7
Anutu kilalan kini ise kizin Israel munŋaana ma munŋaana (144,000)
1 Kaimer beso motoŋ ila na, aŋre aŋela paŋ timender papiliu toono. Mi timender raama miiri uunu paŋ: Re, iwaara, kaagu, daudao. Mi tiyaramraama miiri paŋ tana. Kokena tiwilaala toono, tai, mi zin ke. 2-3 Molo som na, aŋre aŋela toro, ta iteege Anutu mata yaryaaraŋana kilalan kini, mi ise pa zoŋ uunu. Ise to kalŋaana biibi pa aŋela paŋ tana ma iso: “Kozo kumbuulu toono ma tai mi zin ke loŋa pepe. Kombot mi niam amur kilalan ki Anutu kiti ise zin mbesooŋo kini ndomon muŋgu.” Ni iso ta kembena paso, Anutu ikam len mburan biibi be tipasaana toono mi tai.✡Ezek 9:4+; Ep 1:13+; 2Kor 1:22; Tur 9:4, 14:1, 22:4
4-8 Aŋbotmbot mi aŋleŋ la pizin Israel piizi ta Anutu kilalan kini ise kizin na. Mi aŋleŋ na, zin munŋaana ma munŋaana (144,000). *Tomtom 144,000 tiŋgi timender pa Anutu wal kini ta boozomen. Zin ta timbot pa mazwaana ki matamur muŋguŋana na, ziŋan zin ta timbot pa mazwaana ki matamur popoŋana. Kam ŋgar pa Yakop lutuunu bizin laamuru mi ru, mi zin ŋgoŋana laamuru mi ru. (12 × 12 × 1,000 = 144,000) Zin Israel un tataŋa na, ka tomtom bizin munŋaana laamuru mi ru (12,000) ma ikot zin. Tana Yuda popoŋana kini, Ruben, Gat, Aser, Naptali, Manase, Simion, Lebi, Isaka, Zebulun, Yosep, mi Benyamen na, tomtom kizin munŋaana laamuru mi ruruŋa (12,000) ta kilalan ki Anutu ise kizin ma ikot zin.
Iwal munŋaana ka tieene ta timbot kar saamba
9 Kaimer beso motoŋ ila mini na, aŋre zin iwal munŋaana ka tieene. Tomtom sa irao inin zin na som. Zin tomtom ta kulin pareiŋan, kalŋan pareiŋan, mi timar pa karkari ta boozomen, ta timap timender su Sipsip ki Anutu kereene uunu ta Biibi muriini peeze kana a. Wal biibi tana timbot la mburu kokouŋan men. Mi titeege komkom ruunu ma irao zin.✡Ro 11:25; Tur 3:5, 5:9, 11:9, 13:7, 14:6 10 Mi kalŋan biibi ma tizzo:
“Tapakur Anutu kiti ta imbotmbot se muriini peeze kana na mi Sipsip kini.
Pa zin ta tikamke iti.”✡Mbo 3:8
11 To aŋela ta munŋaana men timender papiliu wal tomoota mi paŋ ta zanŋan na, ziŋan koroŋ matan yaryaaraŋan paŋ, mi titoptop su Biibi kereene uunu mi tipakur zaana. 12 Mi tilup kwon mi tiso:
“Ŋonoono kat.
Iti tapakur Anutu kiti pa kampeŋana kini,
mi tiwit uruunu ma isala kor.
Pa ni ŋgar biibi, mi mbura keskeezeŋana.
Mburaana ilip pa koroŋ ta boozomen.
Tana iti ko tapakurkuri ta kembei,
mi iseeŋge iseeŋge ma ila.
Ŋonoono.”✡Tur 5:12+
13 Nio aŋbotmbot mi wal tomoota mi paŋ ta zanŋan na, kizin ta, imar to iwi yo. Iso: “Wal ta timbot la mburu kokouŋana men na, zin ziŋoi? Nu ute zin? Timbot ki parei ta timar i?” 14 Mi aŋpekel ma aŋso: “Biibi, nu itum ute.” To ni iso pio ma iso:
“Iŋga zin tau tiporou sala pataŋana biibi kat, mi tamen timbol timbol, tana timar timbotmbot i. Mi tiŋguuru mburu kizin pa Sipsip ki Anutu siŋiini, tabe ipuspuuzu ma iŋgeeze kat.✡Yesa 1:18; Mt 24:21+; Ibr 9:14; 1Yo 1:7
15 “Tana zin tiŋga ta timendernder kolouŋana pa Biibi muriini peeze kana,
mi timbesmbeeze pini lela urum kini ikot mbeŋ ma aigule.
Mi Biibi ta imbotmbot sala muriini peeze kana na, itunu ko imbotmbot raama zin mi ikuubukaala zin.✡Yesa 4:5+; Tur 21:3
16 Tana zin ko irao petel zin mini som,
mi miri zin mini som.
Mi zoŋ ko irao ilas zin ma kulin iwidit mini na som.✡Mbo 121:6; Yesa 49:10; Tur 21:4
17 Pa Sipsip ki Anutu ta imbotmbot kolouŋana pa Biibi muriini na, ko imborro zin.
Mi ni ko iyaaru zin ma tila yok mata yaryaaraŋana ta bukbuk ma ise mi irereere totomen.
Mi matan luluunu na, Anutu itunu ko imus ma ila ne lup.”✡Mbo 23:1+; Yesa 25:8; Ezek 34:23; Yo 7:37+, 10:11+
✡7:2-3: Ezek 9:4+; Ep 1:13+; 2Kor 1:22; Tur 9:4, 14:1, 22:4
*7:4-8: Tomtom 144,000 tiŋgi timender pa Anutu wal kini ta boozomen. Zin ta timbot pa mazwaana ki matamur muŋguŋana na, ziŋan zin ta timbot pa mazwaana ki matamur popoŋana. Kam ŋgar pa Yakop lutuunu bizin laamuru mi ru, mi zin ŋgoŋana laamuru mi ru. (12 × 12 × 1,000 = 144,000)
✡7:9: Ro 11:25; Tur 3:5, 5:9, 11:9, 13:7, 14:6
✡7:14: Yesa 1:18; Mt 24:21+; Ibr 9:14; 1Yo 1:7
✡7:16: Mbo 121:6; Yesa 49:10; Tur 21:4
✡7:17: Mbo 23:1+; Yesa 25:8; Ezek 34:23; Yo 7:37+, 10:11+