3
Yesu zaana biibi ma ilip pa Mose
1 O niom toŋmatiziŋ tio, bobi ki kar saamba ta ikam yom tomini ma kewe Anutu wal kini potomŋan kek. Tana kakamam ŋgar pa Yesu mi kopo i se ndomoyom. Pa urlaŋana kiti ta tezzwe na, iso ta kembei: Ni ta Ŋgoŋana ki Anutu, mi patoronŋana ka tomtom biibi ŋonoono.✡Ro 8:29+; Ibr 2:17, 4:14+, 10:23, 12:2 2 Mi uraata ta Anutu iur la namaana na, ni itoto Anutu leleene mi ikamam kat, kembei ta Mose ito Anutu leleene mi imborro kat iwal biibi ki Israel. Pa muŋgu zin ta tiwe kembei Anutu ruumu kini.✡Nam 12:7 3 Iti tuute: Sombe tomtom sa ipo ruumu ambaiŋana, na ni ta ikam zaana biibi. Mi ruumu ŋonoono na som. Ina raraate men pa Yesu mi Mose. Pa Mose, ni kembei ta ruumu men. Tamen Yesu, ni kembei tomtom ta ipo ruumu. Tana Yesu zaana biibi ma ilip pa Mose.✡Mt 16:18; 2Kor 3:7+ 4 Ruumu sa irao ipet sorok na som. Ruumu ta boozomen na, kan tomtom bizin ta tiwwo. Mi Anutu ta iur koroŋ ta boozomen ma tipet.✡Un 1:1+ 5 Mose, ni mbesooŋo men ki Anutu ta itoto Anutu leleene, mi ikamam kat uraata pa Anutu ruumu kini, mi ipatooŋo zin tomtom pa koroŋ pakan ta kaimer Anutu iswe ma ipet kat mat.✡Kam 14:31 6 Tamen Krisi, ni Anutu itunu Lutuunu ta itoto kat Tamaana leleene mi imborro kat ruumu kini. Tana ruumu katuunu ta ni. Ruumu tana na, iti tomtom ta tuurla kini na. Pa sombe tomoto som, tikiskis urlaŋana kiti ma tuŋ, mi menmeen ti ma tazza koroŋ ambaiŋana tabe Anutu ikam piti pa kaimer i, na tewe kembei Anutu ruumu kini.✡1Kor 3:16; 2Kor 6:16; 1Tim 3:15; Ibr 4:14, 6:11, 12:1; 1Pe 2:5
Tere iti: Kokena tipizil ndmende pa Anutu mata yaryaaraŋana
7-8 Tana keleŋ sua ta Bubuŋana Potomŋana ipiyooto na. Iso ta kembei:
Koozi, sombe keleŋ Anutu kalŋaana, na keleŋsil sua pepe.
Kokena kakam zooroŋana kembei ta tumbuyom bizin.
Pa indeeŋe ta ni itoombo zin su lele bilimŋana na, tileŋsil sua mi tizorzoori.
9 Pa ni imbelmbel uraata bibip isu lele tana pa ndaama tomtooru, mi zin tire kat pa matan.
Tamen tiurla som, mi titomtoombo mburaana.
10 Tanata keteene malmal kat pizin mi isombe:
“Gorgori ta zin titoto zaala tio som,
mi lelen imbotmbot molo pio.”
11 Mi ni iso sua mbolŋana pizin raama keteene malmal ta kembei:
“Ŋonoono kat. Toono ta aŋur pizin be tila ma keten su mi timbot ambai pa na, zin ko irao tilela na som. Som kat!”✡Nam 14:21+; Mbo 95:7+; Mt 4:7
12 Tana niom toŋmatiziŋ tio, kere yom: Kokena tiom tasa ŋgar kini isaana, to izem urlaŋana kini, mi ipizil ndemeene pa Anutu mata yaryaaraŋana. 13 Tana aigule ta boozomen kaparpombolmbol yom. Kokena tiom tasa, ŋgar sananŋana ipakaami, to ŋgar kini imbol kat, mi irao ileŋ Anutu kalŋaana mini som. Mi uraata ki pombolŋana tana, sombe kakam, na kakam ta koozi. Keseke ma ila aigule toro pepe.✡1Tes 5:11,14; Ibr 10:24+ 14 Tana iti temender mbolŋana, mi tikiskis urlaŋana kiti ta mataana kana na, ma tuŋtuŋ ma irao swondo. Naso teswe kembei iti Krisi wal kini ŋonoono.✡Kol 1:23; Ibr 6:11, 4:14, 10:35; Tur 2:25
15 Kembei ta Anutu sua kini iso ma ila kek. Isombe:
Koozi, sombe keleŋ Anutu kalŋaana, na keleŋsil sua pepe.
Kokena kakam zooroŋana kembei ta tumbuyom bizin.✡Mbo 95:7+; Ibr 4:7
16 Lak, ziŋoi ta tileŋ sua, mana tizooro Anutu? Ina iwal biibi ki Israel ta Mose iyaaru zin, mi tizem Aikuptu ma tila na.✡Nam 14:1+; 1Kor 10:1+ 17 Mi ziŋoi ta Anutu keteene malmal pizin pa ndaama tomtooru na? Ina zin wal tau tinoknok sanaana kamŋana na. Uunu tina ta tiwe uri lup isu lele bilimŋana.✡Mbo 106:24+; 1Kor 10:5+ 18 Mi ziŋoi ta Anutu iso sua mbolŋana pizin ma iso:
“Ŋonoono kat. Toono ta aŋur pizin be tila ma keten su mi timbot ambai pa na, zin ko irao tilela na som. Som kat!”✡Mbo 95:11
Ina zin wal tau tizorzoori tau.✡Lo 1:34+ 19 Tana sua ti iso iti ta kembei: Zin tiurla som, tanata tirao be tilela mi keten su som.✡Mbo 78:22; Yo 3:36; Ibr 4:6
✡3:1: Ro 8:29+; Ibr 2:17, 4:14+, 10:23, 12:2
✡3:2: Nam 12:7
✡3:6: 1Kor 3:16; 2Kor 6:16; 1Tim 3:15; Ibr 4:14, 6:11, 12:1; 1Pe 2:5
✡3:11: Nam 14:21+; Mbo 95:7+; Mt 4:7
✡3:13: 1Tes 5:11,14; Ibr 10:24+
✡3:14: Kol 1:23; Ibr 6:11, 4:14, 10:35; Tur 2:25
✡3:17: Mbo 106:24+; 1Kor 10:5+
✡3:18: Lo 1:34+
✡3:19: Mbo 78:22; Yo 3:36; Ibr 4:6