1 Daba vaburana ai, hahelaḡa taudia ese hanua tau-badadia bona itorena taudia ida e henega, bena idia, kaunsil taudia iboudiai ida, Iesu e ḡuia, e hakaua lao, Pilato e henia. 2 Bena Pilato ese e nanadaia, eto, Oi na Iuda taudia edia pavapava a? Iesu eto, O ena vada o gwaumu. 3 Bena hahelaḡa taudia ese hereva diaḡau e habadelaia. 4 Pilato ese ma e nanadaia lou, eto, Oi na to haeremu a? Oi dibamu hereva idau-idau amo e habadelaimumu. 5 To Iesu se haere; taunabunai Pilato e hoa.

6 Pilato vaia ena kara una aria negana ai, dibura rumana ai e nohova tauna ta, idia ese bae gwauraia tauna, baine ruhaia nege. 7 Una negana ai tau ta dibura rumana ai e nohova, ladana na Baraba; ia na haida ida e heatu, bena una heatu lalonai haida e aladia mase. 8 Bena aru taudia ese Pilato e noia, vaia ena kara ma baine karaia. 9 Pilato ese e nanadaidia, eto, O uramu Iuda taumui emui pavapava baina ruhaia nege a? 10 Badina be ia dibana hahelaḡa taudia ese e vaḡeḡe hellia dainai taona e torea. 11 A hahelaḡa taudia ese aru taudia lalodia e ani, eto, Aogwa “Lasi, Baraba hari ba ruhaia nege”. 12 Bena Pilato ese ma e nanadaidia, eto, O, ina Iuda taumui emui pavapava o tomamu na ede baina tomaia? 13 Idia na e lolo, eto, Ba hasatauroa. 14 Pilato eto, Be, ena dika be dahaka? A idia ma e lolo lalo-dika, eto, Ba hasatauroa. 15 Taunabunai, Pilato na aru taudia ihamarumarudia urana e urava dainai, ia ese Baraba e ruhaia nege, a Iesu na e dadabaia, bena e henidia, bae hasatauroa.

16 Tuari taudia ese e hakaua lao, edia gima rumana ikoukouna ai, bena edia orea taudia iboudiai e gogodia. 17 Dabua kakakakana e hakaralaia, bena havava ḡauna ginigini a e hatua, ia kwarana ai e atoa kau. 18 Bena e hanamoa matama, eto, Iuda pavapavana e! Ba mauri! 19 Bena siriho amo kwarana e botaia, e kanudia; bona tuidia e hadai, e toma henia diho koikoi. 20 E ḡonaḡonalaia vaitani, bena dabua kakakakana e kokia oho, ena dabua korikorina ma e hakaralaia, e hakaua lasi, bae hasatauroa.

21 Kurene tauna ta, ladana Simona, Alesana bona Rufo tamadia, gunika amo e lasi; bena idia ese e haduaia, Iesu ena satauro baine huaia. 22 Bena e hakaua lao, gabu ta ladana Golgota; anina be “kwara koukouna tanona”. 23 Idia ese vine ranuna hisi ihamaraḡina muramurana ida e bulo hebou, e henia, to se inua. 24 Bena e hasatauroa; bona ena dabua e hari, mari ai ta ta ahudia e abi. 25 Dina e taolara sisivana e hasatauroa. 26 Hahebade herevana ia daellai ini e torea toma: IUDA TAUDIA EDIA PAVAPAVA. 27 Ia ida nega tamona dadidadi taudia rarua e hasataurodia, ta idibana kahana ai, ma ta laurina kahana ai. 28 Unu amo gunaguna e torea herevana vada e momokani, eto, Kara havara-havara taudia ida e duahia hebou.

29 E raka hanai taudia ese e hereva dika henia, kwaradia e taiko-taiko, eto, I! Dubu Helaḡa ba rohoa ma dina toi ai ba larebaia lou oto taumu, 30 satauro amo a dada dobi, sibomu ba hahemauri. 31 Hahelaḡa taudia bona itorena taudia ese danu ma e ḡonaḡonalaia, e hereva heheni, eto, Ia ese idau taudia e hamauridiava, matona sibona se hahemauri. 32 Hari Keriso, Israel pavapavana, mani satauro amo aine dada dobi; baita itaia, bena baita abidadama henia. Ia ida e hasataurodia hebou taudia raruosi danu ia e ḡonaḡonalaia.

33 Dina tubua ela bona dina ḡelona tanobada na dibura ese e goru ahu. 34 Dina ḡelona ai Iesu e lolo, eto, Eloi, eloi, lama sabaktani; anina be Egu Dirava e, egu Dirava e, dahaka dainai vada o rakatanigu. 35 Badibadinai e gini taudia haida e kamonai, eto, Ia na Elia e boiriamu. 36 Bena tau ta e heau, puta ta vine ranuna iditana ai e urua diho, siriho ai e gwadaia kau, bena e duduia dae, baine topoa eiava. Eto, Mani do: aita itaia, Elia bainema baine abia dobi eiava. 37 A Iesu ma e lolo dagu, bena vada e mase. 38 Una negana ai Dubu Helaḡa seseahuna e hedare parara, atai amo ema bona henu. 39 Tuari biaguna ta badibadinai e gini, e itaia unu e mase toma, bena eto, Momokani, ina na Dirava Natuna.

40 Herarai hahinedia haida danu dauhai e gini. Haida bini: Maria, hane Magdala; bona Maria, Iakobo maraḡina bona Iosef sinadia; bona Salome. 41 Idia iboudiai Galilea ai ia murinai e rakava bona isiaina e lao heniva. Bona ia ida Ierusalem e dara dae hahinedia haida danu.

42 Adorahi ai, badina be haheḡoeva dinana bunai, kerukeru be Dina Helaḡa, 43 Iosef, Arimatea tauna, kaunsil tauna ta mai harina namona bona Dirava ena basileia e nariava tauna, na Pilato dekena ela, e noia goadagoada, Iesu tau-anina baine abia eto. 44 Pilato e hoa dikadika, badina be Iesu vada e mase haraḡa; bena tuari biaguna e boiria, Iesu ena mase negana e nanadailaia. 45 Tuari biaguna ese e hamaoroa ḡoeva, bena tau-anina Iosef e henia.

46 Iosef ese dabua aukana e hoia; bena Iesu e abia dobi, dabua ai e kumia, nadi hagana ai e ḡeia kohuana lalonai e atoa vareai; bena nadi badana amo iduara e kurea ahu. 47 Maria, hane Magdala, bona Maria, Iosef sinana, raruosi ese e atoa gabuna e itaia kau.