3
Anutu lutuunu bizin ko tipa ki Taman
Kere. Tamanda Anutu, ni leleene piti ilip kat. Pa ipaata iti be itunu lutuunu bizin. Mi sua tina, ŋonoono kat. Ni lutuunu bizin ta iti. Tamen wal toono kan tikilaala kat iti som. Paso, tiute Anutu som. Yo 1:12, 3:16, 16:2+; Ro 8:16 O niom wal tio, koozi iti tewe Anutu lutuunu bizin kek. Mi kaimer ko tewe pareiŋanda, ina takankaana pa. Pa Anutu iswe piti zen. Tamen iti tuute: Kaimer sombe Krisi iswe itunu ma imbot mat, mi tere kati, nako tewe kembei ta ni itunu. Mt 5:8; Ro 8:29; 1Kor 15:49; 2Kor 3:18; 2Pe 1:4 Mi wal boozomen ta so tiurur matan pa mbulu tana be ipet, inako tiurpewe zitun be lelen mi mbulu kizin iŋgeeze kembei ni itunu. 2Kor 7:1; 1Pe 1:15
Wal boozomen ta sombe tikamam sanaana, ina timololo Anutu tutu kini. Pa sombe tomolo Anutu tutu kini, na takam sanaana. Mi iti tuute: Krisi, ni isu toono bekena ipambiriizi sanaana ma ila lene. Mi ni itunu le sanaana sa som. Yesa 53:4+; Yo 1:29; 2Kor 5:21; Ibr 4:15; 1Pe 2:22+ Tana tomtom ta sombe isekap la kini, inako irao inoknok sanaana kamŋana mini som. Mi sombe tomtom sa inoknok sanaana kamŋana, na ni ikilaala Krisi som, mi iute i som. Ro 6:1-14; 1Yo 2:4
Lutuŋan, kere. Kokena tomtom sa ipandelndel yom. Tomtom ta sombe ikamam mbulu ndeeŋeŋana, ta iwe tomtom ndeeŋeŋana pa Anutu mataana. Kembei Krisi itunu. Ro 2:13; Ep 5:6; 1Yo 2:29 Mi sombe tomtom sa inoknok sanaana kamŋana, na ni tomtom ki Sadan. Paso, indeeŋe ta mata popoten mi imar na, Sadan inoknok sanaana kamŋana. Tamen Anutu Lutuunu, ni isu toono bekena ireege Sadan uraata kini. Un 3:15; Yo 8:44, 16:11; Ibr 2:14 Tana tomtom ta sombe Anutu ikami ma iwe popoŋana mi iwe ni lutuunu kek, inako inoknok sanaana kamŋana mini som. Ni ko ipa ki Anutu. Pa Anutu koroŋ kini imbotmbot la leleene. Tana ni ko irao inoknok sanaana kamŋana mini na som. Pa Anutu ikami ma iwe popoŋana kek. Yo 1:13, 3:3+; Ibr 8:10; 1Pe 1:23; 1Yo 5:18 10 Tana iti irao tikilaala Anutu lutuunu bizin mi Sadan lutuunu bizin ta kembei: Sombe tomtom sa ikamam mbulu ndeeŋeŋana som, na ni Anutu lutuunu som. Mi sombe tomtom sa iurur leleene pizin toŋmatiziŋ ta ki Krisi i som, ina ni tomini Anutu lutuunu som. Mt 13:38+; 1Yo 2:29, 4:8
Lelende par piti
11 Pa indeeŋe ta kuurla mata popoten mi imar na, keleŋ sua ta kembei: Iti bela tuur lelende par piti. Yo 13:34, 15:12; 1Tes 4:9 12 Tana kere yom: Kokena kakam mbulu kembei ta Kain. Pa ni, Tomtom Sanaana ikami ma iwe lene, to imaŋga mi ipun sorok tiziini Abel ma imeete. Mi ipuni ma imeete pa so uunu i? Ni itunu ikamam mbulu sananŋana, mi tiziini na, ikamam mbulu ndeeŋeŋana. Un 4:8; Ibr 11:4 13 Tana niom toŋmatiziŋ tio, sombe wal toono kan tiurur koi piom, na kakam ŋgar boozo pa pepe. Mt 5:11+; Yo 15:18+, 17:14; 2Tim 3:12 14-15 Iti tuute: Iti tombot la zaala ki meeteŋana mini som. Iŋgi tototo zaala toro tabe tombot ambai pa ma alok. Paso, tu'urur lelende pizin toŋmatiziŋ ki Krisi. Mi tomtom ta sombe iurur koi pizin toŋmatiziŋ kini ta ki Krisi i, na ni imbotmbot men la zaala ki meeteŋana. Pa tomtom ta kembena, Anutu ire i ma raraate kembei ta tomtom ta ipun tomtom toro ma imeete. Mi niom kuute: Tomtom ta so ipun tomtom toro ma imeete, na ni ikam mbotŋana ta ki Anutu i som. Mt 5:21+; Yo 5:24; Ga 5:19+; Tur 21:8
16 Indeeŋe Yesu Krisi ikam murindi, mi izem itunu ma imeete piti na, iswe kat mbulu kini ta iurur leleene piti. Tana iti tomini bela takam mbulu raraate men, mi tezem itundu mi koroŋ kiti pizin toŋmatiziŋ kiti ta ki Krisi i. Yo 3:16, 15:13; Ro 5:8; Ga 1:4; Ep 5:2,25 17 Tana iti sombe tarao pa koroŋ ta ki toono ti, mi sombe tere toŋmatiziŋ kiti pakan tau timbot ŋoobo, mi tamen tu'uulu zin som, inako mbulu ki tuur lelende pa Anutu mi zin tomtom imbot la lelende be parei? Som. Lu 3:11; Yems 2:15+ 18 Lutuŋan, kere. Kokena tozzo sorok ma toso iti tuur lelende pizin tomtom, mi tamen takamam ka mbulu som. Pa sombe takam ta kembei, na takam pakaamŋana biibi. Bela takam ka mbulu tomini, tona sua kiti iwe koroŋ ŋonoono. Yems 2:14-22; 1Pe 1:22
Koroŋ pakan tabe ipombol ti ma tomoto Anutu mini som
19-20 Tana iti tuur lelende pizin tomtom. Naso iuulu iti be tomoto Anutu mini som. Mi iswe kembei sua ŋonoono imbol la lelende. Mazwaana pakan, iti tayamaana la lelende kembei mbulu kiti irao pa Anutu mataana som. Ina ŋonoono. Tamen Anutu, muŋaiŋana kini ilip, mi ni iute koroŋ ta boozomen. Sombe takam ŋgar pa koroŋ ru taiŋgi, nako tomoto be tala kolouŋana pini som. Mbo 139:1+
21 O niom wal tio, sombe tayamaana la lelende kembei koroŋ sa iwe mbukuunu piti mi Anutu som, inako tomoto be tala kolouŋana pini som. Ro 5:1; Ibr 4:16, 10:22 22 Mi sombe tusuŋi pa koroŋ sa, na ni kola ikam piti. Paso, iti tototo ni leleene mi tutu kini tau. Mbo 34:15, 145:18; Mt 7:7+, 21:22; Yo 9:31, 14:13 23 Mi tutu kini ta ti: Iti bela tuurla ki Lutuunu Yesu Krisi, mi tuur lelende par piti kembei ta Yesu iso piti pa na. Yo 6:29, 13:34; 1Pe 4:8 24 Tomtom ta sombe itoto tutu kini tana, na ni ziru Krisi ko tiparlup zin ma tiwe tamen. Mi Bubuŋana ta Krisi ikam piti i, ko ikam ti ma tikilaala kembei Krisi, ni imbotmbot raama iti. Yo 14:23, 15:10; Ro 8:9; 1Yo 4:12+

3:1: Yo 1:12, 3:16, 16:2+; Ro 8:16

3:2: Mt 5:8; Ro 8:29; 1Kor 15:49; 2Kor 3:18; 2Pe 1:4

3:3: 2Kor 7:1; 1Pe 1:15

3:5: Yesa 53:4+; Yo 1:29; 2Kor 5:21; Ibr 4:15; 1Pe 2:22+

3:6: Ro 6:1-14; 1Yo 2:4

3:7: Ro 2:13; Ep 5:6; 1Yo 2:29

3:8: Un 3:15; Yo 8:44, 16:11; Ibr 2:14

3:9: Yo 1:13, 3:3+; Ibr 8:10; 1Pe 1:23; 1Yo 5:18

3:10: Mt 13:38+; 1Yo 2:29, 4:8

3:11: Yo 13:34, 15:12; 1Tes 4:9

3:12: Un 4:8; Ibr 11:4

3:13: Mt 5:11+; Yo 15:18+, 17:14; 2Tim 3:12

3:14-15: Mt 5:21+; Yo 5:24; Ga 5:19+; Tur 21:8

3:16: Yo 3:16, 15:13; Ro 5:8; Ga 1:4; Ep 5:2,25

3:17: Lu 3:11; Yems 2:15+

3:18: Yems 2:14-22; 1Pe 1:22

3:19-20: Mbo 139:1+

3:21: Ro 5:1; Ibr 4:16, 10:22

3:22: Mbo 34:15, 145:18; Mt 7:7+, 21:22; Yo 9:31, 14:13

3:23: Yo 6:29, 13:34; 1Pe 4:8

3:24: Yo 14:23, 15:10; Ro 8:9; 1Yo 4:12+