 Iehova Sabaota ini e gwau tomamu: Kwadi baina gwaua tao, emui tano anidia basine ha-oredia totona; bona imea ai emui vine na huahua ai basie dabu. 12 Bena bese iboudiai ese bae imodaimui; badina be moale tanona ai baola. Iehova Sabaota na e herevamu.

13 Iehova na e tomu, Emui hereva vada e auka, lau latagu ai, A umui o tomamu, Ede a hadikamu toma emai hereva ai? 14 Iniheto: vada oto, Dirava isiaina ilao-henula na asi anina; anina be dahaka ena hahedua baita badinaia eiava Iehova Sabaota vairanai baita raka, taitai taudia na heheto? 15 Ina negana amo, hekokoroku taudia na namodia baita gwaurai; kara dika taudia na e taḡamu; a dia una mo, Dirava e dibaganiamu negadia ai danu idia na e roho niaurimu.

16 Bena Iehova garina e gariva taudia na e hereva heheniva; Iehova ese e hakala henidia, bona edia hereva e kamonai, bena Iehova garina e gariva bona ia ladana e helalolaiava taudia ilalo-taodia bukana vada e torea ia vairanai. 17 Iehova Sabaota eto, Idia na lauegu taunimanima korikoridia, kara baina karaia dinana ai, bona baina hamauridia, tau ta ese natuna, ia isiaina e lao heniamu merona, e hamauriamu na heto. 18 Bena emui haero-haero ai kara namo taudia bona kara dika taudia ma ba hididia lou, Dirava isiaina e lao heniamu tauna bona isiaina se lao heniamu tauna danu ba hididia.