49
Yakopbi ipombol lutuunu bizin
Tona Yakopbi iboobo lutuunu bizin ma timar. Tipet kini to iso: “Kamar ma kiliu yo, bekena aŋpaute yom pa mbulu tabe ipet piom pa kaimer i.
“O lutuŋ bizin, tomoyom Israel ta nio i.
Tana kamar kulup yom mi keleŋ sua tio.
 
“Ruben, nu na nio lutuŋ muŋgamuŋga.
Indeeŋe ta nio naŋgaŋ kaibiim na, aŋpeebu.
Tanata mburoŋ ise ku. Zom mi mburom ko ilip pa tizim bizin.
 
Tamen nu kembei wo biibi ta ikas ke ma ipet i.
Pa nu rao be gabiizi itum na som.
Tana nu ko we mataana pa tizim bizin mini na som.
Pa nu lem ŋger pio som, mi mbuulu waeŋ.
Tana pasaana mbalia tio kek. Un 35:22
 
“Simion ziru Lebi na, mbulu kizin tamen.
Ziru tikamam sorok malmal mi tikazas zin tomtom pa buza kizin. Un 34:25
 
Tana nio leleŋ ila kizin som,
mi irao aŋgaaba zin pa lupŋana kizin som tomini.
Pa ziru keten malmalŋan, mi tipunun zin tomtom ma timetmeete,
mi tipasansaana zin mbili sorok.
 
Anutu ko iur kadoono ise kizin.
Pa zin keten malmalŋan, mi lelen tataŋa men.
Mi tileleele zin tomtom risa som.
Tana nio ko aŋyaŋgwiiri zin mi popoŋana kizin ma timbot leŋaleŋa pa toŋmatiziŋ kizin mazwan.
 
“Mi Yuda na, tom ma tizim bizin ko tipakuru.
Pa nu ko sabuleeze kom koi bizin ŋguren.
Tana tom bizin mi tizim bizin ko tilek kumbun pu.
 
Yuda, nu kembei laion popoŋana
ta mburaana biibi mi tomtom timoto kan pini.
Laion sa isombe ikan buzur ma imap, to isu mi ikeene.
Mi asiŋ ko irao be imbuuli? Som. Tur 5:5
10 “Yuda ko iteege tete ki king,
mi popoŋana kini ko tikamam peeze pizin tomtom
ma ila irao tete katuunu ŋonoono imar,
tonabe ni ikam, mi wal ta boozomen ko timbot la ni kopo mbarmaana. Mbo 2:9, 110:2; Mt 2:6
11-12 “Ni ko irao kat pa koroŋ ta munŋaana men,
mi toono kini ipiyooto baen mi kini boozo.
 
13 Popoŋana ki Sebulun ko timbot kolouŋana pa tai,
mi wooŋgo boozo ko tilela pa maata kizin.
Toono kizin ko ila ma imap su kar Sidon.
 
14-15 “Isaka, ni kembei mbili uraata kana ta mburaana biibi,
mi izza be mburu isala ndemeene ma imaŋga pa uraata.
Mi lele kini ko ambaiŋana be tomtom timbot pa mi tikam uraata.
Tana popoŋana kini ko timbel uraata.
Mi kizin pakan ko tiwe mbesooŋo mi tikam uraata pataŋana.
 
16-17 “Dan popoŋana kini ko tipet ma tiwe wal uunu ta.
Mi zin ko tiurpewe pataŋana kizin tomtom.
Tamen ko loŋa mi tipasaana zin tomtom tomini.
Zin ko kembei ta mooto sananŋana ta imbot la zaala zilŋaana mi izaŋzaaŋa,
beso tomtom sa imar ramaki hos kini,
to loŋa mi iŋa lae pa hos kumbuunu,
mi tomtom ta imbot sala hos ndemeene na, itop su toono.
 
18 “O Merere, nio aŋur motoŋ pu be uulu yo.
19 “Popoŋana ki Gat na, zin wal kuumbuŋan ko tipamurur zin, mi tikam malmal pizin.
Tamen zin ko mburan mburan, mi tiketo zin ma tila len.
 
20 “Toono tabe popoŋana ki Aser timbot pa i, ko mbuyeeneŋana, mi ipiyotyooto kini ambaimbaiŋan boozo kat.
Tana zin king ko matan berber pa be tikan.
 
21 “Popoŋana ki Naptali ko kembei ta mekmek saŋsaŋŋana
ta itoto itunu leleene mi iwwa le sorok,
mi ipeebe lutuunu bizin ambaimbaiŋan.
 
22 “Yosep popoŋana kini ko kembei ta ke ŋonoonoŋana
ta imbot igarau yok kezeene, mi namaana iburakraaga,
mi ipiyooto ŋonon ambaimbaiŋan boozo. Mbo 1:3
23 Yosep ka koi bizin timbuuru pini, mi tiso tipeeni ma imeete. Tamen tirao som.
24 Pa ni namaana alalalŋana, mi tomtom mburaanaŋana.
Paso, Anutu mbolkeŋkeŋŋana ki Yakop, tau mboroŋana kizin Israel mi tun ŋonoono, ni iporoukaali.
25 Yosep, Anutu ki tomom iuluulu u.
Anutu mbura keskeezeŋana ko ikampe popoŋana ku,
mi ikam yaŋ ma izzu pizin,
mi ikam yok ta imbot toono leleene na ma izze pizin.
Mi ko ikampe zin pa mbili, mi pikin, mi kini boozo.
26 Pa toono tabe timbot pa i, ka mba boozo, mi lele abalabalŋana.
Tana yaŋ ko izzu pa totomen.
Pombolŋana ta aŋkamam pu i, ko imbotmbot se ku ma alok.
Pa nu na, aŋuru be we biibi pa tom bizin.
 
27 “Benyamen, mbulu kini kembei ta me saŋsaŋŋana.
Ni izaŋzaaŋa putar mi ikanan buzur pa aigule ma mbeŋ.”
 
28 Tana taman Yakopbi ipombol lutuunu bizin tataŋa pa sua tana. Zin Israel un laamuru mi ru tiyooto pa Yakop lutuunu bizin laamuru mi ru tana.
Yakopbi imeete
29-30 Yakopbi ipombol lutuunu bizin makiŋ, to iur sua pizin ta kembei. Iso: “Nio iŋgi be aŋzem yom i mi aŋla kizin wal tio ta timetmeete kek na. Sombe aŋmeete, na kakam yo mi kala, mi kuur yo lela raŋ sumbuunu ta imbot toono Makpela ta muŋgu tumbuŋ Abaraam iŋgiimi la ki Eporon na. Raŋ sumbuunu tana imbot igarau pa kar Mamre ta Kanaan a. Un 23:16-19, 50:13 31 Pa ina, tiur Abaraam ziru kusiini Sara, mi Isak ziru kusiini Rebeka lela. Mi nio aŋur kusiŋ Lea ilela tomini. 32 Tana raŋ sumbuunu ta Abaraam iŋgiimi la kizin wal ki Et na, nio aŋsombe niom kuur yo lela tomini.” 33 Kolman Yakopbi iso sua tana ma imap, to iswooro kumbuunu se mbalia, mi iyataaŋa, mi ipas.

49:4: Un 35:22

49:5: Un 34:25

49:9: Tur 5:5

49:10: Mbo 2:9, 110:2; Mt 2:6

49:22: Mbo 1:3

49:29-30: Un 23:16-19, 50:13