12
Te buba hwi wabo balia po
1 Tama te sogo dage Israel dabego te balia po waibao.
“Genuai Bidi, eno nago nogi ugwabo sobao.
Nago ena dali sębę yali, tiali goli nago sębę silalio,
tama nago ena wiegi yai sę ilalio.
Tama megi da, eno homu bugagia bidibao.
2 Mu tama, Godigo ena ma oda sai dao.
Tama megi da, eno agaba homu dąų ola saibao.
Tama ena wi me egobeo.
God, Genuai Bidigo ena bomo ilibo dao,
tama tibaso, eno balia po obao,
te agai nogi ugwaba sainogo. Magi baso meni.
Agai ena ma oda salio.” *Sai 15:2; Tib 118:14
3 Tǫ dedagede wę sia sabo menio. Agai te wę te nai dabebolo mabo dao. Tama augwali bugagia bidibo dao. Genuai Bidi te sia sisąbo wę tiwai dao. Tigidali sogo agai dage tau sabode dage bugagia dąų olama, bidimainu ebo dao. Tama tibaso, dage agaba wiegi yai homu dali pelama, tama Genuai Bidibolo dage tau somainu hanalugi paibao. 4 Tama te sogo dagego balia weyu e tama waibao,
“Genuai Bidigo nogi wao.
Tama agaba i weyu, tama agabolo buba hwi wao.
Te tigidali we bidi hani dabebolo pusao,
te genuai sę dabe agai yalide.
Tama augwalibolo pusao, aga genuai nogi elalubao.
5 Te tęąbi po weyu, Genuai Bidigo nogi ugwaba sao.
Magi baso meni, aga genuai nogi salio,
te agai yali wiegi wiegi yai sę yalide.
Agai wiegi wiegi yai sę yali po tigidali
tǫde we bidibolo pusao.
6 Israel dabego God aga te Wiegi Yai
Doloba Pai Kolesaga Naga Ebo God dao.
Aga genuai nogi elalubo.
Tama aga dage Saion we bidi dabe dali bidibao.
Tama tibaso, dage wiegi yai homu iyąo.
Tama i bomona weyu, agaba balia po wao.”
Te aga hani we bidi ma sisinibo sogo dagego te balia po waibao.