19
Tomtom sorokŋana ta so ipa pai kini ma ambai men,
na ilip pizin wal kankaanaŋan ta kwon ipiyotyooto sua sananŋana na. Tut 28:6
Iti sombe tombol kat pa mbulu sa, mi tamen takam kat ŋgar pa ka uunu som, ina ambai som.
Mi mbulu ki ketende pitpit tomini, ina ambai som. Pa ina ko ikam ti ma tapaŋoobo pa zaala ambaiŋana. Tut 29:20; Ro 10:2
Wal pakan mbulu kizin kankaanaŋana ta ipasansaana mbotŋana kizin.
Tamen tiurur uunu ila ki Yooba, mi keten malmal pini sorok. Un 4:5; Yems 1:13-14
Sombe iti lende koroŋ boozo, nako wal boozo lelen be tigaaba iti ma tiwe torondo bizin.
Mi zin wal ta len koroŋ somŋan na, toron bizin ŋonoono tipizil ndemen pizin tomini. Tut 14:20
Tomtom ta so ipombol sorok sua pakaamŋana, na ni kola ire ka kadoono. Irao tileeli na som.
Mi zin wal tau gorgori timbelmbel sua pakaamŋana ta kembena. Kadoono tabe ise kizin i, na tirao be tiko pa na som. Kam 20:16, 23:1; Tut 21:28
Zin bibip ta tikamam peeze i, na wal boozomen tirru zaala be tikam lelen.
Mi tomtom ta so irairai koroŋ kini, nako tomtom ta boozomen lelen be tigaabi ma tiwe toroono bizin.
Tomtom sorrokŋana na, waene bizin timbotmbot molo pini.
Sombe iso pizin be timar kini, na irao tileŋi na som.
Mi toŋmatiziŋ kini ŋonoono tomini, tiurur lelen pini som. Mbo 38:11; Tut 14:20
Tomtom ta so leleene be kunuunu imbot ambai, nako iru zaala be ikam le ŋgar ambaiŋana.
Mi sombe tomtom sa mataana iŋgalŋgal be ikiskis ŋgar ambaiŋana, inako indeeŋe mbotŋana ambaiŋana. Tut 8:35-36
Tomtom ta so ipombol sorok sua pakaamŋana, na ni kola ire kadoono pa mbulu kini tana. Irao tileeli na som.
Mi zin wal ta timbelmbel sua pakaamŋana ta kembena. Ko tisaana ma tila len. Tur 21:8
10 Wal kankaanaŋan ta tizorzooro na, sombe tikam len mboti ambaiŋana kat, ina irao pa ŋgar kiti som.
Mi sombe tiur mbesooŋo sorok sa ma iwe biibi be ikam peeze pizin bibip pakan, ina tomini, ambai som kat. Tut 17:16, 26:1, 30:21-22
 
11 Tomtom ta so le ŋgar ambaiŋana, nako keteene malmal karau som. Tana tere mbulu kini na, iŋgeeze men.
Pa sombe tomtom tikam ŋoobo mbulu pini, na ni irao ikam ŋgar biibi pa na som. Ire kembei koroŋ sorok. Tut 14:29, 16:32
12 Sombe king keteene malmal, ina ikamam ti ma tomototo kembei laion ta kalŋaana izalla be ikan tomtom.
Mi kampeŋana ki king, ina kembei tolou ta izzu mi ipalumluumu kini. Tut 16:14+, 20:2
 
13 Wal kankaanaŋan ta tizorzooro na, tipasansaana mbotŋana ki taman bizin.
Mi sombe kusindi bizin tinoknok zooroŋana mi tiŋoŋooŋo, inako tikam ma mbotŋana kiti isaana kembei ruumu ta ka kooto sumbunsumbun, mi yaŋ itoptop su ruumu leleene na. Tut 10:1, 17:25, 21:9, 27:15
14 Ruumu mi pat, ina matamur ta tamanda ma nanda bizin tikamam piti.
Mi sombe towoolo moori ŋonoono ta le ŋgar ambaiŋana, ina kampeŋana biibi ta Yooba ikam piti. Tut 18:22, 31:10+
 
15 Wal maolŋan sombe tikeene, na tizemke zin kat.
Mi tomtom ta so ikamam uraata som mi imbomboorene sorok, nako peteli. Tut 6:6-11, 10:4, 20:13
 
16 Tomtom ta so ikamam ŋgar pa itunu be imbot ambai, nako mataana iŋgalŋgal be ito kat zaala ambaiŋana.
Mi tomtom ta so irepilpiili zaala ambaiŋana mi itoto som, na ni ko imeete ma ila lene. Tut 13:13, 16:17
17 Tomtom ta so ikampewe zin wal sorrokŋan, ina ni ikamam mbulu tana pa Anutu.
Mi kaimer Anutu itunu ko ipokot mbulu kini tana. Mt 10:42, 25:40
18 Pazal lutum pataaŋa. Pa iŋgi mazwaana ta ni ileŋleŋ la sua ku.
Re beso pazali som, ina kembei nu lelem be ni imeete ma ila lene. Tut 13:24, 22:15, 23:13
19 Tomtom ta so keteene malmal karau, nako ire ka kadoono.
Wal ta kembei, uulu zin pa pataŋana kizin pepe. Pa kaimer zin kola tikam mini mbulu raraate men tau.
20 Sombe tomtom tisope u mi tipazalu, na leŋ la kalŋan.
Pa ina zaala tabe nu kam lem ŋgar ambaiŋana. Tut 1:8-9
21 Iti tomtom lelende iurur pa mbulu matakiŋa be takam.
Mi bela ŋgar kiti ito ŋgar ki Yooba, to iur ŋonoono. Mbo 33:11; Tut 16:1,9
22 Sombe tuurur kat lelende pizin tomtom mi tototo sua kiti mbukŋana, ina koroŋ biibi kat. Mbulu ta kembei, tomtom lelen pa ilip.
Sombe lende koroŋ som mi tombot ŋoobo, na turu zaala pakaamŋana sa bekena tawatke lende koroŋ pepe. Ambai be tombot ŋoobo.
23 Mbulu ki tomototo Yooba mi teleŋleŋ la kalŋaana, ina zaala tabe tombot ambai pa i.
To tomoto koroŋ toro sa som, mi takam kene kiti ma ambai men, mi pataŋana sa irao ipasaana iti som.
 
24 Wal maolŋan naman isula timbiiri leleene be tipei kan kini.
Tamen naman ipata be tiur ila kwon.
 
25 Zin wal ta tipakurkur zitun mi tirepilpiili ŋgar ambaiŋana na, sombe tabalis zin, ina ambai. Naso zin wal ta len ŋgar biibi som na tire mi ipei ŋgar kizin.
Mi zin wal ta ŋgar kizin ipet kek na, tabalis zin pepe. Toso men sua be tapazal zin. Pa zin ko tikam ŋgar. Mbo 141:5; Tut 21:11
26 Pikin ta so imaŋga pa tamaana, mi iziiri naana ma ila lene pa ruumu,
ina ni ipamiaŋ zin biibi kat. Kam 21:15; Tut 20:20
27 Lutuŋ, nu sombe zeeze talŋom pa sua pazalŋana, ina ambai. Zeeze lak!
Naso nu talli kat pa ŋgar ambaiŋana!
28 Sombe tomtom timender pa sua, mi takam wal sananŋan pakan ma timar be tipombol sua kizin, inako tepeŋeu sua urpeŋana tana ma iwe koroŋ sorok.
Wal sananŋan lelen pa mbulu sananŋana ilip, kembei ta kini namutŋana.
29 Zin wal ta tipakurkur zitun mi tirepilpiili ŋgar ambaiŋana na, kadoono kizin inamnaama zin ma imbotmbot.
Wal kankaanaŋan ta tizorzooro na, tomtom ko tibalis zin ma ndemen berebere.

19:1: Tut 28:6

19:2: Tut 29:20; Ro 10:2

19:3: Un 4:5; Yems 1:13-14

19:4: Tut 14:20

19:5: Kam 20:16, 23:1; Tut 21:28

19:7: Mbo 38:11; Tut 14:20

19:8: Tut 8:35-36

19:9: Tur 21:8

19:10: Tut 17:16, 26:1, 30:21-22

19:11: Tut 14:29, 16:32

19:12: Tut 16:14+, 20:2

19:13: Tut 10:1, 17:25, 21:9, 27:15

19:14: Tut 18:22, 31:10+

19:15: Tut 6:6-11, 10:4, 20:13

19:16: Tut 13:13, 16:17

19:17: Mt 10:42, 25:40

19:18: Tut 13:24, 22:15, 23:13

19:20: Tut 1:8-9

19:21: Mbo 33:11; Tut 16:1,9

19:25: Mbo 141:5; Tut 21:11

19:26: Kam 21:15; Tut 20:20