1 To motoŋ la na, aŋre koroŋ sananŋana *Koroŋ sananŋana ti imender pizin wal ta tikazas Krisi wal kini mi tikamam pataŋana pizin. ta bok ma ise pa tai. Ka kandaara laamuru, mi uteene na lamata mi ru. Mi mogar laamuru ta kizin king i, ta ikot zin kandaara tana. Mi uteene lamata mi ru tana zan imbot la makiŋ. Mi zan tana, tomtom ta sombe ikam, na ni irepiili Anutu.✡Dan 7:2+; Tur 11:7, 17:3 2 Koroŋ sananŋana tana aŋre na, ruŋguunu kembei ta lepat i. Mi kumbuunu na, kembei bea kumbuunu. Mi kwoono na, kembei laion kwoono. †Lepat, bea, mi laion, ina buzur sananŋan tel ta bibip kat mi keten malmalŋan, mi tipasansaana zin tomtom. Koroŋ tana na, ikam mooto ruŋguunu. Tana mooto ikam koroŋ tana le mburaana, mi ikam zaana biibi pini, mi iur peeze kini ila ki koroŋ tana.✡Dan 7:4+; Tur 12:4 3 Mi aŋre la pa koroŋ sananŋana tana uteene ta na, ka mbelŋana imbotmbot. Pa muŋgu tipuni ma imeete. Mi iŋgi imaŋga mini.

Mi zin tomtom ta timbot toono na, timap ma timurur pa koroŋ tana mi tito i.✡Tur 17:8 4 Mi tilek kumbun pa mooto mi tipakuri. Paso, ni ta ikam mburaana mi zaana ila ki koroŋ tina. Mi tilek kumbun pa koroŋ sananŋana tina tomini. Tabe timaŋga to tiso: “Lak, asiŋ ta ni irao kembei koroŋ tiŋgi? Som asiŋ irao be ikam malmal ma ilip pini? Som. Ni kadoono tomtom sa som.”✡Tur 18:18

5 Mi Anutu izem puulu tomtooru mi ru ila koroŋ sananŋana tina namaana. Mazwaana tana, koroŋ tana ipakurkur itunu mi irepilpiili Anutu.✡Dan 7:8,25, 11:36; Tur 11:2, 12:6 6 Tana kwoono ikaaga mi izzo sua repiiliŋana pa Anutu. Irepiili zaana, irepiili muriini tau Ni imbotmbot pa i, mi irepiili zin wal tau timbot saamba a. 7 Mi Anutu iyok pini be ikam malmal pa wal kini potomŋan ma ilip pizin. Mi iur zin tomtom ta boozomen ila koroŋ sananŋana tana namaana be imboro zin. Zin kulin pareiŋan, kalŋan pareiŋan, mi timar pa karkari ta boozomen.✡Dan 7:21 8 Tana wal boozomen ta timbot su toono tiŋgi na, tilek kumbun pa koroŋ sananŋana tina mi tipakuri. Mi zin tau zan ise ro ki mbotŋana mata yaryaaraŋana na, tilek kumbun pa koroŋ sananŋana tina som. Wal tana tibeede zan se ro ta muŋgu kek, mana Anutu iur saamba mi toono. Mi Sipsip ki Anutu ta tipuni ma imeete na, ta imborro ro tana.✡Kam 32:32; Mbo 69:28; Mt 25:34; Lu 10:20; Yo 1:29; Tur 17:8, 20:12+, 21:27 9 Tana tomtom ta sombe talŋaana, na ni bela ileŋ la sua ti:

11-12 To motoŋ la na, aŋre koroŋ sananŋana toro §Koroŋ sananŋana toro ti imender pa urlaŋana pakaamŋana. ta ber ma ise pa toono. Ka kandaara ru men, kembei ta sipsip. Tamen iso sua na, kembei ta mooto. Koroŋ mataana kana mburaana, ta imap ma ise kini. Mi ikam koroŋ mataana kana ruŋguunu, tabe ikam ma tomtom boozomen ta timbotmbot su toono i tilek kumbun pa koroŋ mataana kana. Anoŋ ta tipun uteene ta ma imeete, mana imaŋga mini na.✡Mt 7:15, 24:11 13-14 Mi koroŋ sananŋana ta iwe ru pa na, Anutu iyok pini ma itortooro mos bibip ma iwedet. Irao ikam ma you tomini imbot saamba mi isu toono ma tomtom tire kat pa matan. Tabe uraata kini tana ipandelndel zin tomtom ta timbot su toono tiŋgi, mi ipakamkaam zin. Mi ipesese zin tomtom be tiurpe koroŋ mataana kana ruŋguunu mi tipakuri. Anoŋ ta buza ikan uteene ma imeete, mana imaŋga mini na.✡Lo 13:1+; Mt 24:24; 2Tes 2:9+ 15 Mi Anutu iyok pa koroŋ ta iwe ru pa, ma ikam koroŋ mataana kana ruŋguunu ma iwe kembei koroŋ mata yaryaaraŋana be iso sua. Mi zin wal ta sombe tilek kumbun pa ruŋguunu tana som, na ni irao iur sua, mi tipun zin ma timetmeete.✡Dan 3:4+

16 Mi ni imaŋmaŋ tomtom ta boozomen be tikam kilalan ta ise naman woono. Som na, ise ndomon. Wal zanŋan ma zin sorrokŋan, mi zin mbio uunu ma zin tau timbot ŋoobo, mi zin ta tiwe mbesooŋo sorok pizin wal pakan, mi zin iwal biibi.✡Tur 14:9, 19:20, 20:4 17 Mi tiur sua ta kembei: Bela tomtom le kilalan tana, tona iŋgomoono koroŋ kini mi iŋgiimi koroŋ. Mi so som, nako som. Mi kilalan tina, ina koroŋ sananŋana zaana mi kin kini.✡Tur 14:9+, 15:2, 16:2

18 Tana koroŋ imbot la ŋgar. Tomtom ta sombe le ŋgar, nako iute zaala tabe inin koroŋ sananŋana tana kin kini, mi ikilaala ka uunu. Kin tana na 666. Mi ina imender pa tomtom.✡Tur 15:2, 17:9, 21:17