4
Honocmengte mimi-madic
1 Inguc mime na honocmengka nu monic laliyeicne nganiiba. Hei, yowa esecne kpeng ucine ingucne yowa-malac monic edocnume ngageiba, yedi yanguc miwec, “Ga yawa ofenong. Yagolec lobeina ma pasi fikedaicte, yogo edalicgudacte.”Dan 2:28-29; 7:9; Wah 19:16-19; Miye 1:1,10 2 Hei, inguc mime iwahac Asudi nala bole bame nganibe honocmengka ngictaule ngiye-ngiye loicne iwa monicti yogolec feina ngiyewec.Yes 6:1 3 Yele angoc yogo posa basufaleicne, yogo posa sasacne nga posa hunga, yeke ingucne. Ailu hulilic monic posa hedonggboli ingucne, yogodi ngictaule ngiye-ngiyewa lolickelu fawec.Esek 1:26,28*Posa wacngineng yogo yanguc, yaspa, kanelian, nga emeral.
4 Ailu ngictaule ngiye-ngiye ngiyeme ngictaule ngiye-ngiye gocne, dzalengineng 24, yenge ngictaule mac ngiye-ngiye yogo lolickelu ngiyecaigaing. Ngiye-ngiye yogolec feina damong 24 ingucti ngiyecaigaing. Damong yenge ngakpingineng kwalac-kwalac holelu hodocngineng feina ngictaule duu goldi baicne holelu ngiyecaigaing.Dan 7:10; Miye 3:18 5 Inguc nganicebabe pilatac bame gbululung ucine sugucnehacti ngictaule ngiye-ngiyewacni fikewec. Ngictaule ngiye-ngiyele haicka hifa 7 lobecaigaing, yogo Wapongte asu 7.Esek 1:13; Sek 4:2; Miye 1:4; 8:5; 11:19; 16:18 6 Aime ngictaule ngiye-ngiyele haicka wiyac monic kiwec sugucne ingucne galasdi baicne, galas yogo wonongngine mikac nganiiba.
Aime ngictaule ngiye-ngiyewa neboc nga neboc 4, iwa wiyac gaganginengkolec 4 yengi hewalingkelu domacaigaing. Yenge emengineng nga lobengineng sasawa yogo dongedi wakeyackeicne.Dan 7:2-3; Esek 1:5-10,22; 10:14 7 Wiyac gagaineholec molic-molic, yele ngani-nganiine laion ingucne. Aime yele lobeina, wiyac gagaineholec monic ye bulumaka ngicne tapiliineholec ingucne. Aime yele lobeina wiyac gagaineholec monic, ye haic-mesuine ngani-nganiine ngic ingucne. Aime moto-motoina wiyac gagaineholec monic, ye hikic sugucnedi filalangkecaigac, ingucne aiwec. 8 Wiyac gaganginengkolec 4 yenge filesoc filesoc kwenggelengngineng 6. Ailu socngineng sasawa yogo dongedi saweyackeicne. Ailu kwenggelengngineng bageina yogo inguchac dongeholec. Ailu yenge hadeng nga debocsoc ngiye-ngagec mikac yanguc milu gacaigaing,
“Sugucne Wapong Tapilitowa Fileine,
Ye gbagbacnedi, gbagbacne, ailu gbagbacne.
Ye gawec nga gagac ailu gacgu kwesinowagac.”Yes 6:2,3; Esek 1:18; 10:12
9 Aime ngictaule mac ngiye-ngiyeina ngiyecaigac, ye gaga-sanang gaginowagac. Aime wiyac gaganginengkolec yenge yele wac bafelu alang bacnolu kwele-madic micaigaing. Inguc micaigaingka,Dan 4:34; 12:7 10 ye ngictaule ngiye-ngiyeina ngiyecaigac, ailu gaga-sanang gaginowagac, damong 24 yenge yele higewa ketadi holecaigaing. Holelu ye afeelu ngictaule duungineng bamoctolu ngictaule ngiye-ngiyeinele emeina wickebong wame yanguc migaing,Miye 7:10,15; 19:4
11 “Ga Sugucne ailu Wapongnonggeng.
Gagi wiyac sasawa miyengka fikeyackelu gaganginengkolec fagaing.
Gageuc ngagelu inguc bafuwayackeingte, ga andoine. Ilec ailu wac feicne nga alang-baba ailu tapili sasawa badamecte.”Dan 4:35-37
4:1: Dan 2:28-29; 7:9; Wah 19:16-19; Miye 1:1,10
4:2: Yes 6:1
4:3: Esek 1:26,28
*4:3: Posa wacngineng yogo yanguc, yaspa, kanelian, nga emeral.
4:5: Esek 1:13; Sek 4:2; Miye 1:4; 8:5; 11:19; 16:18
4:6: Dan 7:2-3; Esek 1:5-10,22; 10:14
4:8: Yes 6:2,3; Esek 1:18; 10:12
4:9: Dan 4:34; 12:7
4:11: Dan 4:35-37