18
Dabit ipakur Anutu. Pa iuuli ma ilip pa ka koi bizin
Mboe ki Dabit, mbesooŋo ki Yooba Indeeŋe ta Yooba ikamke i pa Saul mi ka koi bizin ta boozomen naman na, Dabit itooro mboe ti
(2Sam 22:1-51)
1 O Yooba, nio aŋkamam mburoŋ se ku tau. Nio leleŋ pu ilip!
2 Yooba, ni ta tuŋ ŋonoono. Pa ipombolmbol yo, mi ipakalkaala yo pa koroŋ sananŋan kembei ta raŋ sumbuunu, mi ni ulaaŋa tio.
Ni iwe kembei siiri mbolŋana pio be aŋke lela mi aŋbot ambai.
Tana aŋpase pa Anutu tio mbolŋana be iwe seraara pa koŋ koi bizin mi iporoukaala yo.
Ni siŋgiao tio. Itunu mburaana ta ikamkewe yo. Mi ni imborro yo ma aŋbot ambai.
3 Nio sombe aŋpakur Yooba zaana, na indeeŋe men.
Pa aŋboobi na, ni ikamke yo pa koŋ koi bizin naman.
4 Kilis ki meeteŋana, rimen mi ikam yo.
Pa pataŋana sananŋana kat ilol yo kembei ta wo biibi i.
5 Wooro ki Andewa, ta itautau yo mi iyakat yo be aŋsula.
Kilis ki meeteŋana, ta igarau yo kek.
6 Indeeŋe pataŋana biibi tana ikam yo na, aŋboobo Yooba.
Aŋtaŋroro Anutu tio be imar iuulu yo.
Mi ni imbot lela urum kini leleene mi ileŋ kalŋoŋ.
Iŋgun talŋaana pa bobi tio.
7 To ni keteene malmal kat,
mi ikam ma yeŋyeeŋge itok toono ma toono ikam katkat.
Mi abal unun timirri.
8 You ka koi ta iwedet pa Anutu kuzuunu.
Mi you miaana ramaki pat bayouŋan iwedet pa kwoono. ✡ Kam 19:18
9 To ikaaga saamba,
mi imbot se miiri tieene gabgapŋana ma isu.
10 Ni imbot se aŋela mbolŋana ndemeene mi irie.
Miiri tieene ta ikwaari ma irie karau men.
11 Ni ike lela zugut.
Miiri tieene ta izuki ma iwe kembei beeze pini be imbot lela. ✡ Kam 19:9
12 Azuŋka biibi imuuŋgu pini mi lele ikimitmit.
Mi lolo niini ramaki yaŋ pat iyotyooto pa miiri tieene kini mi izzu.
13 To Yooba imbot saamba, mi iso sua raama kalŋaana biibi kat, kembei lele ikuruŋ.
Anutu kor kana kat iso sua ma tomtom tileŋ. ✡ Mbo 29:3+
14 Mi ipeene ka koi bizin pa peene lutuunu kini ma tiko papirik.
Ikam ma lolo iwenweene. Mi ka koi bizin tire, to motoŋana biibi ikam zin ma tiko.
15 Yooba, indeeŋe ta nu yespokpok zin mi swe ketem malmalŋana pizin na,
miiri biibi iyooto pa kuzum,
mi iwilaala tai ma ipei maaŋga ma ise mat.
Mi itooro toono tomini ma meleebe kana ise mat. ✡ Kam 15:1-12
16 To Yooba imbot kor, mi isara namaana isu mi iteege yo.
Mi iweene yo ma aŋse pa mozo lukutuunu.
17 Koŋ koi bizin ta mburanŋan i, ni itatke yo la naman.
Zin wal tau tiur koi pio mi mburan ilip pio na, ikamke yo pizin.
18 Indeeŋe ta aŋbotmbot la pataŋana leleene na, zin timaŋga pio.
Tamen Yooba, ni isilou yo,
19 mi iur leŋ zaala be aŋyooto pa pataŋana leleene mi aŋbot mat.
Pa ni leleene pio ilip, tanata ikamke yo.
20 Nio aŋkamam mbulu ndeeŋeŋana, tanata Yooba leleene pio mi ikampe yo.
Ni ikam leŋ kadoono ambaiŋana paso, leŋ uunu sa isaana som.
21 Pa aŋtoto zaala ki Yooba.
Irao aŋkam mbulu sananŋana mi aŋpizil ndemeŋ pa Anutu tio na som. ✡ Mbo 119:102
22 Nio motoŋ iŋgalŋgal tutu kini ndeeŋeŋan ta boozomen.
Tutu kini ta tibeede pataaŋa kek na, aŋzooro som.
23 Tana leŋ uunu sa isaana pa ni mataana na som.
Pa motoŋ ŋgalŋgal ituŋ, tana aŋpa ŋoobo pa zaala kini som.
24 Nio aŋkamam mbulu ndeeŋeŋana mi ŋgeezeŋana men pa ni mataana.
Tanata ni leleene pio mi ikam leŋ kadoono ambaiŋana.
25 Yooba, sombe tomtom sa iurur leleene pu mi itoto mbulu ku, na nu ko to sua ku mbukŋana mi motom pini.
Tomtom ta so le uunu sa isaana pa motom som, na nu ko kampe i.
26 Mi tomtom ta so mbulu kini iŋgeeze men, na nu ko kam mbulu ŋgeezeŋana pini.
Tamen zin wal ta len ŋgar biibi pa mbulu pakaamŋana na, nu tomini lem ŋgar be pokot mbulu kizin.
27 Tana wal ta so timbotmbot raama pataŋana na, nu kamkewe zin.
Mi zin ta tipakurkur zitun na, nu kototo zin. ✡ Mt 23:12
28 Yooba, nu ta urur mat pio mi uluulu yo ma aŋbot ambai.
Anutu tio, nu ziiri zugut ma ila lene mi kam mat ku ma iyaara pio. ✡ Yo 8:12; 2Kor 4:6; 2Pe 1:19
29 Nu gabgaaba yo, tana aŋporou raama koŋ koi bizin boozomen mi aŋlip pizin.
Anutu tio, ni imbotmbot raama yo. Tana siiri mbolŋana ki koŋ koi bizin, ina irao be ipakaala yo na som.
30 Anutu taiŋgi, zaala kini ambai komboono.
Mi sua kini, ina ŋonoono men. Irao tapase pa mi tuurla kat.
Wal boozomen ta so tipase pini be iwe ur pizin mi imenderkaala zin na, ni iwe siŋgiao pizin.
31 Yooba itutamen ta Anutu ŋonoono. Anutu toro sa som.
Mi ni tundu ŋonoono. Pa ipombolmbol ti mi iporoukalkaala iti.
32 Ni ipombolmbol yo pa itunu mburaana, tana aŋmendernder mbolŋana.
Mi ni mataana pio pa pai tio, mi ipazalzal yo. ✡ 1Pe 5:10
33 Ni ikam ma kumbuŋ isekapkap, tana aŋrao be aŋpa pa lele abalabalŋana.
Irao kumbuŋ giris ma aŋtop na som.
34 Mi ni ipaute yo pa mbulu ki malmal,
mi ipakeke nomoŋ be aŋdaada peene naana kekeŋana.
35 Yooba, nu we siŋgiao pio mi kamkewe yo.
Mi nomom woono ta isilou yo.
Nu uulu yo, tana zoŋ iwe biibi.
36 Mi nu urpe kumbuŋ muriini bekena aŋmender mbolŋana mi aŋkam malmal.
Tana aŋtop som.
37 Nio aŋketo koŋ koi bizin mi aŋse kizin na, aŋmiili karau som.
Aŋteege zaaba pizin ma timap. Aŋzem tasa ma imborene som.
38 Nio aŋkazas zin ma titoptop su kereŋ uunu,
mi aŋpadagdaaga zin ma irao timaŋga mini som.
39 Pa nu kam leŋ mburoŋ. Tanata aŋmender mbolŋana pa malmal,
mi aŋlip pa koŋ koi bizin ma tilek kumbun pio.
40 Nu ta kam ma koŋ koi bizin tiko pio.
Tana zin wal ta tiur koi pio na, aŋkas zin ma timap kat.
41 Zin tiboobo pa len ulaaŋa. Tamen ulaaŋa sa imar pizin som.
Titaŋroro Yooba, mi ni ileŋ tiŋiizi kizin som.
42 Nio aŋpalamusmuuzu zin ma tiwe kembei ululu ta miiri iwilaala ma ila lene.
Aŋpadagdaaga zin kembei tiŋtiiŋgi ta imbotmbot su zaala i.
43 Tomtom timaŋga be tizooro yo, mi nu kamke yo.
Mi ur yo ma aŋwe biibi be aŋkam peeze pizin karkari.
Toono pakan kan tomtom bizin ta aŋute zin som, ta timar timbot la kopoŋ mbarmaana mi timbesmbeeze pio i.
44 Sombe tileŋ sua tio, na loŋa men mi tito.
Mi tipakur yo mi tilek kumbun pio.
45 Paso motoŋana ikam zin ma mburan imap.
Tana tiyooto pa siiri kizin mbolŋana ta tikewe la pa i, mi timar tio.
46 Ŋonoono kat, Yooba, ni imbotmbot!
Ni ta tuŋ ŋonoono. Pa ipombolmbol yo mi iporoukalkaala yo.
Tana aŋpakuri mi aŋwit uruunu isala kor. Pa ni ulaaŋa tio.
47 Ni iuulu yo ma aŋpokot koŋ koi bizin mbulu kizin.
Mi ikam zin karkari ma timar timbot la kopoŋ mbarmaana.
48 Ni ta itatke yo la koŋ koi bizin naman, mi ikam ma aŋlip pizin.
Ni ikamke yo pizin wal ta titekteege zaaba pizin tomtom i.
49 Tana Yooba, nio ko aŋwit urum la zin karkari mazwan,
mi aŋbo mboe be aŋpakur zom. ✡ Ro 15:9
50 Yooba, ni iuluulu king kini ma iliplip pa malmal bibip.
Yooba itunu ta iur Dabit mi popoŋana kini be tikam peeze.
Muŋaiŋana mi kampeŋana kini ko imbotmbot se kizin, mi iseeŋge iseeŋge ma ila.