Ibru
Lovoang Ti Limixin Nunu Me Ibru
Levelinga Loklox Axasep
Levenmaares 67–69 A.D.
Se ne Iesu ga urut uto vana at laxalibet, lavantun sangaun mi lavalimo levenmaares ga men pe i la lara laradi ga malagan i na lovoang tinedi limixin me Judaia, diga so asen bok di do leme Ibru. Laradi ga malagan i na lovoang kopmen neni goxo malagan li laasen teren. Na limixin me Ibru nedi diga nunu at ne Iesu, la lentaba luvuttadi diga lox asongot di la diga doma i do dinamlong ti loklok at lotu atnedi me Judaia la dina ke xepe lununu atdi keneng at ne Iesu Karisito. Laradi ga malagan i na lovoang tinedi ga vaase pe di do nemen di guta mu asu i na. Mila ne Iesu Nitna ne Moroa neni mun i silok ti ne Moses. Ne Iesu neni lamgomgo ruturun at lotu, neni im gomgonga nedi luvuttadi di lok leven gugu at lotu. Lara langas mo ga nemen kusu ti sev amet lempanga mi lavanuet kangkedek atdi xusu dinam taba min ti ne Moroa. Anai ni lenep at lekabus migomgo, ketla ne Iesu ga lok kepe mo loklok. Neni ga vot at na lavatbung menemen kusu ti lok pes laxakapmek basinge dik, neni ga met la ga raba labantuxu ren. Laradi ga malagan na lovoang ni ga lox axasep na langas tinedi xusu nedi di noxo repes basinge ne Iesu, ketla dinam tembeng atmatkun teren.
Lengkot silok keneng at na lovoang
1:1-4 Moroa ga tu asuvos min tidik keneng at ne Nitna.
1:5–2:18 Karisito neni i silok tinedi lubungangelo.
3:1–4:13 Karisito neni i silok ti ne Moses.
4:14–7:28 Karisito neni i silok ti lubungmaasa.
8:1–9:28 Lekabus maxat ne Karisito ga lox i, ni i silok ti lekabus migomgo.
10:1-39 Karisito ga raba lorooro ren at legesa xonaleng ti limixin axap.
11:1-40 At lununu mun nedik tabat kis aulis.
12:1–13:19 At lurutu alolos atdik, nedik ata nunu la ta ronga res at ne Karisito.
13:20-25 Levelinga loklox abeese.
1
Nitna Ne Moroa I Silok Ti Lubung Angelo
Ganoxa ne Moroa ga vaase ri lavalabat atdik at levenngusno atnedi lavaeme vapaase ali, at levengkonaleng getgesara la at leventaangas axap. * Mt 21:38; Jo 1:3Ketla at na levenaleng melemu at lovotpot at ne Iesu, Moroa ira paase nga ridik limixin nunu at lungusno ne Nitna. Neni ga soxolik ka i xusu naba ruuna ka levempanga axap, la keneng at ne Iesu, ne Moroa ga rudum li levempanga axap. * 2 Ko 4:4; Gu 2:33-34; Kl 1:20; Ib 8:1Ne Nitna i lox asuusu lisisixam at ne Moroa la ni lampenaxa rinotno ren. Ne Nitna ik lok tatao levempanga axap at na lavatbung menemen la mo levempanga i mumu asu levelinga ren i lolos aleng. Neni ga lok langas ti limixin kusu dina dadat basinge laxakapmek. Melemu at na, neni ga xis saparap lekngen tino at Loorong Silok ne Moroa to vana at laxalibet.
* Pl 2:9Kuren la neni ga ruuna ka lixitkis silok mavana at lubung angelo, kerekngan mo laasen neni ga ruuna ka vam i, ni laasen i silok tidi. * Gu 13:33; Ib 5:5; 1 Let 17:13Moroa goxo vaase ri tara ta angelo do,
“Nenu ne Nuruk. Ningina nia a lok ngan ne Tamam.” Sam 2:7
La ni goxo vaase mumu taangelo xeretna,
“Nenia ana lok ngan ne Temen, la neni na lok ngan ne Nuruk.” 2 Sml 7:14
* Ro 8:29; Sam 97:7La at loxonaleng ne Moroa ga riki asi lamdak avot teren ude xopok ti na lavatbung menemen, neni ga lok,
“Lubung angelo axap tarak dina lotu saparav i.” Lal 32:43
Moroa ga vaase mumu lubung angelo la neni ga lok,
“Neni i lok lubung angelo ren di lok ngan laramera manman, la lavasaxaruki ren di lok ngan laxao at lavanga i mam.” Sam 104:4
Ketla neni ga lok ti ne Nitna xeretna,
“Nenu ne Moroa, lixitkis orong taram naba nemen amisik la kopmen texavaxap teren. Nenu unabam gomgonga limixin taram mi lodoxoma manmanton la levelinga ruturun. Nenu u vavara aleng ti loklok manmanton la u xopara ri laxakapmek. Kuren la Moroa, ne Moroa ram ira suxa aumsu vam u mi lomomo i silok aleng, mo i volo lomomo atnedi larapen tangas taram.” Sam 45:6,7
10 Neni ga lok bok ti ne Nitna xeretna,
“Nenu Leeme Silok, ganoxa at lereot uga rudum li lavatbung menemen mi laxalibet mi lukngam. 11 Na levempanga uga rudum li di, naba sonao la dina lok ngan lempanga gamasa, ketla nenu unaba rooro amisik. La dinaba rem teterek ngan labantamon. 12 Unaba vegun pes di ngan labanmo mikmidi, la ngan lavanga singsiga unaba soxun kepe i, ketla nenu xopmen unak lox ekun lodoxoma ram, la kopmen bok taxavaxap at lorooro ram.” Sam 102:25-27
13 Moroa goxo vaase ri tara atnedi lubung angelo xeretna do,
“Unat kis de saparap lakngak tino, se nenia ana lok limixin munepen minu, na ngan loxot burubut ti luxangkedek taram.” Sam 110:1
14  * Sam 34:7; 91:11Lubung angelo nedi leventoonan avukat mun, dik lok tooro ne Moroa. La neni ik sak tiki di rik lok tooro nedi limixin ne Moroa ga soxolik ka vam di xusu dinaba lok kaka loklox arooro.

*1:2: Mt 21:38; Jo 1:3

*1:3: 2 Ko 4:4; Gu 2:33-34; Kl 1:20; Ib 8:1

*1:4: Pl 2:9

*1:5: Gu 13:33; Ib 5:5; 1 Let 17:13

*1:6: Ro 8:29; Sam 97:7

*1:14: Sam 34:7; 91:11