1 Augwali te Jerusalem moni hanu pąba sabolama, tama augwali te Betfage me Betani te be nani siba sabolali, te oliv ni sili elalubo bulu du nogi Oliv te pąde elaluai. Tama sabolama, tama Jisasgo aga wali pabo bidi si tagala palu, 2 tama augwali sibolo te po wai, “Dage si te e pąde elalubo te be naniba piąo. Dage si te be nani tomoba pabode, tama polo dage sigo te megi tama holobo gesi kibu donki me deli augwaligo te haliga bonogo gebelai elalubo sueibao. Te bidi me deli tede dualasa bilisiąwai elaluaibao. Te aga gebelali haliga bono pedalama, sela asao. 3 Tama bidi me deligo dage sibolo te po weyu, ‘Magi baso dage sigo te sę ebawe?’ obaso da, teda dage sigo te po waiyąo, ‘Te Genuai Bidigo agade te sę elalubo, tama agai te aga polo ma tagala palaibao’ po waiyąo,” Jisasgo augwali sibolo te po wai.

4 Te po obaso, augwali pai, tama augwali sigo te gesi ogwa bidi donki me deli suali, augwaligo te be me deli te sunumi pąde bulu badu gebelama elaluai. Tama augwali pelama, te haliga gebelai elalubo bono pedali. 5 Tama te pąde dolaluali bidi meba augwaligo te po augwali sibolo wai, “Dage sigo magi baso te ogwa bidi donki kibu haliga pedebawe?” 6 Tama augwali sigo te Jisasgo wali po tiwai gilama augwalibolo wali. Tama augwali sibolo te donki sela pao olama, augwaligo usu da po wai. 7 Tialima, augwali sigo te ogwa bidi donki Jisasba sela asali. Tama augwali sigo te augwa bulubo ugwa te donki tudi daiba pasugulama, tama te daide Jisas duayali. 8 Tama bidi hauwa augwaligo te augwa holobo ugwa dabe te sunumide wawa sili pai. Tama meba augwali te giba pelama, tama te yabe hauwa elalubo ni nologo togolama, tama te sunumiba muna muna pali, aga soabo sunumi au iliyu tama yali. 9 Tama te polasa pabo we bidi augwaligo me, te nosali asobo we bidi augwaligo me, te augwaligo bomo elama i wali, “Te Godigo nogi ugwaba mu sinao! Godigo te Genuai Bidigo nogide asali bidi te wiegi yai bugagia ilao! *Tib 118:25, 26 10 Godigo megi te asobo bomo te wiegi yai ilao, te dago wąį nǫų te Devitgo bomo dao. Te Ugwade Mu Bidibo Godigo nogi ugwaba sao!” augwaligo te po bomo elama weyu bilali.

11 Tama te tiwai eyu, Jisas te Jerusalem tomoba sabolama, tama te Moni Lotu Be tempel tomoba pelama, tama tede elalubo tigidali nai tonono bila silalio. Tiali goli te giliga dega sigulai. Tama tibaso, aga wali pabo bidi nogo si olama sągągo si bidi dabe dali augwali te Betani be naniba pigi pai.

12 Te nosali sogode augwaligo te bulu Betani tagalama, tama Jerusalemba ma asobadi, tama Jisas aga nasi yali. 13 Agai te ni kaya me deli te dwasianu digibulu gana dolalu, tama yabe te hauwa elalubo suali. Aga te ni pąba pelama, te du meba walai elalubowe naga gegainu yai. Tama aga te ni pageba sabolali, tiali goli tede te nai du walai elalubo me deli subeo. Menio. Te yabe naga elaluali. Magi baso meni, te ni fikgo du walobo sogo pedalubeo. 14 Tama Jisasgo te niba te po wai, “Nago te du munu me walamuo. Mu menio,” te po wai. Tama aga wali pabo bidi dabe augwaligo te po wabo odai.

15 Augwali ma pelama, te Jerusalemba ma sabolali. Tama Jisas te Moni Lotu Be tempel be tomoba pelama, tama te be tomode bisnis sę ebo bidi dabe sela sąyu, ela gudulubo sę gagalali. Agai te mone ge dobu si ebo bidi dabego tebol sai gea palobadi, te ba dabe dobu si ebo bidi dabego duabo sai dali gelibadi yai. 16 Tama augwalibolo agai te tobage nai dabe tolasa biliyu, te tempel Be tomodu bilibo po te augwaliba habu selali. 17 Tama agai augwalibolo te po ola mani, “Te Godigo po bukude te asęani pode e tiwai po Godigo wai po elalubao, ‘Eno be da, te tigidali we bidi hanigo te enabolo gedu haluasa po omainu ebo be da’ po wai. Tiali goli dagego te geme nai wi sabo bagego be pedalubo tiwai gilama ilibao,” Jisasgo te po wai. *Ais 56:7; Jer 7:11

18 Te genuai pris dabe dali, te Juda dabego bomai po page koneai bidi dabe dali, augwaligo te sę ebo po odama, tama augwaligo aga ela muabo sunumi gegebo sę gagalali. Augwali agade wi yali. Magi baso meni, te tigidali we bidi augwali te agai ola mani pode te midigi eyu noma mu sai. 19 Tama te be pio ebode Jisas dali, te aga wali pabo bidi dabe badi, te augwaligo te Jerusalem tagalama palio.

20 Te nosali sogode te kigamu mu augwali Jerusalemba ma pobadi, tama augwaligo te ni kaya sasia pai suali. Te yabe me te ni pedali dali tigidali te sasia pali. 21 Pitago tede homugo ma kone palama, tama agai te po wai, “Tisa bidi, suao. Te do sogode nago te ni kaya dolaiba po wai. Megi te aga sasia pali dao,” Pitago te po wai.

22 Tama Jisasgo augwaliba po wei ponoyu, te po wai, “Te dagego Godiba konealubo po dąų olama, tama duga homu agaba tialubaso da, 23 teda dagego te bulu dubolo po weyu, ‘Nage hogodama, tama nage te tamu ąįba samonao,’ te po wagameo. Tama homu si me isąyu, tama duga homude Godide konealubo po dąų naga olama, te po weyu, ‘Eno te wali po te mu po pedalaibao,’ te homu mu eyu da, teda dagego te bulu dude wali po gilama te sę mu pedalaibao. 24 Tama tibaso, eno dagebolo obe dao, dagego te nai me deli sainogo te Godibolo po weyu, te naide hanalu wabo po wabo side, tama dagego homude te Godide konealubo po dąų olama tama te homu eyu da, ‘Awe, mu da, dago te nai saibao,’ te sę te dagego wali po tiwai gilama pedalaibao. 25 Tama dage doligulama gedu haluasa po wabo sogo, tama te duga Aya dagalude bidibo bidi agai te dagego dwai sę yali sela sąwainogo eyu, tama dagego te bidi me deligo te dagebolo dwai sę ilali te homu kone palobaso da, teda dagego te bidigo dwai sę yali te sela sąyao. 26 [Tiali goli te dagego gasa bidigo dwai sę sela sasiąbaso da, teda duga Aya dagalude bidibo bidi agai te dagego dwai sę te me sela sagobeo.”] Jisasgo augwalibolo te po wai.

27 Tama augwali te Jerusalemba ma sabolai. Jisas te Moni Lotu Be tempel tomode bilibadi, tama te genuai pris bidi dabe dali, te Juda dabego bomai po page koneai bidi dabe dali, te tobolu bidi dabe me, augwali te agaba asali. 28 Augwaligo agabolo te po wai, “Nago magi bomo elalu, tama nago te sę dabe ebawe? Tama dego te bomo nageba menama, tama nagebolo weyu, te sę yao po waliwe?” 29 Jisasgo augwalibolo te po wali, “Eno me te eno magi nai po me deli te dagebolo hanalu wabo homu ebao. Tama dagego eno po wei ponobaso da, teda eno me te eno magi bomo elalu, eno te sę dabe ebo po dagebolo waibao. 30 Te Jongo te we bidi baptais mani sę, dagego homugo te dagalude nai da homu ebowe, ma te bidigo sę naga te homu ebawe? Dagego te po enabolo wei ponao.”

31 Tama te tobolu bidi dabe augwa digi augwa hasi po miani, “Dago te mena pogo agai po wei ponaibawe? Dago te po weyu, ‘Te dagalude nai da’ po obaso da, teda agai te po waibao, ‘Magi baso dagego homu aga poba begi pabewe?’ te po waibao. 32 Tama dago te po obadi, ‘Te bidigo nai naga da’ po obaso da, teda te po usu meni yaibao,” wali. Magi baso meni, augwali te we bidide wi yai. Tigidali we bidigo homugo te Jon da, te Godigo po pusubo profet bidi da, te homu yai. 33 Tama tibaso, te tobolu bage augwaligo Jisasba po wei ponoyu, te po wai, “Dago konebeo.” Tama Jisasgo augwalibolo te po wai, “Eno me te eno magi bomo elalu, te eno te sę dabe ebo po te dagebolo eno me wagobeo,” wali.