2
Lende ŋger pa tomtom ta boozomen
O niom toŋmatiziŋ tio, niom kuurla ki Merere kiti Yesu Krisi kembei ni ta azuŋka katuunu mi iswe kat Anutu piti. Tana leyom ŋger pa tomtom ta boozomen. Kokena kapakur wal pakan, mi wal pakan na kerepiili zin. Mt 22:16; Ŋgo 10:34; Yems 2:9
Nio aŋso paso? Tomtom ru. Ta, ni mbio uunu. Iru pa mburu ambaimbaiŋan, mi kukuugu milmilŋana imbot sala namaana. Mi tomtom toro, ni sorokŋana, mi iru pa mburu maraazaŋana. Niom sombe kulup yom pa suŋŋana, mi wal ru ta kembei tile be tigaaba yom, inako kakam parei pizin? Ina kozo ko kapakur tomtom ta iru pa mburu ambaimbaiŋan mi koso pini: “Mar, mbulem su mbalia ndabokŋana ti.” Mi tomtom sorokŋana, nako koso pini ta kembei: “Ai, nu mender tana,” som, “Mar, mbulem su ta kumbuŋ uunu.” Kere. Mbulu tiom tana ambai? Som. Niom koso kitiiri waeyom bizin mi kipitpeleele zin ta kembei, na ŋgar sananŋana izeebe yom kek.
O niom toŋmatiziŋ tio ta leleŋ piom ilip na, niom kuute som? Zin wal ta tomtom toono kan tire zin kembei zin sorrokŋan, ina Anutu ipeikat zin be ipombol zin ma tirao kat pa urlaŋana, mibe zan pa kar kini. Kar tana, ni imbuk sua muŋgu kek be ikam pizin wal tau tiur lelen pini na. Lu 6:20; 1Kor 1:26+ Tamen niom na, kerepilpiili zin wal sorrokŋan. Lak. Ziŋoi ta tiurur pataŋana piom mi tipamendernder yom pa sua? Ina zin mbio uunu tau. 1Kor 11:22 Mi ziŋoi ta tipasansaana Krisi zaana ambaiŋana ta ise tiom na? Ina zin tau. Kere som?
Peeze ki Anutu na, ka tutu biibi ta imbot la bude ta kembei:
Lelem pa tomtom ta boozomen, kembei ta lelem pa itum. Wkp 19:18
 
Niom sombe koto kat tutu tamen tina, inako kakam kat mbulu. Mt 19:19; Ro 13:8+; Ga 5:14 Tamen sombe kakam mbulu raraate pa tomtom ta boozomen som, mi kapakur wal pakan, mi kerepiili zin pakan, na mbulu tiom tana iswe yom kembei komolo tutu ki Anutu kek. 10 Pa kere. Sombe tomtom sa ito tutu ta boozomen, mi tamen imolo pa tutu tamen sa, inako uunu kini isaana ma kembei tomtom ta imolo tutu ta munŋaana men. Mt 5:19; Ga 3:10 11 Pa Anutu tamen ta iso: “Pasaana ula pepe,” mi “Pun tomtom ma imeete pepe.” Tana nu sombe pasaana ula ka tutu som, mi tamen pun tomtom ma imeete, na ta tina. Nu molo tutu kek. Kam 20:13+; Ro 13:9
12-13 Tana motoyom iŋgal ituyom be mbulu tiom mi sua tiom ito kat tutu ki Krisi. Pa tutu tana irao be isan ti la sanaana mburaana. Mi indeeŋe mbeŋ kaimer na, Anutu ko itiiri iti pa tutu tana. Tana zin tau timuŋaiŋai zin tomtom som na, zin tomini, Anutu ko imuŋai zin som, mi iur kadoono pizin. Mi zin ta titoto mbulu ki muŋaiŋana, nako nin ise mi lelen ambai. Mt 5:7, 18:32+, 25:41+; Yems 1:25+
Sombe urlaŋana ipiyooto mbulu ambaiŋana som, na imeete kek
14 O niom toŋmatiziŋ tio, sombe tomtom sa iso ni iurla ki Krisi, mi tamen ikamam ka mbulu som, nako urlaŋana kini tana iuuli be parei? Som. Pa urlaŋana ta kembei irao iwe zaala pini be Anutu ikamke i na som. Mt 7:21,26; Ro 6:15; Ga 5:6; Yems 1:23 15 Lak, sombe toŋmatiziŋ tiom pakan len mburu som mi kan kini som, mi timbot ŋoobo kat, Lu 3:11; 1Yo 3:17+ 16 mi sombe ku'uulu zin som, mi koso sua men pizin ta kembei: “Ai, kala raama leleyom ambai mi kakam koyom kini mi kuru leyom mburu. Kokena niyom tekteege.” Nako sua tiom tana iuulu zin be parei? Som. 17 Ina raraate men pa urlaŋana. Sombe koroŋ ki sua men, mi ipiyotyooto mbulu ambaiŋana som, na imeete kek.
18 Mi tiom tasa ko imaŋga mi iso ta kembei: “Wal pakan timbol pa urlaŋana, mi wal pakan na, timbol pa mbulu ambaiŋana.” Tamen nio ko aŋpekel ta kembei: Sombe nu urla, mi tamen kamam ka mbulu som, na sokorei ta iswe kembei urlaŋana ku koroŋ ŋonoono? Som. Mi nio na, aŋre ta kembei. Mbulu tio ambaiŋana ta izzwe kembei urlaŋana tio ina koroŋ ŋonoono. Yems 3:13 19 Mi nu ta zzo ta kembei: “Nio ti aŋurla kembei Anutu tamen ta imbotmbot.” Ina ambai. Mi tamen zin bubuŋana sananŋan tiurla ta kembei tomini. Tanata timoto kan ma timbotmbot. Mk 1:24
20 Nu kankaanaŋom! Sombe nu so ta kembei: “Nio aŋurla ki Anutu,” mi tamen kamam ka mbulu som, na urlaŋana ku koroŋ ŋono somŋana. Parei? Ko aŋpaute u pa sua ti ka uunu?
21 Motom ise ki tumbundu Abaraam. Ni iwe tomtom ndeeŋeŋana pa Anutu mataana be parei? Uunu imbot la mbulu kini tau ikam lutuunu Isak be iwe patoronŋana pa Anutu. Un 22:1+ 22 Re kek? Mbulu ki Abaraam, ta ikam uraata ramaki urlaŋana kini, mi ikam ma urlaŋana kini iwe koroŋ ŋonoono kat. Ibr 11:17+ 23 Tana sua ta tibeede pataaŋa kek na, iur ŋonoono. Sua ta kembei:
Abaraam, ni iurla ki Anutu. Tana Anutu ipomoozi mi ire i kembei ni tomtom ndeeŋeŋana. Un 15:6; Ro 4:3
Uunu tana ta tipaati be “Anutu toroono.”
24 Tana iti sombe tuurla, mi tamen takamam ka mbulu som, inako irao som. Bela mbulu ambaiŋana igaaba urlaŋana kiti, tona tewe ndeeŋeŋanda pa Anutu mataana.
25 Mi motoyom ise ki moori ta zaana Reap tomini. Ni moori zaala lwoono kana. Tamen iuulu zin ŋgoŋana ki Yosua ma timbot ambai, mi iurpe len zaala be tiko ma tila len. Uraata kini tana, ta ikam ma Anutu ire i kembei ni moori ndeeŋeŋana. Yos 2:1+, 6:17,25; Ibr 11:31 26 Tana sombe tomtom sa iurla men, mi ikamam ka mbulu som, na urlaŋana kini imeete kek. Kembei ta iti tomtom. Sombe bubuŋanda imap piti, na temeete. Yems 2:17

2:1: Mt 22:16; Ŋgo 10:34; Yems 2:9

2:5: Lu 6:20; 1Kor 1:26+

2:6: 1Kor 11:22

2:8: Wkp 19:18

2:8: Mt 19:19; Ro 13:8+; Ga 5:14

2:10: Mt 5:19; Ga 3:10

2:11: Kam 20:13+; Ro 13:9

2:12-13: Mt 5:7, 18:32+, 25:41+; Yems 1:25+

2:14: Mt 7:21,26; Ro 6:15; Ga 5:6; Yems 1:23

2:15: Lu 3:11; 1Yo 3:17+

2:18: Yems 3:13

2:19: Mk 1:24

2:21: Un 22:1+

2:22: Ibr 11:17+

2:23: Un 15:6; Ro 4:3

2:25: Yos 2:1+, 6:17,25; Ibr 11:31

2:26: Yems 2:17