Ro Ta Ila Pizin Iburu
1
Anutu Lutuunu ta iswe kat Anutu piti
1 Muŋgu Anutu kalŋaana ila iwedet ki kwoono bizin pa zaala matakiŋa, mi tumbundu bizin tileŋleŋ sua kini ila kizin. 2 Tamen mazwaana kaimer kana ta ti na, iti teleŋ Anutu kalŋaana ila ki ni itunu Lutuunu tau. Indeeŋe Anutu iur saamba mi toono na, Lutuunu ta iwe zaala pa koroŋ ta boozomen ma tipet. Mi Anutu ipeikati be koroŋ ta munŋaana men imap ma iwe lene.✡ Mbo 2:8; Mt 11:27; Yo 1:3; Ŋgo 2:17; Kol 1:16; Ibr 12:25 3 Ni ta iswe kat Anutu piti. Pa Anutu mburaana mi azuŋka kini ramaki mbulu kini boozomen ta zaana biibi pa i, ta imap ma imbot se ki Lutuunu. Mi sua mbolŋana ki Lutuunu ta ikiskis koroŋ ta munŋaana men ma timbot murin. Ni izem itunu ma imeete pizin tomtom bekena ipus zin pa sanaana kizin ma tiŋgeeze kat pa Anutu mataana. Mana imiili ma isala mini saamba, mi mbuleene isu Anutu ta mbura keskeezeŋana na namaana woono be ikam peeze.✡ Yo 1:14; Ŋgo 2:33+; 2Kor 4:4; Kol 1:15-20; Ibr 9:11+; Tur 4:11
Lutuunu zaana biibi ma ilip pizin aŋela
4 Anutu, ni iur Lutuunu ma iwe biibi mi zaana ilip pizin aŋela.✡ Ep 1:20+; Pil 2:9+ 5 Pa kere. Kena so Anutu iso pa aŋela tasa ma isombe:
Nio lutuŋ ta nu na.
Koozi nio aŋwe nu tomom.✡ Mbo 2:7; Mt 3:17; Ŋgo 13:33; Ibr 5:5
Som na isombe:
Nio ko aŋwe ni tamaana,
mi ni ko iwe nio lutuŋ.✡ 2Sam 7:14
Kembei lak. Mi iŋgi som.
6 Indeeŋe Anutu ikam itunu Lutuunu muŋgamuŋga ma imiili ma isala mini pa muriini na, iso ka sua ta kembei:
Aŋela ta boozomen ki Anutu ko tilek kumbun pini mi tipakuri.✡ Mbo 97:7; Ro 8:29; Kol 1:18
7 Mi zin aŋela na, kan sua imbot ta kembei:
Anutu ikam zin aŋela kini ma tiwe kembei ta miiri mi you miaana. Pa zin na, mbesooŋo kini men. * Sua ti ka ŋgar ta kembei. Zin aŋela raraate pa Yesu som. Pa zin na, Anutu mbesooŋo kini men. Mi mbulu kizin itortooro kembei ta miiri mi you. Tamen Yesu, ni Anutu itunu Lutuunu. Mi mbulu kini imbot pataaŋa. Itortoori som. Tana ni ilip pizin aŋela.✡ Mbo 104:4
8 Lutuunu na, Anutu iso pini ta kembei:
Anutu, nu ko mbotmbot se murim peeze kana mi kamam peeze, mi iseeŋge iseeŋge ma ila.
Mi peeze ta kamam, ina indeŋdeeŋe men.
9 Nu lelem pa mbulu ndeeŋeŋana, mi urur koi pa mbulu sananŋana.
Tanata Anutu ku ipakuru ma lip pa waem bizin, mi iliŋ ŋgere isalakaalu mi iuru pa uraata biibi.
Mi ina ikamu ma lelem ambai kat.✡ Mbo 45:6+; Ŋgo 10:38 10 Mi Anutu iso pini mini ta kembei:
O Merere, muŋgu kat ta mata popoten na, nu ur toono ma uunu imbol kat.
Mi saamba tomini, ina nomom muriini.✡ Mbo 8:6, 102:25+
11-12 Saamba mi toono ko tisaana ma tiwe muŋguŋan kembei kawaala pasaana.
Tana nu ko lek zin ma timap ma tila len,
mi pekel zin pa saamba mi toono popoŋan.
Tamen nu na, mbotmbot men ta kembei. Tortooru som.
Tana ndaama ku ko iseeŋge iseeŋge ta kembei ma alok.”✡ Yesa 34:4, 51:6; Ibr 13:8; Yems 1:17; 2Pe 3:13; Tur 6:14
13 Mi Anutu sua kini iso seeŋge ta kembei:
Mbulem su ki nomoŋ woono ma irao aŋkoto kom koi bizin ma mburan imap kat, mi kumbum ise ŋguren.✡ Mbo 110:1; Mk 12:36
Lak, Anutu iso sua sa ta kembei pizin aŋela? Som. 14 Pa zin aŋela na, Anutu mbesooŋo kini men. Ni iŋgoŋgo zin ma tilala be tiuulu zin wal tau zan be tikam ulaaŋa kini na.✡ Mbo 34:7, 91:11, 103:20; Mt 25:34; Ŋgo 12:7
✡1:2: Mbo 2:8; Mt 11:27; Yo 1:3; Ŋgo 2:17; Kol 1:16; Ibr 12:25
✡1:3: Yo 1:14; Ŋgo 2:33+; 2Kor 4:4; Kol 1:15-20; Ibr 9:11+; Tur 4:11
✡1:5: Mbo 2:7; Mt 3:17; Ŋgo 13:33; Ibr 5:5
✡1:5: 2Sam 7:14
✡1:6: Mbo 97:7; Ro 8:29; Kol 1:18
*1:7: Sua ti ka ŋgar ta kembei. Zin aŋela raraate pa Yesu som. Pa zin na, Anutu mbesooŋo kini men. Mi mbulu kizin itortooro kembei ta miiri mi you. Tamen Yesu, ni Anutu itunu Lutuunu. Mi mbulu kini imbot pataaŋa. Itortoori som. Tana ni ilip pizin aŋela.
✡1:11-12: Yesa 34:4, 51:6; Ibr 13:8; Yems 1:17; 2Pe 3:13; Tur 6:14
✡1:14: Mbo 34:7, 91:11, 103:20; Mt 25:34; Ŋgo 12:7