91
Merere iwe ur pa wal kini mi imenderkalkaala zin
Tomtom ta so ipase pa Anutu kor kana kat be iwe ur pini mi imenderkaali,
mi Anutu mbura keskeezeŋana ikuubukaali,
na ni irao iso pa Anutu ta kembei: “Yooba Anutu tio, nio aŋpase pu.
Pa nu we siiri mbolŋana pio mi poroukalkaala yo.”
 
Ŋonoono kat. Ni ko ipazalu mi ipiŋgis kumbum pa kilis ta kom koi bizin tiur pu na.
Mi sombe mete sananŋana sa ipet, na ni ko iziiri ma imbot molo pu.
Ni ko ikuubukaalu kembei ta man ikamam pa lutuunu bizin, bekena mbotmbot ndabok men.
Mi mbulu kini ta itoto sua kini mbukŋana na, ko iwe siŋgiao pu mi iporoukalkaalu.
 
Tana nu ko moto kom pa koroŋ sananŋan ta tiwwa pa mbeŋ na som.
Mi aigule tomini, ko moto kom pa kom koi bizin peene lutunlutun kizin na som.
Tana mete sananŋana ta ikamam zin tomtom pa mbeŋ na,
mi pataŋana ta ikazas zin pa aigule na,
nu ko moto som.
Sombe tomtom munŋaana men (1,000) timetmeete ma titoptop su zilŋom uunu,
mi tomtom munŋaana laamuru (10,000) timetmeete su nomom woono, na moto pepe.
Pa koroŋ sa ko ipasaanu som.
Nu ko mbotmbot, mi re kat kadoono
tabe Anutu ikam pizin wal sananŋan.
Ŋonoono kat. Yooba, nio aŋpase pa nu itum tamen be we ur pio mi menderkaala yo.
Tana sombe Anutu kor kana kat iwe ur pu, mi imenderkalkaalu,
10 na koroŋ sananŋana sa ko irao be ipasaanu na som.
Mi mete sananŋana sa ko irao igarau ruumu ku na som.
 
11 Pa Anutu ko iur sua pizin aŋela kini
be timboro u mi matan pu pa pai ku ta boozomen.
12 Mi zin ko tikiskisu:
Kokena tutkat kumbum sala pat ma mel. Mt 4:6; Lu 4:10; Ibr 1:14
13 Nu ko paraama su pa laion mi mooto sananŋan, mi zin tikam kosa sa pu som.
Laion popoŋan ta malmalŋan kat i, mi mooto ta kananŋan i, ko tirao be tipasaanu na som. Mk 16:18; Lu 10:19
 
14 Pa Yooba iso ta kembei: “Zin wal ta tiur lelen pio mi tisekap mar tio na, nio ko aŋboro zin ma timbot ambai.
Paso, zin tiute kat yo, tana nio ko aŋwit zin mi aŋur zin sala kor: Kokena koroŋ sa ipasaana zin.
15 Zin sombe titaŋroro yo, nako aŋpekel kalŋan mi aŋuulu zin.
Mi sombe pataŋana sa ikam zin, nako aŋbotmbot raama zin,
mi aŋtatke zin pa pataŋana kizin, mi aŋpakur zin ma zan iwe biibi.
16 Nio ko aŋseeŋge swon ma timbot molo isu toono.
Mi zin ko tire kat ulaaŋa biibi tabe aŋkam pizin i.”

91:12: Mt 4:6; Lu 4:10; Ibr 1:14

91:13: Mk 16:18; Lu 10:19