1-2 Mi niom moori ulaŋoyom ta kembena. Kokototo ituyom mi kombot la kusiyom bizin kopon mbarman. Mi sombe zin pakan tizorzooro yom pa sua ki Merere, ina ambai. Kezem sua pizin. Pa zin ko tirre mae pa mbulu tiom iŋgeeze men, mi leyom ŋger pizin, mi komototo Anutu mi keleŋleŋ la kalŋaana. Tana mbulu tiom ambaiŋana tana ko iyaaru zin ma tiwe Krisi lene.✡1Kor 7:14+; Kol 3:18; Tit 2:5 3-4 Kakam ŋgar biibi pa aigau mat kana be ipeŋgeeze ruŋguyom pepe. Pa mbulu kembei kumbuk uteyom ruunu, som kuur aigau milmilŋana ila kuliyom, som kezeebe yom pa mburu ndabokbokŋan, ina koroŋ sorok ki kuliyom. Mi niom kozo kakam kinkiini pa aigau ŋonoono ta leleyom kana i. Pa sombe leleyom luumuŋoyom mi manneŋoyom, na mbulu tiom tina ko iwe kembei aigau ŋonoono piom. Aigau ta kembena, ko imbotmbot ma alok. Mi Anutu ire kembei koroŋ biibi mi koroŋ ŋonoono.✡1Tim 2:9+ 5 Muŋgu zin moori ta tiwe Anutu lene mi tipase pini, mi tiurur matan pini na, tiurur aigau ta kembena. Pa tikototo zitun mi timbotmbot la kusin bizin kopon mbarman. 6 Kakam ŋgar pa Sara. Ni ileŋleŋ la kusiini Abaraam kalŋaana, mi iwatwaati be biibi kini. Mi niom kewe ni lutuunu moori bizin kek. Tana kakamam mbulu ambaiŋana men. Mi sombe koroŋ pakan ikam yom ma komoto, na kakam ŋgar pa pepe. Kapase pa Anutu. Naso koto Sara pa mbulu kini.✡Un 18:12

7 Mi niom tomooto ta kembena. Kombotmbot raama kusiyom bizin na, kakam ŋgar pizin mi leyom ŋger pizin. Kokena kakam ŋoobo mbulu pizin, to ipakaala suŋŋana tiom. Pa niom kuute: Zin mburan biibi som. Tamen zin tomini zan be tikam kampeŋana ki Anutu mi mbotŋana mata yaryaaraŋana kembei ta niom na. Tana kakam kat mbulu pizin.✡1Kor 7:3; Ep 5:25; Kol 3:19; 1Tes 4:4

8 Ayo. Iŋgi be aŋpemet sua tio. Niom ta boozomen bela kulup leleyom mi ŋgar tiom ma iwe tamen. Sombe tomtom tiom pakan lelen ipata, na kagaaba zin pa pataŋana kizin. Mi sombe lelen ambai, na niom tomini leleyom ambai. Ku'urur leleyom par piom kembei ta zin toŋmatiziŋ, mi kaparkampewe yom, mi kaparmuŋaiŋai yom. Mi kakam ŋgar biibi pa ituyom zoyom pepe. Kokototo ituyom.✡Lu 6:36; Ro 12:10,16; Pil 2:1+; Kol 3:12 9 Mbulu sananŋana na, kopokot pepe. Mi sombe wal pakan tipiri sua sananŋana piom, na kepekel pepe. Kusuŋ Anutu be ikampe zin. Pa Anutu iboobo yom ma kewe lene bekena kakam mbulu ta kembena. Naso kampeŋana kini ise tiom.✡Mt 5:44; Ro 12:14; 1Tes 5:15 10 Pa sua imbot pataaŋa kek ta kembei:

13 Niom sombe kakam kinkiini pa mbulu ambaiŋana, na asiŋ ko irao be ipasaana kat yom? Som.✡Ro 8:35+ 14 Tamen sombe kakam mbulu ndeeŋeŋana mi tiseeze motoyom pa, na leleyom ambai men. Pa kampeŋana ki Anutu ko imbotmbot se tiom. Tana sombe tomtom tikam mbulu sa be tipamoto yom, na komoto pepe. Mi kakam ŋgar boozo ma kopoyom irru pa pepe.✡Mt 5:10, 10:28; 1Pe 2:20, 4:14 15 Kakam Krisi ma iwe biibi pa leleyom. Mi kuurpe ŋgar tiom pa mazwaana ta boozomen. Beso tomtom sa iwi yom pa uunu tau kapase pa Krisi mi ku'urur motoyom pini, nako karao be kepekel kat wiŋana kini.✡Mbo 119:46; Ŋgo 4:8+; Kol 4:6 16 Mi motoyom iŋgal be koso sua luumuŋana men pini, mi leyom ŋger pini. Mi kapa pai tiom ma ambai men pa Anutu mataana. Beso wal pakan tiŋgal sua piom, mi tipasaana zoyom pa uunu tau kewe Krisi lene mi kototo mbulu kini, na mbulu tiom tana ko ikam zin ma kan miaŋ pa sua kizin.✡Tit 2:8; Ibr 13:18; 1Pe 2:12 17 Tana sombe Anutu leleene be tabaada pataŋana pa mbulu ambaiŋana ta takamam, ina ambai. Mi tere iti. Kokena takam mbulu sananŋana mi tabaada pataŋana pa. Pa mbulu ta kembei, ina ambai som. Ina tapasaana Krisi uruunu.✡1Pe 2:20

18-19 Kakam ŋgar pa Krisi. Ni tomtom ndeeŋeŋana. Tamen ikam iti tomtom sananŋanda murindi, mi ibaada pataŋana ma ire yoyouŋana pa sanaana kiti, bekena ikam ti ma tala ki Anutu. Mi uraata kini tana, ni ikam pa tamen mi imap. Kaimer ko irao ikam mini na som. Tana ni isu toono ma iwe tomtom, mi tipuni ma imeete. Mi Bubuŋana ipei i ma imaŋga mini, to ila ma ikam sua pizin bubuŋan ta tizeebe zin lela ruumu sanaana leleene na. *Sua ti ka ŋgar imbot mat som. Tamen wal ŋgarŋan pakan tiso ko ka uunu ta kembei: Zin aŋela sananŋan ta tito Sadan mi ziŋan titop na, tikam zooroŋana biibi kat pa gorgor ki Noa mi tipei mbulu sananŋan boozo (Re Un 6:5). Tana Anutu iur zin lela ruumu sanaana be tinaama sua pa mbeŋ kaimer (re 2Pe 2:4). Indeeŋe Krisi imaŋga mini pa naala mi isala pa saamba na, ila kizin bubuŋan sananŋan tana, mi isoyaara sua pizin ta kembei: Ni ilip pa Sadan mi zin kek. ✡Ro 5:6, 8:11; 2Kor 13:4; Ibr 9:15,28; 1Pe 4:6 20 Zin bubuŋan tana, ta muŋgu tizooro Anutu sua kini indeeŋe gorgor ki Noa na. Tamen Anutu iur kadoono pizin karau som. Inamnaama Noa ma iposop wooŋgo poŋana ma imap kat, to iur kadoono pizin. Zin wal ta tilela wooŋgo leleene na, boozo pe som. Wal lamata tel men. Mi yok isur zin ma tila, tabe iwe zaala pizin ma Anutu ikamke zin ma timbot ambai.✡Un 6:5–7:24 21 Mbulu tina iwe kin pa yok kamŋana ta koozi ikamkewe yom na. Iŋgi aŋso pa mbulu tau yok ise kulindi mi iŋguuru muk ma isu na som. Pa yok kamŋana ka ŋgar ŋonoono ta kembei: Anutu ipus ti ma lelende iŋgeeze, mi tumbuk sua be toto Anutu zaala kini.✡Ro 10:10; Ep 5:26; Tit 3:5; Ibr 10:22 22 Mi ina ikamke yom paso, Anutu ipei Yesu Krisi ma imaŋga pa naala, mi isala pa saamba kek. Tana koozi, Krisi imbotmbot la Anutu namaana woono, mi zin aŋela ziŋan zin bubuŋan ta zanŋan mi mburanŋan na, timap timbot la ni kopo mbarmaana.✡Mbo 110:1; Ro 8:34,38; Ep 1:20+