5
Mboroŋan bela timboro kat zin sipsip ki Anutu
1 Ayo, nio leŋ sua pakan pizin mboroŋan tiom. Mi niom mboroŋan irao keleŋ la kalŋoŋ. Pa nio tomini mboroŋan kembei ta niom na. Mi pataŋana ta Krisi ibaada na, ituŋ aŋre kat pa motoŋ. Mi kaimer sombe Krisi iswe mburaana ma zaana ma ipet mat, nako itiŋan tombotmbot raami lela azuŋka kini leleene.✡Ro 8:17+; Tur 1:9 2 Anutu, ni iur uraata ima nomoyom kek be komboro zin sipsip kini. Tana motoyom pizin mi komboro kat zin. Mi uraata tiom tana, kokena timaŋmaŋ yom pa ma kakam. Motoyom siŋsiŋ pa mi kakam raama leleyom. Naso koto Anutu leleene. Mi kakam ŋgar biibi pa leyom kadoono pepe. Pa ŋgar ta kembei, ina ambai som.✡Yo 10:11+, 21:15+; Ŋgo 20:28; 1Tim 3:3; Tit 1:7 3 Zin wal ta Anutu iur zin ima nomoyom be komboro zin na, kokoto zin, mi kapakur ituyom ma kewe biibi pizin pepe. Mbulu tiom bela iwe kin ambaiŋana pizin sipsip ki Anutu be tire mi tito.✡1Kor 11:11; Pil 3:17; 1Tim 4:12; Tit 2:7 4 Beso Krisi tau mboroŋan biibi ŋonoono kizin sipsip na, imiili ma imar mi ipet mat, na niom ko kakam leyom kadoono ambaiŋana ta irao isaana, o imap na som. Pa niom ko kombotmbot lela azuŋka kini leleene ma alok.✡1Kor 9:25; 2Tim 4:8; Ibr 13:20; 1Pe 1:4
Tokoto itundu mi tezem pataŋana kiti ila Anutu namaana
5 Mi niom naŋgaŋ ta kembena. Kombot la zin mboroŋan kopon mbarman. Niom ta boozomen irao kakam mbulu ki mbesooŋo ila niyom, mi kokototo ituyom, mi kaparmbesmbeeze piom. Pa sua ki Merere iso ta kembei:
Zin wal ta tipakurkur zitun na, Anutu iurur koi pizin.
Mi zin wal tau tikototo zitun na, ni ikampewe zin.✡Mt 23:12; Yo 13:14; Ep 5:21; Pil 2:3; Yems 4:6 6 Anutu, ni mbura keskeezeŋana, mi namaana alalalŋana. Tana kapase pini, mi kezem ituyom ila ni namaana. Naso kaimer, sombe ka nol ipet, to ni ipakur yom.✡Lu 1:52, 18:14; Yems 4:10 7 Mi pataŋana tiom boozomen tau kopoyom rru pa i ta kembena. Kezem la Anutu namaana. Pa ni ikamam ŋgar biibi piom mi mataana piom.✡Mbo 37:5; Mt 6:25+; Pil 4:6
8 Kozo kakam kat ŋgar, kagabiizi ituyom, mi motoyom izze. Pa Tomtom Sanaana, ta koyom koi ŋonoono, ni iwwa kembei laion tau kalŋaana izalla mi irru tomtom be ikani.✡Lu 21:36, 22:31; 2Kor 2:11; 1Tes 5:6; Tur 12:12 9 Tana kikiskis kat urlaŋana tiom, kemender mbolŋana, mi koporou be kokoto i. Pa niom kuute: Toŋmatiziŋ tiom ta ki Krisi i, tibadbaada pataŋana kembei ta niom na irao lele ta boozomen.✡Ŋgo 14:22; Ep 4:27, 6:11+; Yems 4:7
Sua pombolŋana
10 Anutu ta kampeŋana katuunu, ni iboobo yom ma kewe Krisi lene kek, bekena ikam yom ma kala kombot raami lela azuŋka kini leleene ma alok. Pataŋana ta kabadbaada i, ko imbot rimen mi imap. Mi kaimer na, Anutu itunu ko iurpe yom ma karao kat pa mbulu kini, mi ipombol yom be kemender mbolŋana ma irao kosa sa itok yom mini som.✡2Kor 1:21, 4:17; 1Tim 6:12; Ibr 13:21; 1Pe 1:6 11 Ni mbura keskeezeŋana, mi peeze kini imbotmbot ma alok. Ŋonoono.
Sua pemetŋana
12 Silas ta iuulu yo ma aŋbeede ro katŋaari ti ima piom na, nio aŋre i kembei toŋmatiziŋ tio ŋonoono ta iurla kat ki Krisi i. Ro ti, nio aŋbeede bekena aŋpaute yom pa kampeŋana ŋonoono ki Anutu, mibe aŋpombol yom ma kikis kat kampeŋana kini tana.✡2Kor 1:19; 1Tes 1:1
13 Zin tomtom tau Anutu ipeikat zin ma tiwe lene kembei ta niom, mi timbotmbot kar Babilon ti na, *Wal ŋgarŋan tiso Babilon ti imender pa kar biibi Rom. tikam aigule kizin piom. Mi lutuŋ Markus tomini ikam aigule kini piom.✡Ŋgo 12:12, 13:5,13, 15:37+; 2Tim 4:11
14 Niom ta boozomen leleyom par piom mi kaparteege nomoyom.
Niom wal ta kewe Krisi lene kek mi kesekap la kini na, Anutu ko imboro yom ta boozomen ma kombot ambai men. Ŋonoono.✡Ro 16:16
✡5:2: Yo 10:11+, 21:15+; Ŋgo 20:28; 1Tim 3:3; Tit 1:7
✡5:3: 1Kor 11:11; Pil 3:17; 1Tim 4:12; Tit 2:7
✡5:4: 1Kor 9:25; 2Tim 4:8; Ibr 13:20; 1Pe 1:4
✡5:5: Mt 23:12; Yo 13:14; Ep 5:21; Pil 2:3; Yems 4:6
✡5:6: Lu 1:52, 18:14; Yems 4:10
✡5:7: Mbo 37:5; Mt 6:25+; Pil 4:6
✡5:8: Lu 21:36, 22:31; 2Kor 2:11; 1Tes 5:6; Tur 12:12
✡5:9: Ŋgo 14:22; Ep 4:27, 6:11+; Yems 4:7
✡5:10: 2Kor 1:21, 4:17; 1Tim 6:12; Ibr 13:21; 1Pe 1:6
*5:13: Wal ŋgarŋan tiso Babilon ti imender pa kar biibi Rom.
✡5:13: Ŋgo 12:12, 13:5,13, 15:37+; 2Tim 4:11