1 Te haniani dago homugo konesiąbo pogo po wabo, tede eno po tamadi wai dao. Te eno te da tǫde bidibo we bidigo dena homugo konesiąbo haniani pogo wabo, ma te tǫde bidi dabego wabo haniani po, ma te ensel mobo bidi dabego gasagi yai po me, te po tigidaligo eno po wabo usu eyu da, tiali goli eno te gasa we bidi dali dwagi yai homu eyu godolo ebo kolesaga esiąyu da, teda eno po wabo te belo olo subigila elibo tiwai eyu, ma te moni nigo nigali habidi te olo elibo tiwai gilama yaibao. 2 Ma, eno te profet bidigo wabo po tiwai te Godigo po pusubo bomo elaluyu, tama eno te Godigo geme dualali po tigidali koneyu, tama eno gasa haniani homu kolesaga me koneyu, tama eno Godide bomai konealubo po dąų elaluyu, tama eno te genuai bulu du gasaba pogolobo usu iligi da, ena te tiwai bidiyu, tiali goli eno te gasa we bidi dali dwagi yai homu eyu godolo ebo kolesaga esiąyu da, teda ena te olo nai tiwai dao. *Mat 17:20; 21:21; Mak 11:23 3 Tama eno ena doado bage tigidali te magi nai meni yai we bidi dabe augwalibolo mena mena pelama, tama ena te Kraisde boi bidi homu ebo bagego selama, tama eno tigi te siaba ulama tama ena te isiyu da, tiali goli eno te gasa we bidi dali dwagi yai homu eyu godolo ebo kolesaga esiąyu da, teda te eno yali tigidali dwagi yai sęgo ena dwasianu tau sabo usu me egobeo.

4 Te gasa we bidibolo wiegi yai homu eyu godolo ebo bidi agai e tobage kolesaga ebo dao. Augwaligo dwai kolesaga aga dali ebaso, te agai wei polo me ponogobeo. Te gasa we bidibolo wiegi yai homu eyu godolo ebo bidigo, te agai tigidali bidi tau sobao. Agai te doado bage hauwa elalubo bidi dali dwai homu me egobeo. Te gasa bidibolo wiegi yai homu ebo bidigo te aga digi aga nogi ugwaba me sogobeo. Tama agai dwai hagoma me egobeo. 5 Agai te bidi dabe augwali dali te kolesaga usu isąwai bidigo ebo kolesaga ebo meni. Agai te aga doado bage dabede te nai yogo homu ebo meni. Te agai sębę polo me egobe, konila po polo wagobeo. Te augwaligo agabolo dwai sę ilibaso, te agai te sęde aga homugo ma nededu gebo meni. 6 Te gasa bidigo ebo dolo isąwai kolesagade te agai wiegi yai homu pemene me egobeo. Menio. Agai te we bidi augwaligo Godigo mu doloba pai kolesaga ebode te wiegi yai homu pemene agai ebo dao. 7 Te gasa we bidibolo wiegi yai homu eyu godolo ebo bidi agai tigidali sęgę bugagia tolobo dao. Te tama tiyu, agai aga abagi dali homugo kęą pai bidi bidada pabo dao, te kolesaga me sia sogobeo. Te aga dali dwai sę yali abagi, tede agai wiegi yai homu pemene eyu tama te bidigo homu hasegelebo aga bugagia tonalubo dao, agai te kolesaga ebo tagalogobeo. Te tigidali sęgę sabode te aga bomo elama bugagia dolalubo dao, aga munu me sębę polo egobeo.

8 Te Godigo aga we bidibolo te tau sabo bomo osogo mawai dao. Agai bidi mebolo te Godigo po pusubo bomo olo mayu, tama gasa bidibolo te haniani gasagi yai homugo konesiąbo pogo po wabo bomo olo tama mayu, tama tedali bidibolo gasa haniani homu kolesaga koneabo bomo mayu ebo dao. Te tobage mani sę yabo bomo te osogo elalubo nai naga dao. Tiali goli te gasa we bidi dali dwagi yai homu eyu godolo ebo kolesaga da, te gamonabo kolesaga mu dao, te munu me siligobeo. 9 Te megi dago haniani homu kolesaga koneabo bomo te sese meni, te sǫą pali. Tama te Godigo po pusubo bomo me, te sese meni, te sǫą pali. 10 Tiali goli nosali te sese usu mu yai nai asiyu, tama te sogo te sese isąwai sǫą pali nai dabe tigidali silaibao, te augwaligo sę me meni. 11 E tiwai yaibao. Polobadu ena dwasianu ogwa bidibadi, te sogo eno dwasianu ogwago po wabo tiwai yai dao. Eno te dwasianu ogwago homu ebo sę tiwai yai dao. Eno te dwasianu ogwago homu dodolobo kolesaga tiwai me eyu bidai dao. Eno kuna konesiąbaso, eno haniani sęde sǫą peyu bidali. Tiali goli nosali ena genuai bidi pedalama, tama eno bugagia konebaso, eno te dwasianu ogwago yali kolesaga yali te tagalai dao. 12 Dago te ąį dulade subadi, te dena gesabidi dago kuna subo meni, te dwasianu hulia sai tiwai subo dao. Tama te tiwai me, dago God gisiga mu konebo menio. Tiali goli te sogo nosali da, te dago Godigo gesabidi mu dolo sueibao. Megi dago te God kuna konebeo, te me badu naga koneani. Tiali goli nosali da, te dago aga mu koneyu, te agai da mu konebo tiwai gilama yaibao.

13 Tama te sogo asisąbadi, te kolesaga sela sesemane sogo elalubao, te homugo kęą pabo kolesaga dali, te dwagi yai homu eyu bugagia tonalubo kolesaga dali, te we bidi dali wiegi yai homu eyu godolo ebo kolesaga dali, te augwali sela sesemane sogo elalubo dao. Tiali goli te kolesaga selade te polalubo kolesaga me deli, te gasa bidibolo wiegi yai homu eyu godolo ebo kolesaga elalubo dao.