2
Zin Pilipai bela tikoto zitun
Niom tina kesekap la ki Krisi ma kewe lene kek, mi ni ipombolmbol yom. Mi mbulu kini ta iur leleene piom, ina ipotor leleyom. Mi Bubuŋana tamen ta izebzeebe yom, mi iluplup yom ma kewe tamen. Mi mbulu ki Anutu tau leleene izanzaana piti mi imuŋaiŋai iti na, kere kek. Tana, kaparlup leleyom mi ŋgar tiom ma iwe tamen, mi kuur leleyom par piom. Naso kakam yo ma leleŋ ndabok ma ndabok kat. Ro 15:5 Mi kurru zaala be zoyom iwe biibi pepe, mi kapakur ituyom pepe. Bela kokototo ituyom, mi kiwidit waeyom bizin pakan. Kere zin kembei zin ambaimbaiŋan ma tilip piom. Ro 12:10+; Ga 5:26; 1Pe 5:5 Tana motoyom iŋgal ituyom men pepe. Kakam ŋgar pa waeyom bizin tomini. 1Kor 10:24,33, 13:5
Krisi ipatooŋo iti pa mbulu ki tokoto itundu
Tana kaparkamam mbulu ta kembei piom. Naso koto ŋgar ki Yesu Krisi. Mt 11:29; Yo 13:15; 1Pe 2:21; 1Yo 2:6
Pa ni kembei Anutu itunu, mi ni raraate pa Anutu.
Tamen leleene be ikiskis zaana mi mbotŋana ta ki Anutu i som. Yo 1:1+, 17:5; Kol 1:15; Ibr 1:3
Zaana mi mbotŋana tana, ni iur lae, mi izem itunu ma iwe koroŋ sorok.
Mi ikam mbulu mi mbotŋana ki mbesooŋo sorok,
mi isu toono ma iwe tomtom kembei ta iti. Mt 20:28; Yo 1:14, 13:4+; 2Kor 8:9; Ga 4:4; Ibr 2:14+
Tana ni iwe tomtom kembei ta iti, mi imbot la mazwanda.
Mi ikototo itunu, mi itoto mbulu ki mata leŋleŋŋana ma ila ila irao imeete.
Mi meeteŋana kini tomini, ambai som kat.
Pa imeete sala ke pambaaraŋana. Mt 26:39; Yo 10:17+; Ibr 5:8, 12:2
 
Tanata Anutu iwiti ma isala ta kor a,
mi ikami ma zaana iwe biibi kat.
Ilip pa koroŋ ta boozomen zan. Mbo 110:1; Yo 17:1+; Ŋgo 2:33; Ep 1:20+; Ibr 1:3+
10 Pa isombe wal ta munŋaana men timap ma tilek kumbun pa Lutuunu,
mi tiso ta kembei: “Yesu Krisi, ni ta zaana biibi.”
Zin ta timbot toono i, mi zin ta timbot saamba a, mi zin Andewa kan tomini. Mt 28:18; Yo 5:23; Ro 14:11
11 Tana wal ta boozomen kola timap ma tiso sua ila iwal biibi matan ta kembei:
“Yesu Krisi, ni Merere.”
Mi zin ko tipakur Tamaana Anutu zaana. Yo 13:13; Ŋgo 2:36; Ro 10:9; 1Kor 8:6; Tur 5:8+
Zin Pilipai tiwe kembei pitik be tiur mat pizin tomtom
12 O niom wal tio, indeeŋe ta mata popoten mi imar na, keleŋleŋ la sua mi kototo. Tana sombe itiŋan tombot, som itiŋan tombot som, na komototo Anutu, keleŋleŋ la kalŋaana, mi kipiyotyooto uraata mi mbulu tau iswe kembei Anutu ikamke yom kek. Mi sombe aŋrao aŋma som, na motoyom iŋgal kat be kakamam ta kembei. Mbo 2:11; 1Pe 1:17 13 Mi uraata tana, niom ituyom men ko kakam som. Pa Anutu itunu ikamam uraata biibi la leleyom, mi ikamam yom ma leleyom be koto ŋgar kini, mi ipombolmbol yom be kakam. Yo 15:5; 2Kor 3:5; Ibr 13:21
14 Tana koyo kwoyom pizin tomtom mi kaparzorzooro pepe. Kakam koroŋ ta boozomen raama leleyom ambai men. 1Kor 10:10; 1Pe 4:9 15 Naso leyom uunu sa isaana som, mi leleyom iŋgeeze men, mi mbulu tiom ta boozomen indeeŋe men. To kombot kembei Anutu lutuunu bizin ŋonoono ila wal sananŋan mi zorzooroŋan mazwan, mi ku'urur mat pizin kembei zin pitik ta tiyaryaara pa maŋaanaŋana i. Mt 5:14-45; Ep 5:1,8; Tur 1:20 16 Paso kikiskis sua mata yaryaaraŋana mi kazarra la pizin tomtom. Tana kakamam ta kembena. Beso kaimer ma nol ki Krisi ipet, na mbulu tiom ko iswe yo kembei aŋpun sorok mburoŋ som, mi aŋkam kat uraata tio. To niŋ se mi menmeen yo piom. Ga 2:2; 1Tes 2:19+ 17 Mbulu tau urlaŋana tiom ipiyotyooto mi kakamam be kembeeze pa Merere, ina kembei kakamam patoronŋana pini. Tana nio, sombe tipun yo ma siŋiŋ ireere, nako leleŋ ambai pa men. Pa ina ko iwe kembei yok baen ri ta ireere sala patoronŋana tiom tana be iposop ma imap kat. Tana sombe tipun yo ma aŋmeete, na nio ko leleŋ ambai men. Ŋgo 21:13; Ro 15:16; 2Tim 4:6 18 Mi niom ta boozomen tina tomini, leleyom ambai. Naso itiŋan lelende ambai mi menmeen ti. Pil 3:1, 4:4
Paulus iso iŋgo Timoti pizin Pilipai
19 Merere Yesu, ni ikam yo ma aŋurla ta kembei: Molo som to aŋgo Timoti ma ima be ire yom mi ipombol yom. Mi so imiili ma imar mi iso uruyom, to ko ipombol yo tomini ma leleŋ ambai. 20 Nio leŋ tomtom toro sa ta kembei som. Ni itutamen ta leleene raraate kembei ta nio i. Pa iur kat leleene piom mi leleene ilip be iuulu yom. 21 Mi zin wal pakan na, matan iŋgalŋgal zitun men. Tana tikam ŋgar be tiuulu uraata ki Yesu Krisi som. 1Kor 10:24, 13:5; 2Tim 4:10,16 22 Mi Timoti na, niom kuute i kek. Ni igabgaaba yo kembei ituŋ lutuŋ, mi niamru ambesmbeeze pa uraata ki uruunu ambaiŋana. Mi ibaada pataŋana pa Krisi zaana mi imender mbolŋana. Tana ni irao pa uraata. 1Kor 4:17; 1Tim 1:2 23 Tana nio ko aŋbot mi aŋre muŋgu: Ko tiur zaala pareiŋana pio? Tona loŋa men mi aŋgo i ma ima. 24 Mi nio aŋurla ta kembei: Merere ko iur zaala sa pio, be molo som to ituŋ aŋma mi aŋre yom tomini.
Mbulu ki Epaproditus iwe kin ambaiŋana. Pa ni izem kat itunu pa uraata ki Krisi
25 Mi toŋmatiziŋ kiti Epaproditus ta koŋgo i ma imar be iuulu yo na, nio aŋre kembei ambai be loŋa mi aŋpimiili i ma ima mini. Ŋonoono, ni igabgaaba yo pa uraata, mi niamru amporou mbolŋana pa uruunu ambaiŋana. 26 Tamen iŋgi leleene isaana piom ta boozomen, mi leleene be imiili ma ire yom mini. Pa ni iute kembei niom keleŋ uruunu pa mete kini kek. 27 Mi ina ŋonoono. Pa mete biibi ikami ma rimen mi imeete. Tamen Anutu imuŋai i. Mi ni itutamen som. Anutu imuŋai yo tomini. Pa sombe ni imeete, so ikam pataŋana toro pio ma isala ki. 28 Tana leleŋ be loŋa mi aŋgo i ma ima be kere i. Naso leleyom ambai mini, mi nio tomini leleŋ ipata mini som. 29 Tana leleyom ambai pini mi kakami. Pa ni tomtom ki Krisi. Wal ta kembei na, niom irao kapakur zin. 1Kor 16:16+; 1Tes 5:12; 1Tim 5:17 30 Kere. Ni rimen mi imeete pa uraata ki Krisi. Paso, ni iute tau niom kombot molo ma karao be ku'uulu yo som. Tanata ikam ŋgar pa itunu kuliini som, mi ikam se ki mburaana, mi imar ipet. 1Kor 16:17

2:2: Ro 15:5

2:3: Ro 12:10+; Ga 5:26; 1Pe 5:5

2:4: 1Kor 10:24,33, 13:5

2:5: Mt 11:29; Yo 13:15; 1Pe 2:21; 1Yo 2:6

2:6: Yo 1:1+, 17:5; Kol 1:15; Ibr 1:3

2:7: Mt 20:28; Yo 1:14, 13:4+; 2Kor 8:9; Ga 4:4; Ibr 2:14+

2:8: Mt 26:39; Yo 10:17+; Ibr 5:8, 12:2

2:9: Mbo 110:1; Yo 17:1+; Ŋgo 2:33; Ep 1:20+; Ibr 1:3+

2:10: Mt 28:18; Yo 5:23; Ro 14:11

2:11: Yo 13:13; Ŋgo 2:36; Ro 10:9; 1Kor 8:6; Tur 5:8+

2:12: Mbo 2:11; 1Pe 1:17

2:13: Yo 15:5; 2Kor 3:5; Ibr 13:21

2:14: 1Kor 10:10; 1Pe 4:9

2:15: Mt 5:14-45; Ep 5:1,8; Tur 1:20

2:16: Ga 2:2; 1Tes 2:19+

2:17: Ŋgo 21:13; Ro 15:16; 2Tim 4:6

2:18: Pil 3:1, 4:4

2:21: 1Kor 10:24, 13:5; 2Tim 4:10,16

2:22: 1Kor 4:17; 1Tim 1:2

2:29: 1Kor 16:16+; 1Tes 5:12; 1Tim 5:17

2:30: 1Kor 16:17