5
Lanasip Ga Lok Ka Lugun Linga Boro At Ne Moroa
* Li 4:2,10; Ais 29:11; Isi 2:9-10Melemu nia aga ven lugun linga ro at lekngen tino ap mo Lara gat kis to at loxonin orong. Mo lugun linga ga umsu mi levenmamalagan to melamgo la to bok melemu ren, digam lut avarang i mi lavanuti levelumlut. La nia aga ven laangelo lolos gap kup silok mi lususue xeretna, “Nege i epovo do na ba kaxat na levelumlut la na obes na lugun linga?” Ketla goxopmen teta ro vana at laxalibet kopla de xopok at lavatbung menemen kopla ro maxopok at lavatkangka gita epovo xusu na obes mo lugun linga la gita us mo levelinga ga nemen keneng teren. La nia agang teng aleng mila kopmen teta gita epovo xusu gita obes i nom lugun linga la ri us mo levelinga. * Lur 49:9; Ais 11:1,10; Li 22:16Melemu lara atdi luvuttadi amgomgo ga lok tia, “Nemen utang teng. Mo laion, ni at libibinat at ne Juda, la livisik li at ne Devit, neni ira but asi vam lavamunepen min, la neni mun i epovo ri sak korop mo lavanuti levelumlut la na obes mo lugun linga.”
* Sak 4:10; Jo 1:36; Li 1:4; 5:12; 13:8La aga ven lara Lanasip ga tu kantubu rinotno at nom loxonin orong, la mo lavanuet levempanga rooro eburu mi loxongkulao amgomgo diga tu kangkan i. Lanasip ga tu, ga ven ngan ta do limixin diga sev amet pam i. Neni ga ruuna lavanuti levengkom la lavanuti levengkatli, nedi leventoonan mo ne Moroa ga riki asi di ri lengkot axap at na lavatbung menemen. * Li 4:2,10La mo Lanasip gat pas la ga lok ka mo lugun linga boro at lekngen tino at ne Moroa, mo gat kis at loxonin orong. * Li 8:3-4; 14:2; 15:2; Sam 141:2Neni ga lok ka mo lugun linga, la nom lavanuet levempanga rooro eburu mi nom legepu sangaun mi lavanuet loxongkulao amgomgo diga xis tiktikbu mi lempatgulom atdi ro melamgo at Lanasip. Nedi getgesara digam tebeng lengkon taaleng eburu mi leventingtigon gol mo ga umsu mi levempavaxan una so mavak. Ni ga ru katling levesingising atnedi limixin at ne Moroa. * Sam 33:3; 40:3; 96:1; 144:9; Li 14:3La nom lavanuet levempanga rooro eburu minedi loxongkulao amgomgo diga vixan lara loxompixan maxat, i lok keretna,
“Nenu u epovo rinotno xusu una lok ka lugun linga la una ba kaxat kepe mo levelumlut teren mila limixin diga sev amer u. Ketla uga roo xat amlong la at nom mun lada ram uga un ka amlong limixin ti ne Moroa. Nedi at levenabung mixin axap la boro bok at levempapaase vetpes, la boro bok at lenbantuxu vetpes, la boro bok at larabibinat petpes. 10  * Pas 19:6; Ais 61:6; Li 1:6; 20:6; 22:5La uga lok katling di ngan lavamaasa at Linintoo ram kusu dina lok lugugu at ne Moroa, la dinabam gomgonga limixin axap at na lavatbung menemen ngan limixin amgomgo atdi.”
11  * Dan 7:10; Ib 12:22Melemu aga milik la aga ronga buaang nedi laxanangelo, diga umsu aleng la a goxo epovo xusu ana us di. Diga tu kangkan mo loxonin orong eburu mi lavanuet levempanga rooro la loxongkulao amgomgo. 12  * 1 Let 29:11; Li 5:6La diga vixan silok keretna,
“Lanasip, no limixin diga sev amer i. Neni i epovo rinotno xusu na ruuna ka lolos, lapnovos, lakleklen, lasinorong, leemi asu la leveloklox anarong.”
13  * 1 Let 29:11; Li 4:2,10Melemu aga ronga leemi asu boro at lempanga axap ne Moroa ga rudum li di, nedi limixin eburu mi levempanga mi lavanuet kangkedek atdi, la nedi bok lempanga at laxalibet la lempanga nade xopok at lavatbung menemen la lempanga bok dik lok keneng at lebelen laxangka la lempanga dik lok at lebelen laras. Diga vixan,
“Ti mo Lara it kis at loxonin orong la ti Lanasip bok, ma raba numu mi leveloklox anarong, lasinorong, leemi asu la lolos na nemen amisik la kopmen taxavaxap teren.”
14 La mo lavanuet levempanga rooro diga lok, “I ruturun.” La mo loxongkulao amgomgo diga xis tiktikbu mi lempatgulom atdi la diga lotu parap ne Moroa eburu mi Lanasip.

*5:1: Li 4:2,10; Ais 29:11; Isi 2:9-10

*5:5: Lur 49:9; Ais 11:1,10; Li 22:16

*5:6: Sak 4:10; Jo 1:36; Li 1:4; 5:12; 13:8

*5:7: Li 4:2,10

*5:8: Li 8:3-4; 14:2; 15:2; Sam 141:2

*5:9: Sam 33:3; 40:3; 96:1; 144:9; Li 14:3

*5:10: Pas 19:6; Ais 61:6; Li 1:6; 20:6; 22:5

*5:11: Dan 7:10; Ib 12:22

*5:12: 1 Let 29:11; Li 5:6

*5:13: 1 Let 29:11; Li 4:2,10