2
Krisi imender piti
O lutuŋan, sua ti, nio aŋbeede piom, bekena motoyom iŋgal ituyom. Kokena kotop pa sanaana. Tamen sombe tomtom tasa itop pa sanaana, na iti lende tomtom ndeeŋeŋana ta imendernder piti, mi izzo sua kiti ila ki Tamanda Anutu. Ni Yesu Krisi. Ro 8:34; 1Tim 2:5; Ibr 7:25, 9:24 Ni itunu imeete bekena ireege sanaana kiti mi ikoto Anutu kete malmalŋana kini. Mi uraata kini tana, ni ikam piti men som. Ikam pa wal boozomen ta timbot toono na. Yo 1:29, 11:52; Ro 3:23+, 5:18
Matanda iŋgal be toto tutu ki Krisi
Iti sombe tototo Krisi tutu kini, na iswe kembei iti tuute i. Yo 13:34+, 14:21, 15:12 Mi sombe tomtom sa isombe ni iute Krisi, mi tamen itoto tutu kini som, na mbulu kini tina iswe i kembei ni tomtom pakaamŋana, mi sua ŋonoono imbot la leleene som. Pa bela tototo sua ki Krisi, to mbulu ki Anutu ta ni iur leleene piti i, iur ŋonoono. Tana iti sombe takamam ta kembei, na iti tuute: Tewe Krisi lene, mi tesekap la kini kek. Yo 14:21,23 Tana sombe tomtom sa iso ni iwe Krisi lene mi isekap la kini, na bela ipa pai kini ma kembei ta Krisi itunu. Mt 11:29; Yo 13:15, 15:4+; 1Pe 2:21
Tuur lelende pizin tomtom
O niom wal tio, nio iŋgi aŋbeede tutu popoŋana piom som. Pa indeeŋe ta kuurla mata popoten mi imar na, niom kuute tutu ti. Pa tutu muŋguŋana ti imbot la sua ta tizzo piom mi keleŋ kek na. Yo 13:34+, 15:12 Tamen tutu tiŋgi, iŋgi popoŋana tomini. Pa ka mbulu ŋonoono tau tere ise ki Krisi mi iwedet piom i tomini. Pa iŋgi zugut ikamam be imap. Mi mat ŋonoono tau iyaryaara i. Yo 1:9, 8:12; Ro 13:12; Ep 5:8; 1Tes 5:5,8 Sombe tomtom sa iso ni imbotmbot la mat leleene, mi tamen iurur koi pa toŋmatiziŋ sa ta ki Krisi i, ina ni imbot mat leleene som. Ni imbotmbot zugut leleene men. 1Kor 13:2; 2Pe 1:7+ 10 Mi tomtom ta sombe iurur leleene pizin tomtom, na ni imbotmbot la mat leleene. Tomtom ta kembei na, iti tuute: Ni ko ikam mbulu sa tabe ikam tomtom toro ma itop pa sanaana i na som. Ro 14:13 11 Tamen tomtom ta sombe iurur koi pa toŋmatiziŋ sa ta ki Krisi i, na ni imbotmbot zugut leleene men. Tana ni iwwa lela zugut leleene, mi ikankaana pa zaala tabe ila pa i. Pa zugut izuk mataana kek. Yo 11:10, 12:35; 1Yo 1:5
Tombot molo pa koroŋ toono kan
12 O lutuŋan, sua ti, iŋgi aŋbeede piom paso, Tamanda Anutu ireege sanaana tiom pa Yesu Krisi zaana ma ila lene kek. Lu 24:47; Ŋgo 4:12, 10:43 13 Mi niom kolman na, aŋbeede sua ti ima piom paso, Ni tau imbotmbot ta mata popoten mi imar na, niom kuute i kek. Mi niom naŋgaŋ popoŋoyom na, aŋbeede sua ti ima piom paso, niomŋan Tomtom Sanaana koporou ma kilip pini kek.
Lutuŋan, nio aŋbeede sua ti ima piom paso, niom kuute Tamanda Anutu kek.
14 Mi niom kolman na, aŋbeede sua ti ima piom paso, Ni ta imbotmbot ta mata popoten mi imar na, niom kuute i kek. Mi niom naŋgaŋ popoŋoyom na, aŋbeede sua ti ima piom paso, niom kemendernder mbolŋana, mi sua ki Anutu imbol la leleyom, mi niomŋan Tomtom Sanaana koporou ma kilip pini kek. Ep 6:10
15 Toono ti ramaki ka mburu mi mbulu na, kuur leleyom pa pepe. Pa sombe tomtom sa iurur leleene pa koroŋ toono kan, inako iurur leleene ila ki Tamanda Anutu som. Mt 6:24; Ro 12:2; Yems 4:4 16 Mbulu toono kana na, iti tuute kek: Nindi zze pa koroŋ kulindi kana, matanda berber pa koroŋ matakiŋa, mi tapase pa itundu mburanda mi tapakurkur itundu. Mbulu boozomen ta kembei imar pa Tamanda Anutu som. Ina mbulu toono kana men. Ro 13:14; Yems 4:16; 1Pe 2:11 17 Mi iti tuute: Toono ti ramaki ka mbulu ta tomtom nin zze pa i, ina kola imap. Tamen tomtom ta sombe itoto Anutu leleene, na ni ko imbot ma alok. Mbo 15:5; Mt 7:24; 1Kor 7:31; Yems 1:10+
Krisi ka koi bizin
18 Lutuŋan, kere yom! Pa iŋgi mazwaana kaimer kana kek. Muŋgu tiso yom pa sua ta kembei. Tiso: “Kaimer ko Yesu ka koi * Yesu ka koi ti, Grik kalŋan tipaata tisombe “Antikrais.” sa ipet.” Mi buri taiŋgi boozomen ta tipet kek. Tana iti tuute: Iŋgi mazwaana kaimer kana ipet kek. Mt 24:5,24; 2Tes 2:3; 1Tim 4:1; 2Pe 2:1; 1Yo 4:3 19 Wal tana, muŋgu tigabgaaba iti, mi itiŋan tuluplup ti ma tombotmbot la mbata. Mi iŋgi tizem lupŋana kiti kek. Tana ko muŋgu iti gaabaŋanda ŋonoono zin som. Pa kena so tizem ti som, mi itiŋan tombotmbot men lak. Mi iŋgi som. Tana tere iti. Pa mbulu kizin tana iswe kembei wal pakan ta timbotmbot la lupŋana kiti leleene na, gaabaŋanda ŋonoono som. Mbo 41:9; Ŋgo 20:30
20 Tamen niom na, Ni ta Potomŋana na, ikam Bubuŋana mburaana ma isalakaala yom kek. Mi niom ta boozomen kuute sua ŋonoono. 1Kor 2:15; 2Kor 1:21; Ep 1:13 21 Kokena kakam ŋgar kembei nio aŋso niom kakankaana pa sua ŋonoono, tanata aŋbeede sua ti ima. Na som. Sua ŋonoono, ina niom kuute kek. Mi sua tana irao ipiyooto sua pakaamŋana sa som. Ro 15:14
22 Mi asiŋ ta izzo sua pakaamŋana? Ina ni ta iurla ki Yesu som, mi izzo Yesu ni Mesia som. Tomtom ta kembei, ni iwe Krisi ka koi. Mi tomtom ta sombe iurla ki Krisi som, na ni iurla ki Tamaana som tomini. 1Yo 4:3 23 Pa tomtom ta sombe iurla ki Lutuunu som, na Tamaana tomini ko imbotmbot raami som. Tamen tomtom ta sombe iswe urlaŋana kini ila iwal matan kembei ni iurla ki Lutuunu, ina Tamaana ko imbotmbot raami tomini. Yo 5:23, 14:7+, 15:23; 1Yo 4:15, 5:1; 2Yo 9
24 Tana sua ŋonoono tau tiso piom ta mata popoten mi imar na, motoyom iŋgal be kikiskis ma imbol la leleyom. Naso kesekap la ki Tamanda Anutu ziru Lutuunu ma kombotmbot. Yo 14:23 25 Mi ina mbotŋana ki Anutu ta iseeŋge iseeŋge ma ila. Muŋgu Yesu itunu imbuk sua be ikam lende mbotŋana ta kembei. Yo 6:40, 17:3; 1Yo 5:11
26 Sua ti, nio aŋbeede piom paso, aŋsombe aŋsope yom pizin wal tau tikamam be tipandelndel yom i. 27 Mi niom na, kakam Bubuŋana mburaana ma isalakaala yom kek. Mi mburaana tana imbotmbot raama yom men i. Tana zin wal ta tiserseere be tipaute yom na, len uraata sa piom som. Pa Bubuŋana itunu ko ipaute yom pa koroŋ ta boozomen. Bubuŋana tana koroŋ ŋonoono. Pakaamŋana sa som. Tana ŋgar ta so Bubuŋana ipaute yom pa na, motoyom iŋgal be kikiskis. Naso kesekap la ki Krisi ma kombotmbot. Yo 14:26, 16:13+; 1Kor 2:10; Ibr 8:10+ 28 O lutuŋan, motoyom iŋgal be kesekap la ki Krisi ma kombotmbot. Beso ni imiili ma imar mini, na iti ko tomoto i som, kanda miaŋ som, mi toko pini som. Ko nindi se, mi temender la kereene uunu raama lelende ambai. Mk 8:38; 1Yo 4:17
29 Iti tuute: Krisi, ni tomtom ndeeŋeŋana. Tana tomtom ta sombe ikamam mbulu ndeeŋeŋana men na, tuute: Ni, Anutu ikami ma iwe popoŋana mi iwe ni lutuunu kek. Yo 1:12+, 3:3+; Tit 3:5; 1Yo 3:7,9+

2:1: Ro 8:34; 1Tim 2:5; Ibr 7:25, 9:24

2:2: Yo 1:29, 11:52; Ro 3:23+, 5:18

2:3: Yo 13:34+, 14:21, 15:12

2:5: Yo 14:21,23

2:6: Mt 11:29; Yo 13:15, 15:4+; 1Pe 2:21

2:7: Yo 13:34+, 15:12

2:8: Yo 1:9, 8:12; Ro 13:12; Ep 5:8; 1Tes 5:5,8

2:9: 1Kor 13:2; 2Pe 1:7+

2:10: Ro 14:13

2:11: Yo 11:10, 12:35; 1Yo 1:5

2:12: Lu 24:47; Ŋgo 4:12, 10:43

2:14: Ep 6:10

2:15: Mt 6:24; Ro 12:2; Yems 4:4

2:16: Ro 13:14; Yems 4:16; 1Pe 2:11

2:17: Mbo 15:5; Mt 7:24; 1Kor 7:31; Yems 1:10+

*2:18: Yesu ka koi ti, Grik kalŋan tipaata tisombe “Antikrais.”

2:18: Mt 24:5,24; 2Tes 2:3; 1Tim 4:1; 2Pe 2:1; 1Yo 4:3

2:19: Mbo 41:9; Ŋgo 20:30

2:20: 1Kor 2:15; 2Kor 1:21; Ep 1:13

2:21: Ro 15:14

2:22: 1Yo 4:3

2:23: Yo 5:23, 14:7+, 15:23; 1Yo 4:15, 5:1; 2Yo 9

2:24: Yo 14:23

2:25: Yo 6:40, 17:3; 1Yo 5:11

2:27: Yo 14:26, 16:13+; 1Kor 2:10; Ibr 8:10+

2:28: Mk 8:38; 1Yo 4:17

2:29: Yo 1:12+, 3:3+; Tit 3:5; 1Yo 3:7,9+