5
Sua ta ila pizin mbio uunu
1 Niom wal ta leyom koroŋ boozo na, keleŋ! Leleyom ipata mi kakam tiŋiizi biibi. Pa pataŋana biibi ta iŋgi be ikam yom i. ✡ Lu 6:24; 1Tim 6:9 2-3 Pat gol ma silba mi mburu ambaimbaiŋan ta kondoundou lae pa ituyom na, munŋaana men kola ibuuzu ma isaana lup, mi ikan yom kembei ta you. Pa iŋgi toono swoono igarau kek. Tamen niom kakamam kinkiini be kondou koroŋ boozo mete pa ituyom. Koroŋ tiom tana, ta iswe yom pa sanaana tiom. ✡ Mt 6:19
4 Kere! Wal ta tikamam uraata pa mokleene tiom na, kiŋgimgiimi kat zin som. Mi pat kizin pakan kalwoono ta kuruutu ma imbotmbot, ina iboboobo sala pa Merere. Pa tiŋiizi kizin wal tiom uraata kan na, Anutu mbura keskeezeŋana ileŋ kek. ✡ Lo 24:14+
5 Niom, mbotŋana tiom ta kakam su toono, ina ambai men. Kembel mbeezeŋana pa koroŋ kuliyom kana. Tabe kutum kat leyom ma tau! Tana kere yom. Pa aigule tabe tikas yom i, ta ka nol igarau kek. ✡ Lu 12:19+, 16:19+ 6 Pa zin tomtom ndeeŋeŋan ta len uunu sa isaana som na, niom kapamender zin, mi kupun zin ma timetmeete. Mi zin naman ise ma tiporoukaala zitun som. ✡ Mt 5:39
Iti tagabiizi itundu, mi tasa Merere kiti
7 O niom toŋmatiziŋ tio, kemender mbolŋana mi kabaada pataŋana, mi kazza Merere kiti be imiili ma imar mini. Kakam ŋgar pizin tomtom ta tiwaswaaza kini pa mokleene kizin. Zin keten pitpit som. Tiur matan pa mai ambaiŋana tabe ipet pa kaimer i, mi tizza zoŋ mi yaŋ be ikam ma toono ipiyooto kini ŋonoono. ✡ Mk 4:26+; Lu 21:19; Ibr 10:36+ 8 Ina mbulu raraate men piti. Bela temender mbolŋana mi tabaada pataŋana, mi tazza Merere kiti. Pa molo som to imiili ma imar mini. ✡ Ro 13:11+; Ibr 10:37; 1Pe 4:7
9 Tana koyyo kwoyom pa waeyom bizin pepe. Pa Ni tabe itiiri iti pa mbulu kiti i, imendernder kataama kwoono i. Kokena iŋgal motoyom. ✡ 1Kor 4:5; Yems 4:11
10-11 O niom toŋmatiziŋ tio, motoyom ise ki Anutu kwoono bizin ta muŋgu tikam sua kini na. Iti tere zin kembei kampeŋana ki Anutu imbot se kizin. Paso, pataŋana boozo izze kizin, mi timbot ŋoobo kat. Tamen timender mbolŋana mi tibaada pataŋana boozomen tana ma irao swon. Mbulu kizin tana, ina iwe kin ambaiŋana piom be koto. Mi kakam ŋgar pa Yop tomini. Mbol kini, niom keleŋ kek. Ni, pataŋana boozomen ikami. Tamen izem urlaŋana kini som, mi imender mbolŋana. Tanata kaimer Anutu iuuli mi ikampe i kat. Pa Anutu, ni leleene izanzaana piti, mi imuŋaiŋai iti. ✡ Kam 34:6; Yop 1:20+, 42:10; Mbo 103:8; Mt 5:12
12 Niom toŋmatiziŋ tio, koroŋ biibi kat tabe motoyom iŋgalŋgal, ina ta kembei: Sombe kumbuk sua pa koroŋ sa, na kapaata koroŋ saamba kana, som koroŋ toono kana, som koroŋ toro sa zaana be ipombol sua tiom tana pepe. Tana sombe kumbuk sua be kakam koroŋ sa, na koso ta kembei: “E, nio ko aŋkam.” Mi sombe leleyom be kakam som, na koso ta kembei: “Som, nio ko aŋkam som.” Koso men ta kembei, mi koto sua tiom. Ina irao. Kokena Anutu iŋgal motoyom. ✡ Mt 5:33+
Suŋŋana kizin wal urlaŋan, ina koroŋ mburaanaŋana
13 Sombe tomtom tiom tasa pataŋana indeeŋi, na bela isuŋ pa Anutu. Mi sombe tomtom sa imbot ndabok mi menmeeni, na bela imbo mboe mi ipakur Anutu zaana. ✡ Ep 5:19; Pil 4:6; Kol 3:16 14 Mi sombe tomtom sa, ni mete ikami, na bela iboobo zin mboroŋan ki lupŋana tiom ma tila kini, be tisuulu ŋgere sala kuliini, mi tisuŋ Anutu be iurpe i. ✡ Mk 6:13,18 15 Mi sombe tisuŋ raama lelen iurla, inako Merere iurpe tomtom tana, mi iwiti ma imaŋga. Mi sombe tomtom tana ikam sanaana, na Merere ko ireege pini. ✡ Mt 9:2 16 Tana kaparswe sanaana tiom, mi kaparsuŋ piom. Naso Anutu iurpe yom ma niyom ambai. Pa suŋŋana ki tomtom ndeeŋeŋana, ina koroŋ mburaanaŋana mi iurur ŋonoono. ✡ Mbo 34:15+; Yo 9:31; 1Yo 1:9
17 Motoyom ise ki Anutu kwoono Ilia. Ni tomtom raraate kembei ta iti. Mi indeeŋe ta ni ikamam suŋŋana mbolŋana pa Anutu be yaŋ isu pepe, na Anutu ileŋ suŋŋana kini, mi yaŋ sa isu som ma irao ndaama tel mi pakaana. ✡ 1Kin 17:1+; Lu 4:25 18 Mi kaimer ni isuŋ mini be yaŋ isu, to Anutu ikam ma yaŋ isu. Tabe toono ipiyooto kini ŋonoono ma ipet mini. ✡ 1Kin 18:42+
Lende uraata be tapazal zin tomtom ta tipaŋoobo
19 O niom toŋmatiziŋ tio, sombe tomtom tiom tasa ipaŋoobo pa zaala ki sua ŋonoono, na niom leyom uraata be kakami ma imiili mini. ✡ Mt 18:15; Ga 6:1 20 Mi leleŋ be kuute kat ta kembei: Sombe tomtom sananŋana sa isaŋsaŋ pa zaala ki Anutu, na tomtom ta so ikami ma imiili mini, nako ikamke tomtom tana pa meeteŋana, mi iwe zaala pa sanaana kini ta boozomen be imap ma ila ne. ✡ 1Tim 4:16; 1Pe 4:8