1 Iehova Sabaota na e tomu, Badina be, a itaia, dina na e maimu; e siahumu amu siahuna na heto. Una dina ai hekokoroku taudia iboudiai bona kara dika taudia iboudiai na rei kakoro heḡereḡerena ai baela; hari bainema dinana ese baine aradia ore, bena idia ediai ramu ta eiava rigi ta basine mia. 2 A umui, lau ladagu o gari heniamu taumui, emui ai kara maoromaoro dinana baine dae, mai hahemaurina ia hanina ai. Do ba raka lasi mai rohomui ida, boromakau natudia na edia aniani gabuna amo e roho lasimu na heto. 3 Bena lau ese karana baina karaia dinana ai, kara dika taudia na ba moimoilaidia, badina be idia na kahu ai baela, aemui palapaladia henudiai. Iehova Sabaota na e herevamu.

4 Egu hesiai tauna Mose ena taravatu ba badinaia, ena taravatu bona ena hahemaoro herevadia lau ese Horeb ai na haganilai heniava, Israel idoinai ese bae badina ḡaudia.

5 A itaia, Iehova ena dina badana mai garina ida do basinema negana ai, lau ese peroveta tauna Elia do baina siaia vasi. 6 Bena ia ese tama lalodia na baine haloudia natudia ediai, bona natu lalodia na baine haloudia tamadia ediai, lau baina vasi bena tano na heuduguirai amo baina habuaia tari na garina.