20
Paulus ila ire zin Masedonia kan mi zin Grik
Orooro biibi tana imap, mana kaimer to Paulus iboobo zin wal ta titoto Yesu i ma tila tilup zin, mi isotaara zin kembei ni be izem zin. Tila mi ni ipombol zin pa sua pakan, to izem zin ma timbot, mi imaŋga ma ila pa Masedonia. Iwwa ma ila beso ipet lele sa mi indeeŋe wal pakan ki Krisi, to ipombol zin pa sua boozo, mana ipa mini. Iwwa ma ila mi ipet lele pakaana kizin Grik, to imbot pa puulu tel. To iso imaŋga mi ikam wooŋgo be ila lele pakaana ki Siria. Som mi ileŋ kembei zin Yuda timbuuru kana. To itoori mini be ipa pa lele pakaana ki Masedonia. 2Kor 11:26; 1Tes 2:15+ Mi wal ta ni ziŋan tila ta zan tis: Sopata ta Pirus lutuunu i, ni ki kar Berea, mi Aristakus ziru Sekundus ki kar Tesalonika, mi Gaius ki kar Derbe, mi Timoti, mi Tikikus ziru Tropimus ki Asia. Zin tina timuuŋgu ma tila tizza yam su kar Troas. Mi niam pakan na, ambot kar Pilipai pa lupŋana biibi ki narabu ta yis somŋana i. Ina imap, to amla ma amkam wooŋgo. Amkowo pa aigule lamata, mana amlela Troas. To amdeeŋe zin. Mi ambot Troas pa aigule lamata mi ru.
Paulus ipei Yutikus ma imaŋga mini
7-8 Indeeŋe aigule mataana kana na, niam amlup yam pa kini kanŋana mi suŋŋana lela ruumu leleene ta imbot kor. Mi Paulus ziŋan zin tomtom tizzo pa sua ki Anutu ma ila mbeŋ lukutuunu. Pa aigule toro to pai. Mi titun lam boozomen. Yo 20:1+; 1Kor 16:2 Mi naŋgaŋ ta, ni zaana Yutikus. Imbutultul se miiri kwoono mi iŋgungun talŋaana pa sua. Paulus ziŋan zin tomtom tizzo ma tizzo be molo som na, Yutikus mata ŋenŋeene. To itur ma som mi imbot. Ta kembei men ma ikanamaala itunu risa som. Tabe imalaala to iwwa. Itop pa ruumu leleene ta kor a ta iwe tel pa i, mi isula ta toono a. Wis ma tila be naman su pini na, Yutikus ni imeete ma kup kek. 10 Tamen Paulus isula toono, to isala ŋwaana mi isou i. To iso pizin. Iso: “Leleyom ipata pepe. Ni mataana iyaara mini kek.” 2Kin 4:32+; Ŋgo 9:40 11 Paulus imiili ma isala mini, to titete narabu ma tikan, mi ni izzo sua pizin ma berek su. To izem zin mi pai. Lu 22:19 12 Mi Yutikus na, tikami ma tila ruumu kini mi lelen ambai kat. Paso, ni mataana yaryaara ma imbot.
Paulus izem kar Troas mi ila kar Miletus
13 Paulus iurpe zaala piam be amse wooŋgo, mi amuuŋgu ma amla kar Asos, to amsa i isu tana. Mi itunu na, ipa toono. 14 Imar ma indeeŋe yam su Asos, to amkami mi amkwai ma amla mutu Mitilene. 15 Amkeene ma aigule toro na, amla amdeeŋe mutu Kios. Kozeere na, amar ampet mutu Samos. Mi kozeere mini na, kaŋkaŋ ma amla amkam kar Miletus. 16 Paulus ipiyar. Pa leleene be ila Yerusalem, mana lupŋana biibi ki Pentekos ipet. Tana leleene be ilela ta kar Epesus som. Pa imoto: Kokena ilela, to imbotmbot ma molo su lele pakaana ki Asia.
Paulus ipombol zin mboroŋan ki Epesus pa sua pakan
17 Tana Paulus imbot kar Miletus, mi ikam sua ma ila pa lupŋana ki Krisi ta imbot kar Epesus na, be mboroŋan kizin timar. 18 Timar tipet, to iso pizin. Iso: “Keleŋ. Indeeŋe aigule mataana kana ta aŋmar aŋpet lele pakaana ki Asia, mi imar imar ma indeeŋe koozi na, mbulu tio ta aŋkamam na, niom kere kek. 19 Zin Yuda timbukmbuk koŋ kiizi totomen, mi tikamam pataŋana boozo pio, mi tomtom tipamiaŋ yo kat. Tamen nio aŋkototo ituŋ, mi aŋbesmbeeze pa Merere raama tiŋiizi. 20 Mi niom kuute: Sua boozomen ta irao be iuulu yom na, aŋwatkaala sa piom som. Aŋzzo sua su mat keteene, mi aŋmama ruumu ma aŋzzo yom pa tomini. Mbo 40:10 21 Kwoŋ imbolmbol pizin Yuda, mi zin Grik tomini, be tizem sanaana kizin, mibe titooro ŋgar kizin ma ila ki Anutu, mi tiurla ki Merere kiti Yesu. Ŋgo 2:38
22 “Mi buri na, Bubuŋana Potomŋana imaŋga pio be aŋla Yerusalem. Mi aŋkankaana pa. Ko mbulu pareiŋana ipet pio su tana? Ŋgo 20:16 23 Nio aŋute men tau kar boozomen ta aŋlala pa i, na Bubuŋana Potomŋana izzo yo ta kembei: Ruumu sanaana, mi pataŋana boozo ta izza yo a. Ŋgo 9:16 24 Tamen nio aŋre ta kembei: Ituŋ mbotŋana tio, ina koroŋ sorok. Pa aŋkamam ŋgar men pa uraata ta Merere kiti Yesu iur mar nomoŋ i be aŋkiskis mi aŋposop kat. Uraata tana na, ta kembei: Uruunu ambaiŋana ta iso pa muŋaiŋana mi kampeŋana ki Anutu na, bela aŋso pizin tomtom mi kwoŋ imbol pa. Ŋgo 21:13; 2Kor 4:1; Ga 1:1; Pil 1:20; 2Tim 4:7; Tur 12:11
25 “Kere. Niom tiŋgi, muŋgu nio aŋbotmbot la mazwoyom mi aŋzzo yom pa peeze ki Anutu. Mi iŋgi buri na, aŋute kat tau tiom tasa ko irao ire motoŋ mini som. 26 Tana koozi nio aŋso kat yom ta kembei. Sombe tomtom tiom tasa ila lene, ina uunu tio som. Ezek 3:17+; Ŋgo 18:6 27 Pa nio aŋwatkaala sua sa piom som. Ŋgar ta boozomen ki Anutu, ta aŋso yom pa ma imap lup.
28 “Motoyom iŋgal ituyom, mi sipsip boozomen ki Anutu ta Bubuŋana Potomŋana iur yom be komboro zin na. Komboro kat lupŋana ki Anutu. Pa ni iŋgiimi zin pa itunu Lutuunu siŋiini. 1Tim 4:16; 1Pe 1:18+, 5:2+; Tur 5:9 29 Mi nio aŋute. Sombe aŋzem yom, inako wal pakan timar kembei ta me saŋsaŋŋan, mi tigaaba yom ma tipasaana Anutu wal kini. Mt 7:15; Yo 10:12; 2Pe 2:1 30 Mi niom ituyom tomini, tomtom tiom pakan kola timaŋga, to tipabogboogo sua ŋonoono, mi tiyaaru wal pakan ta titoto Yesu i be tito zin. 1Tim 1:3-19+; 1Yo 2:19 31 Tana kere yom pizin. Mi motoyom ŋgal ndaama tel ta itiŋan tombotmbot na. Mazwaana tana, nio aŋmaane piom som. Aŋzzopewe yom tataŋa pa mbeŋ ma aigule raama tiŋiizi. Mk 13:37; 1Tes 2:11
32 “Mi iŋgi buri aŋso aŋur yom la Anutu namaana. Tana kwoŋ imbol piom ta kembei: Motoyom iŋgal Anutu sua kini ta iso pa muŋaiŋana kini. Pa ina ko ipombol yom, mi iuulu yom be kakam matamur kini ambaiŋana ta ni imbuk sua pa be ikam pizin wal kini. Ŋgo 14:23; Ep 1:18; Kol 1:12; 1Pe 1:4+ 33 Indeeŋe ta itiŋan tombotmbot na, nio motoŋ berber pa tomtom sa pat kini, som mburu kini sa be aŋkam leŋ i som. 1Kor 9:11+; 2Kor 2:17, 7:2; 1Tes 2:5 34 Niom ituyom kere kek. Koroŋ ta iuluulu yo raama zin gaabaŋoŋ ti, ina iwedet pa uraata ta ituŋ aŋkamam pa nomoŋ na. Ŋgo 18:3; 1Kor 4:12; 2Kor 12:14+; 1Tes 2:9 35 Aŋkamam ta kembei paso, aŋsombe aŋwe kin ambaiŋana piom. Pa iti sombe takam uraata ma biibi, nako lende koroŋ ma irao, mi tarao be tu'uulu zin wal ta len koroŋ somŋan i. Matanda ŋgal Merere Yesu sua kini ta iso: ‘Ŋonoono, iti sombe tikam lende koroŋ, na menmeen ti pa. Mi sombe itundu tu'uulu zin tomtom pa koroŋ kiti, nako ikam ma menmeen ti biibi kat.’ ” 2Kor 9:8; Ep 4:28; 1Tes 4:11+; 1Tim 6:18
36 Paulus iso sua tana ma imap to, ziŋan tilek kumbun mi tisuŋ. 37 Tisuŋ makiŋ, to timaŋga mi tila tisou i, mi ziŋan titaŋ. 38 Lelen isaana kat pa sua lwoono ri ta isombe zin ko tirao be tire mataana mini som. Tana titaŋ makiŋ, mi tiuri ila wooŋgo.

20:3: 2Kor 11:26; 1Tes 2:15+

20:7-8: Yo 20:1+; 1Kor 16:2

20:10: 2Kin 4:32+; Ŋgo 9:40

20:11: Lu 22:19

20:20: Mbo 40:10

20:21: Ŋgo 2:38

20:22: Ŋgo 20:16

20:23: Ŋgo 9:16

20:24: Ŋgo 21:13; 2Kor 4:1; Ga 1:1; Pil 1:20; 2Tim 4:7; Tur 12:11

20:26: Ezek 3:17+; Ŋgo 18:6

20:28: 1Tim 4:16; 1Pe 1:18+, 5:2+; Tur 5:9

20:29: Mt 7:15; Yo 10:12; 2Pe 2:1

20:30: 1Tim 1:3-19+; 1Yo 2:19

20:31: Mk 13:37; 1Tes 2:11

20:32: Ŋgo 14:23; Ep 1:18; Kol 1:12; 1Pe 1:4+

20:33: 1Kor 9:11+; 2Kor 2:17, 7:2; 1Tes 2:5

20:34: Ŋgo 18:3; 1Kor 4:12; 2Kor 12:14+; 1Tes 2:9

20:35: 2Kor 9:8; Ep 4:28; 1Tes 4:11+; 1Tim 6:18