Ro Ki Yoan Ta Iwe Ru Pa
1
1 O mooribi *Iŋgi Yoan ibeede sua “mooribi,” mi ves 13 iso pa “tizim moori.” Wal ŋgarŋan tiso ta kembei: Iŋgi Yoan ikam sua tooroŋana: Moori ru ti timender pa lupŋana ru ki Krisi. tau Anutu ipei katu mi ikamu ma we lene kek na, nio ta aŋwe mboroŋan pa lupŋana ki Krisi, ta aŋbeede ro ti ima pu niomŋan lutum bizin.
Pa sua ŋonoono ta ilup ti ma leleŋ piom ilip kat. Mi nio ituŋ tamen som. Nio niamŋan wal boozomen ta tiute sua ŋonoono, ta leleyam piom. 2 Niam leleyam piom paso, sua ŋonoono imbotmbot la lelende. Mi sua tana ko imbotmbot raama iti ma alok.✡Yo 8:31+
3 Sua ŋonoono mi mbulu ki Tamanda Anutu mi Lutuunu Yesu Krisi ta tiur lelen piti na, ko iwe zaala piti be tikampe iti, mi timuŋai iti, mi tikam ti ma tombot ambai. Ŋonoono.
Toto sua ŋonoono mi tuur lelende par piti
4-5 O mooribi, nio aŋleŋ lutum bizin pakan urun ta kembei: Zin titoto sua ta Tamanda Anutu iur piti na, mi tipa pai kizin ma indeeŋe men pa sua ŋonoono. Tabe ikam yo ma leleŋ ambai kat. Mi iŋgi aŋbeede ro ti ima piom bekena ipombol niomŋan lutum bizin mini pa mbulu ki lelende par piti. Sua ti, popoŋana som. Iŋgi tutu tau teleŋ ta mata popoten mi imar.✡Yo 13:34+ 6 Mbulu ki lelende par piti na, ka zaala ta kembei: Tapa pai kiti ma indeeŋe men pa Anutu tutu kini ta boozomen. Mi tutu kini biibi tau keleŋ ta mata popoten mi imar na, ta kembei: Bela tuur lelende par piti mi tuur lelende pa Anutu.✡Yo 14:15,21, 15:10
Yesu ka koi bizin
7 Motoyom iŋgal ituyom! Pa wal boozomen tau tipandelndel zin tomtom, ta tiwwa pa toono i. Wal tana tiurla kembei Yesu Krisi isu toono ma iwe tomtom na som. Wal ta kembei na, wal pakamkaamŋan, mi tiwe Yesu ka koi.✡1Yo 2:18+, 4:1+ 8 Tana motoyom iŋgal be kikiskis sua tiam. Naso kakam kadoono ambaiŋana ta Anutu isombe ikam piom na. Tana kere. Kokena uraata ta muŋgu amkam piom na isaana, to kadoono tiom tana iko piom.✡Ga 4:11
9 Sombe tomtom sa ire kembei sua ki Krisi irao som, mi iseeŋge pa ŋgar pakan, ina ni, Anutu imbotmbot raami som. Tamen sombe tomtom sa ikiskis sua ki Krisi, inako ziŋan Tamaana mi Lutuunu tiparlup zin ma tiwe tamen.✡1Yo 2:23
10-11 Tana niom, sombe tomtom sa ima ipet tiom, mi iso yom pa sua toro ta ipa ndel pa Krisi sua kini, na koso sua pini mi kakami ma ilema ruumu tiom pepe. Kokena kagaabi pa uraata kini sananŋana tana.✡Ro 16:17; Ep 5:11; 2Tes 3:6; Tit 3:10
Sua pemetŋana
12 Nio motoŋ iŋgalŋgal sua boozomen tabe aŋso piom. Tamen leleŋ be aŋbeede se ro pepe. Tana leleŋ be aŋma aŋre yom, mi itiŋan taparre iti, to toso lende sua mi lelende ambai kat.
13 Tizim moori ti, tau Anutu ipeikati na, ziŋan lutuunu bizin tikam aigule kizin piom tomini.