1 Pikin ta le ŋgar ambaiŋana, nako ileŋ la sua tutŋana ki tamaana.

Mi zin wal ta tipakurkur zitun mi tirepilpiili ŋgar ambaiŋana na, sombe tayaamba zin, na irao tileŋ la kalŋanda na som.

2 Sombe sua ambaiŋana men iwedet pa kwondo, ina irao iwe zaala piti be takam lende koroŋ ambaimbaiŋan.

Mi zin wal pakamkaamŋan tau tisu mini mi tiur koi pa zitun wal kizin na, lelen ilip be tikam zaaba pizin tomtom.

3 Tomtom ta so mataana iŋgalŋgal itunu mi imborro kat kwoono, nako imbot ambai.

Mi tomtom ta so ikam kat ŋgar som mi iwirri sorok sua, ina ni ipasaana itunu.✡Mbo 12:2, 34:13; Tut 21:23

4 Tomtom beleegeŋana, ni leleene pa koroŋ boozo. Mi irao ikam na som.

Mi wal uraataŋan na, koroŋ boozomen ta lelen pa i, nako tikam ma tirao pa kat.✡Tut 10:4, 12:24,27, 19:15, 21:25

5 Tomtom ndeeŋeŋana, ni iurur koi pa mbulu pakaamŋana.

Mi wal sananŋan na, mbulu buzaanaŋana mi mbulu pamiaŋŋana ta igabgaaba zin ma ziŋan tiwwa.

6 Tomtom ta ikamam kat mbulu na, mbulu kini ndeeŋeŋana ko iporoukalkaali ma imbotmbot ambai.

Mi zin wal ta mbulu kizin irao som na, mbulu kizin sananŋana ko ipasaana zin ma tisaana kat.

7 Tomtom ta, iti tere i na, toso ni le koroŋŋana. Mi som. Ni le koroŋ sa som.

Mi tomtom toro, tere i na, toso ni sorokŋana. Mi som. Ni le koroŋ boozo.✡Tur 3:17; 2Kor 6:10

8 Zin mbio uunu, sombe kan koi sa ipamoto zin mi iboobo pa le pat, na tirao be tiŋgiimi i, mi ni izem zin ma timbot.

Mi wal sorrokŋan na, pataŋana ta kembei iwedet pizin som. Pa tomtom tiute: Zin len koroŋ sa som.

9 Wal ndeeŋeŋan tikamam mbotŋana ambaiŋana mi tiurur mat pizin tomtom.

Mi wal sananŋan na, mbotŋana kizin kembei kai ta molo som mi imeete.✡Tut 20:20, 24:20; Mt 5:14; Pil 2:15

10 Mbulu ki tapakurkur itundu, ina ipiyotyooto ŋoŋi boozo.

Mi zin wal ta tileŋleŋ la sua na, ŋgar ambaiŋana imbotmbot la lelen.

11 Pat ta ka usomŋana mi ipet sorok, nako imap karau men mi ka ŋonoono sa som.

Mi tomtom ta so ikamam uraata mi iurur pat kini ilalae, na pat tana ko ipet ma iwe biibi.

12 Sombe tanamnaama koroŋ sa mi ipet karau som, inako ikam ma lelende isaana.

Mi talala ma sombe takam koroŋ tana, inako ikam ma menmeen ti, mi tayamaana kembei mbotŋana kiti ambai.

13 Zin wal ta tirepilpiili sua ki Anutu kembei koroŋ sorok, nako tire kadoono pa mbulu kizin tana.

Mi tomtom ta so ileŋleŋ la tutu ki Anutu mi imoto kana, nako ikam le kadoono ambaiŋana.✡Tut 16:20; Yo 12:48

14 Zin wal ta len ŋgar ambaiŋana na, sua kizin kembei yok bukbukŋana ta ipiyotyooto mbotŋana ambaiŋana piti.

Pa ipiŋgisŋgis kumbundu pa kilis tabe ikam ti ma temeete i.✡Tut 10:11, 14:27, 18:4

15 Ŋgar ambaiŋana ta iurur ŋonoono, ina ikam ma tomtom lelen piti.

Mi zin wal pakaamŋan ta tisu mini mi tiur koi pa zitun wal kizin na, zaala kizin ko ipata.

16 Zin wal ta len ŋgar ambaiŋana na, timbot mi titiiri uraata ka zaala muŋgu, mana tikam.

Mi wal kankaanaŋan ta tizorzooro na, tipamalmaala ŋgar kizin talliŋana ila iwal biibi matan.

17 Sombe toŋgo tomtom sananŋana sa pa uraata, inako ikam pataŋana piti.

Mi sombe ŋgoŋana kiti ila ma iso kat sua kiti, ina irao iurpe pataŋana kiti.✡Tut 10:26, 25:13

18 Tomtom ta so ileŋsil sua tutŋana, na kaimer ko imbot ŋoobo mi ka miaŋ biibi.

Mi tomtom ta so ileŋleŋ la sua pazalŋana, na kaimer zaana ko iwe biibi.✡Tut 10:17

19 Sombe tanamnaama koroŋ sa ma molo mana takam, inako ikam ti ma lelende ambai kat mi toso: “Aa buri!”

Mi wal kankaanaŋan ta tizorzooro na, lelen be tipizil ndemen pa mbulu kizin sananŋana ri sa som.

20 Tomtom ta so igabgaaba wal ŋgarŋan, nako iwe tomtom ŋgarŋana.

Mi tomtom ta so igabgaaba wal kankaanaŋan ta tizorzooro na, ni ko indeeŋe pataŋana.✡Tut 1:10, 2:20, 12:26

21 Zin wal ta mbulu kizin irao pa Anutu mataana som na, pataŋana indeŋdeeŋe zin.

Mi wal ndeeŋeŋan na, mbotŋana ambaiŋana ta iwe len kadoono.

22 Mazwaana ta so tomtom ambaiŋana imbotmbot toono na, ni ikamam le koroŋ boozo. Tana kaimer sombe imeete, na lutuunu ma tumbuunu bizin ko tikam len matamur ambaiŋana.

Mi zin wal ta mbulu kizin irao pa Anutu mataana som na, koroŋ boozomen ta tindoundou na, kaimer ko iwe wal ndeeŋeŋan len.

23 Ŋonoono, mokleene kizin wal sorrokŋan ipiyotyooto kini boozo.

Tamen tomtom tipakamkaam zin mi tikamam ŋoobo mbulu pizin, tabe kan kini irao som.

24 Tomtom ta so lutuunu ikamam ŋoobo mbulu mi ni ibalisi som, na iurur kat leleene pa lutuunu som.

Mi tomtom ta so iurur kat leleene pa lutuunu, nako karau men mi ipazali mi iurpe mbulu kini.✡Tut 3:12, 19:18, 22:15, 23:13, 29:15; Ep 6:4; Ibr 12:7

25 Wal ndeeŋeŋan tikanan kini ma kopon bok.

Mi wal sananŋan na, peteltel zin ma kopon golok kat.✡Tut 10:3