1 Parei ta zin karkari keten malmal mi kalŋan izalla?

Wal matan munŋan timburmbuuru sorok paso? ✡Ŋgo 4:25+

2 Zin king ki toono ziŋan zin peeze kan tiparlup zin,

mi tikam kumbun be tikam malmal pa Yooba ziru king ta Yooba itunu iroogi mi iuri pa uraata na.

3 Tizzo ta kembei: “Ai, kozo temet ma tombot ndel pa ziru peeze kizin:

Kokena timboro iti mini.”

4 Tamen Yooba imbotmbot se muriini peeze kana ta saamba a,

mi irepilpiili zin mi izeŋzeeŋge pizin.

5 Mi iŋasaara zin raama keteene malmal,

mi leleene bayouŋana tana ikam zin ma timoto kan.

Mi iso pizin ma iso:

6 “King taiŋgi, nio ituŋ aŋuri be ikam ruŋguŋ,

mi imbot sala abal tio potomŋana Sion mi ikam peeze.”

7 Mi king kiti, ni iso ta kembei: “Nio ko aŋsoyaara sua ta Yooba iso pio na.

Sua ta kembei: ‘Nio lutuŋ ta nu na.

Koozi aŋwe tomom. ✡Ŋgo 13:33; Ibr 1:5, 5:5

8 Mi nu sombe wi yo, nako aŋkam toono ta boozomen ka tomtom bizin ma timap tiwe lem.

Mi zin ko timbot la kopom mbarmaana, mi nu kam peeze pizin.

9 Peeze ku ko mbolŋana kat.

Tana ko punmeete mburan kembei ta tomtom ipetepaala kuuru ma imapalpaala.’ ” ✡Tur 2:27, 12:5, 19:15

10 Tana niom king ta boozomen, kakam kat ŋgar.

Mi niom peeze koyom tomini, kere be koto sua tio ti.

11 Kozo komoto Yooba, keleŋ la kalŋaana, mi kembeeze pini.

Mi kokoto ituyom, mi kelek kumbuyom pa Lutuunu.

Kere: Kokena kepei Anutu kete malmalŋana kini,

to ipasaana yom karau men, mi kemetmeete ma kala leyom.

Paso, ni mata mburmburŋana. ✡Pil 2:9+; Ibr 12:28

12 Mi wal ta so tipase pini be iwe ur pizin mi imenderkaala zin na,

zin ta boozomen ko lelen ambai kat, mi kampeŋana kini imbotmbot se kizin. ✡Mbo 34:8, 84:12