1 Vainana-negai aria ta bae karaia, Lagau-hanai bona Asie-hatubuaflaoana Ariana. Bena hahelaḡa taudia bona itorena taudia ese dibaka karadia e lalodia, ia bae alaia mase eto. 2 A idia eto, Dia aria dinadia ai, aru taudia bae heloḡo-heloḡo na garina.

3 Ia na Betania ai, Simona, lepra tauna, ena ruma ai, aniani gabuna ai e ege diho. Bena hahine ta ela, nadi kavabuna ta e abia kau, lalonai dehoro namo-hereana, davana bada ḡauna; bena e kohia, dehoro na e horolaia. 4 Ia dekena taudia haida e badu, eto, Dahaka dainai ina dehoro e negea kavamu? 5 Bema hoia, davana na dollar toi-ahui bema hanaia reana; monina bema abia, ogoḡami taudia bema henidia. Idia ese hahine e maumauraia. 6 A Iesu eto, Herevana! Dahaka dainai o turia riki heniamu? Kara namona egu ai vada eme karaia. 7 Be, ogoḡami taudia na nega idoidiai dekemui ai, bena ba ura negadia ai vada ba hanamodia. A lau be dia nega idoidiai dekemui ai. 8 Ena diba heḡereḡerena ai vada e kara henigu; do asie gurigu, ia na ema guna, taugu e dahua heḡaeḡae. 9 Na hamaoromui momokanimu, sivarai namo bae harorolaia gabudia iboudiai, tanobada heḡeḡemadai, hari eme karaia karana bae gwauraia, ia ihelalolaina.

10 Iuda Iskariote, gwauta-rarua tauna ta, hahelaḡa taudia dekedia ela, lesutaona itorena totona. 11 Idia na e kamonai, e moale dikadika, bena e gwau hamata, moni bae henia eto, Taunabunai ia ese taona itorena dalana e tahua.

12 Asie-hatubua flaoana Ariana dina gini-gunana, Lagau-hanai mamoedia ialadia dinana ai, ena hahediba ese e nanadaia, eto, Ai na edeseni ai Lagauhanai baia karaia heḡaeḡae, bena bavania? 13 Bena ia ese ena hahediba rarua e siaidia, eto, Hanua badana ai ba raka vareai, tau ta hodu baine ehea ba itaia, bena murina amo ba raka. 14 Baine dae kau rumana ai na ruma biaguna ba hereva henia, baoto “Hahediba tauna e tomu vadivadi daiutuna be edena, egu hahediba ida Lagau-hanai baia ania?” 15 Bena ia ese atai daiutuna badana ta baine haheitalaimui, vada e iravaia vaitani. Unuseni ai ba heḡaeḡae. 16 Bena ena hahediba ela, hanua lalonai e raka vareai, ia ese e gwaurai guna ḡaudia iboudiai e davari. Bena Lagau-hanai e dabaraia.

17 Adorahi ai, ia na gwauta-raruosi ida e hebou. 18 Bena idia na aniani gabuna ai e ege diho ai, Iesu ese e hamaorodia, eto, Na hamaoromui momokanimu, umui lau ida ta aniani heboumu taumui ta ese lau taogu baine torea. 19 Idia na e lagaga bou: bena ta ta ese e nanadaia, eto, Ina lau a? Ina lau a? 20 Ia e haere, eto, Gwauta-raruosi taumui ta, lau ida nau tamona ai a dau dobimu. 21 Taunimanima Natuna na momokani bainela, e torelaia guna heḡereḡerena. A Taunimanima Natuna taona itorena tauna madi ihabaina; vada basinema vara hari namo.

22 Idia na e anianiva lalonai, Iesu ese ilaoa atagana ta e abia, e hanarnoa, bena e bitua, e henidia, eto, Avabia, lau taugu binai. 23 Ma kehere ta e abia, e hanamoa, e henidia, eto, 24 Lau raragu binai, herohemaino rarana, hutuma daidiai baine hebubu. 25 Na hamaoromui momokanimu, lau ese vine ranuna basina inua lou, ela bona matamatana baina inua, Dirava ena basileia lalonai.

26 Idia ese ane e abia vaitani, bena e raka lasi, Olive ororona ela. 27 Bena Iesu ese e hamaorodia, eto, Iboumui ai lau daigu ai ba hekwakwanai, badina be ini e torea toma,

29 Petro eto, Taunimanima iboudiai bae hekwakwanai, a lau be lasi. 30 Bena Iesu ese e hamaoroa, eto, Na hamaoromu momokanimu, hari ina hanuaboi, kokoroku do basine tai harua, oi ese hatoi ba ḡoregu. 31 A ia na e gwau heaḡi, eto, Ena be oi ida baita mase hebou, to lau oi basina ḡoremu. Iboudiai danu unu mo e gwau toma.

32 Idia na gabu ta ai e lasi, ladana Getesemane. Bena ia ese ena hahediba e hamaorodia, eto, Iniseni ai ba helai, lau do baina ha ḡuriḡuri. 33 Bena ia ese Petro bona Iakobo bona Ioane e hakaudia siri; bena laumana e daure, darana e doko. 34 Bena e hamaorodia, eto, Lau na laumagu eme hisihisi bada, mokona name mase; iniseni ai ba noho, ba gima. 35 Taina ma e raka lao, bena lano ai e goru parapara, e ḡuriḡuri, bema mai dalana ena nega taina bema daudau; 36 eto, Aba e, Tamagu e, oi na ḡau iboudiai ikaradia dibamu; ina kehere na egu amo boma abia oho, to dia lauegu ura, oiemu ura hari.

37 Bena e lou lao, mallutadia ai e davaridia. Ia ese Petro e gwau henia, eto, Simona e, o mahutamu a? Hora tamona do basioma gima a? 38 Ba gima, ba ḡuriḡuri, hedibaḡani ai ba vareai na garina. Lauma na e uramu, a tau-anina eme manoka.

39 Ma e raka oho, eha ḡuriḡuri, ena ḡuriḡuri herevadia gunadia ma e gwaurai lou. 40 Ma e lou lao, mahutadia ai ma e davaridia, badina be matadia e mahutava. Ia ihaere-henina na asi dibadia.

41 Ihatoina ma e lou lao, bena e hamaorodia, eto, Madi, vada a mahuta, laḡamui avani. Vadaeni, negana vada eme kau. A itaia, Taunimanima Natuna na dika taudia imadia ai vada e atoa. 42 O tore, aitala; taogu itorena tauna vada e maimu.

43 Ena hereva do se doko, Iuda, gwauta-rarua taUna ta, e gini dae, hutuma bada ida, mai edia dare bona mai edia kareva, hahelaḡa taudia bona itorena taudia bona hanua tau-badadia ese e siaidia taudia bunu. 44 Taotore tauna ese toa ta e henidia guna, eto, Baina harahua tauna ḡaunabunai, ba dabaia tao, ba hakaua balaheni. 45 Taunabunai, ia na e gini dae, maoromaoro Iesu dekena ela, eto, Hahediba taumu e! Bena e harahua. 46 Bena idia ese imadia ai e daua kou, e dabaia tao. 47 A ia dekenai e gini taudia ta ese ena dare e veria lasi, hahelaḡa tauna badana ena hesiai tauna e taraia, taiana e dapaia oho. 48 Iesu ese e hereva henidia, eto, Umui na mai daremui bona mai karevamui ida lau idabai-taogu oma, dadidadi tauna idabai-taona boma mai na heto. 49 Dina iboudiai lau be dekedekemuiai, Dubu Helaḡa lalonai na hahedibava, to asio dabaigu tao. A ina na e tore guna herevadia ihamomokanilaidia. 50 Bena iboudiai ese ia e heautania. 51 A tauhau ta ese e ḡavaia: ia na rami mo e rioa; bena idia ese ia danu ma e dabaia tao, 52 to ena rami imadia ai e rakatania, ia ḡaḡaena mo e heau.

53 Idia ese Iesu e hakaua lao, hahelaḡa tauna badana dekena: bena hahelaḡa taudia bona hanua tau-badadia bona itorena taudia iboudiai naia ida e hebou. 54 Petro ese Iesu e ḡavaia, to mai padana, ela bona hahelaḡa tauna badana ena ruma maḡuna lalonai, bena hesiai taudia ida e helai hebou, lahi ai e hegana.

55 Bena hahelaḡa taudia bona kaunsil taudia iboudiai ese Iesu ihamasena badina e tahua, to asie davaria. 56 Badina be hutuma ese e habadelaia koikoi, to edia hahebade na asie heḡereḡere. 57 Ma haida e tore isi, edia hahebade koikoi herevadia e gwaurai, eto, 58 Ai na iena hereva a kamonai, eto “Ina imadia amo e karaia dubuna baina rohoa, bena dina toi lalodiai ima ai asie karaiamu ḡauna auta ma baina karaia”. 59 A edia hahebade herevadia na asie heḡereḡere.

60 Bena hahelaḡa tauna badana na bogaragidiai e tore isi, Iesu e nanadaia, eto, Oi to haeremu a? Ini edia hahebade herevadia be dahaka? 61 Ia na asi reḡereḡena, se haere henidia. Bena hahelaḡa tauna badana ese ma e nanadaia lou, eto, Oi Keriso, e hanamoamu Diravana Natuna, eiava? 62 Iesu e haere, eto, Lau binai: bona umui ese Taunimanima Natuna do ba itaia, Siahu imana idibana ai baine helai, bona guba oridia ai bainema. 63 Bena hahelaḡa tauna badana ese sibona ena dabua e darea, e lolo, eto, Dahaka hahebadena ta tahuamu a? 64 Dirava ihadikana herevana vada ome kamonai. Dahaka o tomamu? Idia iboudiai e revaia, eto, Aine mase. 65 Bena haida ese e kanudia, ma haida ese matana e kou ahu bona e tutua, eto, Daika ese? Edia hesiai taudia ese danu imadia amo e pataia.

66 Petro be tano ai, maḡu lalonai: bena hahelaḡa tauna badana ena hesiai hahinena ta ela, 67 Petro lahi ai e heganava ai e itaia; bena e raraia, eto, Oi danu Iesu, Nasaret tauna, o bamoava. 68 To ia na e heḡore, eto, Lau na asi dibagu; emu hereva na lalogu seme parara.

69 Hari hahine ese ma e itaia lou, bena dekedekena taudia e hamaorodia, eto, O ta be ena ia. 70 Ia na ma e heḡore lou.

Asi vanahana, Petro badibadinai e gini taudia ese ma e habadea, eto, Oi danu idia ta, badina be oi danu tau Galilea. 71 Bena ia na e ere dika, e gwau tora, eto, Umui o gwauraiamu tauna na lau asi dibagu. 72 Bena kokoroku ma e tai lou. Bena Petro ese Iesu ena hereva e helalolaia une, eto “Kokoroku do basine tai harua, oi hatoi ba ḡoregu”. Bena e tai dikadika.