118
Te Godigo augwali tau salide te gedu haluasa po weyu, usu da po walio
(1 Sto 16:34; 2 Sto 5:13; 7:3; Esr 3:11; Tib 100:5; 106:1; 107:1; 136:1; Jer 33:11)
1 Dago te Genuai Bidiba usu da wao,
agai dabolo wiegi yai sę yai.
Sesemane bidada peyu, bidada pabo sogo
agai da godolo mu ebo dao.
2 Da Israel dabego te tama po waiąo,
“Agai da sesemane bidada pabo sogo godolo mu ebao.”
3 Te Godigo pris dabego me te tiwai po wao,
“Agai da sesemane bidada pabo sogo
godolo mu ebo dao,” po waiyąo.
4 Te Genuai Bidide wi ebo we bidi tigidali, augwaligo
te tiwai po waiyąo, “Agai da sesemane bidada peyu,
bidada pabo sogo godolo mu ebo da,” waiyąo.
5 Eno sęgę genuai elalubaso, tama eno Genuai Bidiba
gedu haluasa po wali,
tama agai eno te wabo po odolama,
tama te sęgę dagala sąwani.
6 Genuai Bidi ena dali bidibaso, tama ena wi me egobeo.
Te bidi dabego enaba magi sę deli me
yainu usu egobeo. *Hib 13:6
7 Genuai Bidigo digi ena tau sabo dao.
Tama te Genuai Bidigo te boi bidi dabe elaluama,
tama augwali dolobo te eno suaibao.
8 Te dago konealubo homu te Genuai Bidiba muani,
te wiegi yai da, tama dago te olo bidi dabeba
te konealubo me usugobeo.
9 Te dago konealubo te Genuai Bidiba
mubaso, te wiegi yai ebao,
tama dago te konealubo homu te king dabeba,
me te tobolu bidi dabeba muyu, me usugobe dao.
10 Te boi bidi hauwago ena bagua sali,
tiali goli, te Genuai Bidigo bomogo
eno augwali silalio.
11 Augwaligo ena te tigidali badu bagua sali,
tiali goli, te Genuai Bidigo bomode
eno augwali ela silalio.
12 Augwaligo ena te bulude elalua pabo
hauwa nai tiwai bagua sali.
Tiali goli, augwali te kala sia polo
sula sabo tiwai eyu, isalio.
Te Genuai Bidigo bomode eno augwali ela silalio.
13 Augwaligo ena dali bomonama mu hwįani,
tama ena hagawainu yali.
Tiali goli, Genuai Bidigo ena tau salio.
14 Genuai Bidigo ena bomai mu pedalumainu ilalio.
Agai digi ena tau siyu, ma dobola sai dao.*Sai 15:2; Ais 12:2
15 Te Godigo we bidi dabe te augwa ugwa be tomode
i wabo odao.
Augwa te po obao,
“Te Genuai Bidigo bomogo naga te tiwai ebo dao,” wali.
16 “Genuai Bidigo genuai bomogo da tau selama,
tama dago te boi bidi dabego bomo
aiyaba elaluai dao,” wali.
17 Ena me isisąbadi tegobeo.
Menio, te ena bidibo ula elalu,
tama eno te Genuai Bidigo yali sę po dabe pusaibao.
18 Eno dwai sę ebaso,
Genuai Bidigo enaba te dene mabo sę mu yali, tiali goli,
agai ena isimainu me ebeo.
19 Te tempel be sunumi dabe dalao,
tama ena te tomoba pelama,
tama Genuai Bidigo nogi ugwaba saibao.
20 Te e da te Genuai Bidigo sunumi dao.
Te doloba pai we bidi dabe naga
te tomoba pabo usu yaibao.
21 Genuai Bidi, nago eno gedu haluasa
po wabo odolama, tama nago ena tau selama,
te ena bugagia bidibao.
Tama tiyu, eno nago nogi ugwaba sobao.
22 Te masigi te kamda dabego te dwai da homu elama,
tama augwaligo sela sąwani, te masigi da
te be daga dąų elalu, polalubo masigi pedelali.*Luk 20:17; Tpi 4:11; 1 Pi 2:7
23 Genuai Bidigo digi te tiwai elama,
tama dago suali, te wiegi yai mu yai dao.*Mat 21:42; Mak 12:10-11
24 Genuai Bidigo te wiegi yai side dabolo mawai.
Dago wiegi yai pemene elama,
tama agaba bugai haliga yao.
25 Genuai Bidi, dago nageba hanalu, te da ma sao.
Nago da tau sobaso, tama dago ebo sę
tigidali te wiegi yai pedelaibao.*Mat 21:9; Mak 11:9; Jon 12:13
26 Godigo te Genuai Bidigo nogide
asali bidiba wiegi yai sę emainao.
Dago aga nogi te Genuai Bidigo lotu be
tempelde ugwaba sao.*Mat 21:9; 23:39; Mak 11:9; Luk 13:35; 19:38; Jon 12:13
27 Genuai Bidi naga aga te God mu dao.
Agai da bugagia tonalubao.
Te ni nologo dabe tulama,
tama peyu, te alta sai bagua sigi pao.
28 Nage eno God da weyu,
tama eno nageba puba hwi waibao. Nage eno God,
tama te eno nage nogi ugwaba saibao.
29 Dagego Genuai Bidiba usu da po wao.
Agai daba wiegi yai sę yai.
Agai da wei mu elama, tama dabolo te olo tau sabo
wiegi yai kolesaga sesemane idubo dao.