5
Lavamaasa amgomgo axap Moroa i soxolik ka di xantubu at limixin kusu dina ru katling di at lugugu at ne Moroa. Dim taba leventamtaba ri tong loklox avukat ti ne Moroa la diplavang bok mi levempanga mi lavanuet kangkedek ti vung kimit laxakapmek at limixin. * Ib 4:15Lamaasa gomgo im suma leveloklok tong pen, kuren la i epovo do ni na suma rooro nedi di lok laxakapmek mila kopmen dinaklen i do mo levempanga i lok kapmek. * Mas 9:7; 16:6Ni lavasuun teren la lamaasa gomgo naba lok laplavang mi levempanga ri laxakapmek axa ren, la ri laxakapmek bok at limixin.
* Pas 28:1Kopmen na epovo do tara na lok ka mo lugugu mi lavavara mun teren, ketla ne Moroa xa naba soxolik ka i ngan neni ga soxolik ka ne Aron. * Ib 1:5La ne Karisito bok kopmen goxo xip ka mo lugugu silok at lamaasa gomgo mi lavavara ren. Ketla ne Moroa ga lok tin keretna,
“Nenu Nuruk, ningina nia a lok ngan ne Tamam.” Sam 2:7
* Ib 6:20; 7:1,17La at loxot petpes at Lovoang Kaala Moroa ga lok bok tin keretna,
“Nenu Lamaasa Avolo ngan ne Melkisedek, la kopmen taxavaxap at lugugu ram.” Sam 110:4
* Mt 26:39-46; Pl 2:6-8Ap mo levenaleng ne Iesu ga rooro ren at na lavatbung menemen, neni ga sing eburu mi lerengteng silok ti ne Moroa do na lox arooro i basinge lanmet. La ne Moroa ga sepo lisingising teren mila neni ga lox asi i maxopok at lavavara at ne Moroa. I ruturun do neni ne Nitna ne Moroa, ketla mo losongsongot neni gap kiv i, ga lox epovo i xusu na mu asu lavavara at ne Temen. Kerepmo la ne Moroa ga lox agagas li i, la neni ga vot ngan ta lavasuun at lorooro avolo rinedi ding tonga res teren. 10  * Ib 5:6La ne Moroa ga lok li i ngan Lamaasa Avolo ngan ne Melkisedek.
Nemen Mita Subu Kot Kantubu
11 Ma ruuna laxalinga solo mumu ne Iesu atla neni Lamaasa Avolo. Ketla naba lolos ti soxomus asu na levelinga rinimi mila lodoxoma atnimi kopmen na gagas ti lok ka na levenanasa. 12  * 1 Ko 3:1-3At na levenaleng i epovo do mina lok ka lugugu ri anasa limixin mi levelinga at ne Moroa. Ketla kopmen mina epovo mila move mik pakes kusu tara na lox ase amu manga nimi mi levenanasa avot at levelinga at ne Moroa. I lok ngan ta do nemi move mi lok ngan lubung kadede, di tus at luvutnen di. Kovisi mina epovo kusu mina anan leveluxa lolos. 13 Lara do i rooro mi ladan tus at nenen, i ngan laxadede. I lok ngan ta do nemi xovisi mina ven kibis levempanga i lox avukat la levempanga i lok kapmek. 14  * Ro 16:19; Pl 1:10Ketla tinedi dira mukun pam at lununu atdi, di epovo dina ven kibis levempanga i lox avukat la levempanga i lok kapmek, mila di xoxonom kaka amisik levelinga at ne Moroa.

*5:2: Ib 4:15

*5:3: Mas 9:7; 16:6

*5:4: Pas 28:1

*5:5: Ib 1:5

*5:6: Ib 6:20; 7:1,17

*5:7: Mt 26:39-46; Pl 2:6-8

*5:10: Ib 5:6

*5:12: 1 Ko 3:1-3

*5:14: Ro 16:19; Pl 1:10