19
Tipakur Anutu isu kar saamba
Kaimer mana, aŋleŋ iwal biibi ta timbot kar saamba na, orooro kizin isala. Kalŋan izalla ma tiso:
“Haleluya!
Tapakur Anutu kiti zaana.
Pa ni mburaana mi zaana biibi.
Mi ikamke iti ma tombot ambai kek. Mbo 104:1
Ni ta iute kat tomtom uunu kizin. Tana uraata kini ta ikamam be ipokot mbulu kizin, ina indeŋdeeŋe men.
Moori kaibiim ta zaala lwoono kana na, ni ikeske zin tomtom toono kan pa mbulu kini sananŋan, tanata Anutu iur kadoono pini.
Ni muŋgu ikazas zin mbesooŋo ki Anutu ma siŋin ireere.
Mi iŋgi Anutu ipokot mbulu kini kek.” Tur 6:10, 16:7, 18:20 Ta kembei mi aŋleŋ kalŋan isala mini ma tiso:
 
“Haleluya!
Pa kar Babilon ta you ikanan, mi ka kakoi ko izalla ta kembea ma alok.” Tur 14:11, 18:9,18
To wal tomoota mi paŋ ta zanŋan na, raama koroŋ matan yaryaaraŋan paŋ na, titoptop su mi tipakur Anutu ta imbutul se muriini peeze kana na, ma tisombe: “Haleluya! Ŋonoono kat. Iti tapakur Merere zaana!” Tur 4:2+, 4:10, 5:14
Tona kalŋaana ta imbot Biibi muriini mi imar. Isombe: “Niom mbesooŋo kini munŋaana men ta komototo i mi keleŋleŋ la kalŋaana na, kapakur Anutu kiti zaana! Niom ta zoyomŋoyom, mi niom pakan tomini.” Mbo 22:23, 115:13, 134:1, 135:1; Tur 11:18, 20:12
Molo som na, aŋleŋ orooro kizin iwal biibi isala mini. Kalŋan na, kembei ta yok boozomen ŋguruŋguruŋ ma kembei ta lele ikuruŋ i. Mi kalŋan biibi ma tisombe:
“Haleluya!
Iti tapakur Merere Anutu kiti zaana. Pa ni biibi mi mbura keskeezeŋana, mi ikamam peeze pa koroŋ ta boozomen. Mbo 93:1, 97:1; Tur 11:17+, 14:2
Tana iti menmeen ti mi lelende ambai, mi tiwit uruunu. Pa ni zaana biibi kat.
Ula ki Sipsip ki Anutu, ta iŋgi be ipet i. Mi waene, ni iurpe itunu kek. Mt 22:2, 25:10; 2Kor 11:2; Ep 5:32; Tur 21:2,9
Pa Anutu ikam le mburu kokouŋana ta ŋgeezeŋana kat be iru pa.”
(Mburu kokouŋana tana, ina imender pa mbulu ndeeŋeŋan kizin wal potomŋan.) Mbo 45:13+; Yesa 61:10; Tur 3:5
Tona aŋela iso pio. Iso: “Beede ta kembei: ‘Zin wal ta sua ikam zin be timar pa ula ki Sipsip ki Anutu, mibe tikan ka kini na, zin ko menmeen zin biibi pa kampeŋana tana.’ ” To iso seeŋge sua kini ma iso: “Iŋgi sua ŋonoono ki Anutu.” Lu 14:15+
10 Ni iso ta kembei, tabe nio aŋlek kumbuŋ pini, mi aŋso aŋpakuri. Som, mi ni ipeteke yo. Iso: “Wa! Kam kembena pepe. Nio iŋgi mbesooŋo sorok kembei nu mi zin toŋmatiziŋ ku ta niomŋan kikiskis sua ŋonoono ta Yesu iswe na. Tana pakur yo pepe. Pakur Anutu itutamen. Pa Merere kwoono bizin ŋonoono na, tipombolmbol Yesu sua kini.” Ŋgo 10:25+; 1Yo 5:10; Tur 22:6+
Malmal biibi ki mbeŋ kaimer
11 To motoŋ la na, aŋre saamba ikaaga. Mi aŋre hos kokouŋana. Mi tomtom ta mbuleene se hos tana ndemeene. Ni tomtom ta ikamam mbulu ŋonoono men, mi itoto sua kini. Sombe iur kadoono, som ikam malmal, ina ikam ma indeeŋe men. Mbo 45:3+, 96:13; Tur 1:5, 3:14, 6:2 12 Mataana na, kembei ta you bilbilŋana i. Mi uteene na, mogar boozomen imbot sala. Mi zaana, ina tibeede pataaŋa kek. Zaana tana, tomtom toro sa iute som. Ni itutamen ta iute. Dan 10:6; Tur 1:14, 2:17+ 13 Mi iru pa mburu ta siŋ ipasaana ma isaana. Mi tipaata zaana be “Sua ta iswe Anutu ŋgar kini.” Yesa 63:1+; Yo 1:1
14 Ni imuuŋgu mi zin malmal kan ki saamba tito i. Tise hos kokouŋan men, mi tizeebe zin pa mburu kokouŋan ta ŋgeezeŋan men. Mt 28:3; Lu 2:13; Tur 4:4, 7:9+ 15 Biibi tana na, buza mataanaŋana iyooto pa kwoono be ikas zin karkari pa. Mi ni ko ikam peeze mbolŋana pa toono ta boozomen. Anutu ta mbura keskeezeŋana na, ni keteene malmal biibi kat. Tana ni ta ise hos kokouŋana kola ipadagdaaga zin tomtom ma siŋ kizin irereere ma kembei ta tomtom tikamam pa baen na. Mbo 2:9; 2Tes 2:8; Tur 1:16, 2:27, 12:5, 14:19+ 16 Tomtom tana, tibeede zaana se kawaala kini ta indeeŋe ka soobo i. Iso ta kembei: “King biibi ŋonoono ta ilip pa king ta boozomen, mi Merere ta ilip pa merere ta boozomen.” 1Tim 6:15; Tur 17:14
17 To aŋre aŋela ta. Imender la zoŋ mataana, mi kalŋaana biibi ma iboobo la pizin man ta tirie pa maŋaanaŋana i. Iso: “Niom ta boozomen kamar kulup yom pa kini biibi ta Anutu iurpe ma imbotmbot i. Ezek 39:17+ 18 Kakan zin king, ma zin bibip kizin malmal kan, ma zin zaaba kan mburanŋan mazan. Mi kakan zin hos raama kan tomtom bizin mazan tomini. To zin tomtom ta boozomen ta kembena. Zin mbesooŋo sorok, mi zin ta zanŋan ma zin iwal biibi, ina kakan zin men.”
19 Aŋleŋ ta kembei mi motoŋ la na, aŋre koroŋ sananŋana mi zin king ki toono ziŋan zin malmal kan kizin tilup zin be tikam malmal pa ni ta imbot sala hos kokouŋana ndemeene na, ziŋan wal kini ta malmal kan i. Mbo 2:2; Tur 16:16, 17:13+ 20 Tamen zin mburan irao ni ta imbot sala hos na som. Ni imaŋga to, karau lae pa koroŋ sananŋana ta ikazas Anutu wal kini, mi ni tau ikam koroŋ tana ruŋguunu mi itortooro uraata bibip lala tomtom matan bekena ipakaam zin na. Uraata kini tana, ta ipandelndel zin tomtom ma tikam kilalan ki koroŋ sananŋana, mi tilek kumbun pa koroŋ tana ruŋguunu. Tana wal ru tana matan yaryaara, mi ni tau mbuleene se hos kokouŋana na, iten zin, mi ipalkeete zin sula you biibi ta kakoi kuziini sananŋana kat izze pa i. Yesa 30:33; Dan 7:11; Tur 13:13+, 14:10, 20:10 21 Mi wal sananŋan ta boozomen na, timetmeete pa buza ta iyooto pa ni ta imbot se hos ndemeene na kwoono. To man ta boozomen timar, mi timbot se koroŋ tana mazan, mi matan pis, mi titut zin, titut zin ma timap.

19:1: Mbo 104:1

19:2: Tur 6:10, 16:7, 18:20

19:3: Tur 14:11, 18:9,18

19:4: Tur 4:2+, 4:10, 5:14

19:5: Mbo 22:23, 115:13, 134:1, 135:1; Tur 11:18, 20:12

19:6: Mbo 93:1, 97:1; Tur 11:17+, 14:2

19:7: Mt 22:2, 25:10; 2Kor 11:2; Ep 5:32; Tur 21:2,9

19:8: Mbo 45:13+; Yesa 61:10; Tur 3:5

19:9: Lu 14:15+

19:10: Ŋgo 10:25+; 1Yo 5:10; Tur 22:6+

19:11: Mbo 45:3+, 96:13; Tur 1:5, 3:14, 6:2

19:12: Dan 10:6; Tur 1:14, 2:17+

19:13: Yesa 63:1+; Yo 1:1

19:14: Mt 28:3; Lu 2:13; Tur 4:4, 7:9+

19:15: Mbo 2:9; 2Tes 2:8; Tur 1:16, 2:27, 12:5, 14:19+

19:16: 1Tim 6:15; Tur 17:14

19:17: Ezek 39:17+

19:19: Mbo 2:2; Tur 16:16, 17:13+

19:20: Yesa 30:33; Dan 7:11; Tur 13:13+, 14:10, 20:10